Su Ig a Pakaenggay sa Uyag-uyag a Da Taman Nin
22
Na guna maipus su entu na inipailay sa laki nu malaikat su lawas'u ig a pakaenggay sa uyag-uyag a da taman nin a pedtuga ebpun kanu Kulesi nu Kadenan a kulesi bun nu Manguda a Bili-bili, na su kalingaw nin na mana kalingaw nu katia. 2 Na su entu a lawas'a ig na lu pakaukit kanu luk'u lalan nu siudad. Na lu kanu dua embala a adteban nin na lu ba su kayu a pakaenggay sa uyag-uyag a da taman nin. Na kanu dalem'u salagun na makasapulu enggu dua 'bpagunga sa embalang-balang a makaisa sa uman saulan.a Na su manga laun nin na pakapangamut kanu manga sakit'u manga bangsa. 3 Na da mailay nengka lu a inidsinta nu Kadenan. Na mailay nengka kanu entu a siudad su Kulesi nu Kadenan a kulesi bun nu Manguda a Bili-bili, na lu bun su manga panunugun nin a pedsimba sa lekanin. 4 Na mailay nilan den su Kadenan sa matakapala enggu su ngala nin na initiap kanu manga bias'ilan. 5 Na da den magabi lu enggu di den nasisita su palitan atawa ka su tayaw nu senang ka su Kadenan den a Mapulu i pakatayaw kanilan. Na endatu den silan taman sa taman.Su Kauma nu Isa al-Masih
6 Na nia pidtalu nu malaikat sa laki na “Su nia a kangadtalu na kasaligan enggu bantang. Ka su Kadenan a Mapulu a minenggay sa katuntay kanu manga nabi i sinemugu demun kanu malaikat'in sa kapayag'in kanu manga panunugun nin kanu manganggula a mangagan den makatingguma.”
7 Na nia pidtalu nu Isa al-Masih na “Ilay nu, mangagan aku den makauma! Na mapia den a benal kanu manga taw a itagu nilan sa ginawa su manga inipayag a kadtalu nu Kadenan kanu nia a kitab.”
8 Na saki si Yuhan a nakakineg enggu nakailay demun kanu langun nu nia ba.
Na guna ku mapasad milay enggu makineg su langun nu entu na sinemugiud aku kanu adapan nu malaikat a napailay sa laki kanu langun nu entu ka enggu ku masimba 9 ugaid'a nia nin pidtalu sa laki na “Di ka penggula i nan ka pagidsan ku bun seka a ulipen a mana bun su manga tagapeda nengka a manga nabi enggu su langun nu temagu sa ginawa kanu manga kadtalu nu Kadenan kanu nia a kitab. Na nia ka bu simba na su Kadenan.” 10 Na nia nin pan pidtalu sa laki na “Di ka ibpamagena su langun nu inipayag a nia a kadtalu nu Kadenan kanu nia a kitab kagina mangagan den a benal i nia makatingguma. 11 Na makin ka padtaday sa kanggula nilan sa mawag su manga penggula sa mawag enggu kamustakilan. Na maitu bun su apia entain a penggula sa mapia enggu ikelas na padtaday ka bun silan sa kanggula nilan sa mapia enggu ikelas.”
12 Na pidtalu menem'u Isa al-Masih i “Ilay nu, mangagan aku den makauma! Na madtatanggit ku su manga balas a inggay ku kanu uman i isa sia luyud kanu ngin i pinggalebek'in. 13 Na saki ba su Punan-punan enggu su Kapupusan, su 'gkabpunan enggu su pedtamanan, su iganat sa ganatan taman sa taman.
14 “Na mapia den a benal kanu manga taw a makalimpiu kanu maledsik'u balegkas'ilan ka inggay kanilan su kawagib sa kaludep'ilan kanu bengawan nu entu a siudad taman sa makaamung silan keman kanu unga nu kayu a pakaenggay sa uyag-uyag a da taman nin. 15 Ugaid'a su manga taw a dala makaludep na entu ba su manga taw a maledsik i galebek'in, su 'bpamangalintaw, su pedsisina, su manga talibunu, su manga pedsimba sa balahala enggu su langun nu malilini sa kabudtud.
16 “Saki ba su Isa. Na sinugu ku su malaikat ku ka enggu nin makapayag su langun nu nia ba sa lekanu a manga lumpukan nu 'bpamaginugut. Na saki ba su taluad'u Nabi Daud atawa ka su tupu nin. Saki ba su bitun a pedsebang kanu 'gkatibuas.”
17 Na su Suti a Ruh nu Kadenan enggu su Babay a Pegkawingen i edtalu sa “Sia ka den!”
Na su langun nu makakineg sa entu na edtalu bun sa “Sia ka den!”
Su langun nu 'gkamalan na mubay.
Su pegkiug 'bpaginum kanu ig a pakaenggay sa uyag-uyag a da taman nin na mubay ka dala bayad'u nia.
Su Kapupusan
18 Saki si Yuhan, na pebpagingaten ku su apia entain a makakineg kanu manga kadtalu nu Kadenan a inipayag kanu nia a kitab sa apia entain i muman kanu ngin i nakadalem kanu nia ba na iuman nu Kadenan kanu siksa nin su langun nu tiuba a nalabit sia ba. 19 Na apia entain bun i kemulang kanu ngin i nakadalem kanu nia ba na iawa lun nu Kadenan su nalabit sia a kawagib'in sa kaamung'in keman kanu unga nu kayu a pakaenggay sa uyag-uyag a da taman nin enggu su kawagib'in sa kaludep'in kanu siudad.
20 Na su sekanin a entu a minayag kanu langun nu nia ba i midtalu sa “Natatalanged a makauma aku san mangagan!”
Nia ku pidtalu na “Amin! Hu Mapulu a su Isa, embalingan ka den sia.”
21 Na san sa lekanu su dala idsan nin a limu nu Mapulu tanu a su Isa al-Masih. Amin.
Wassalam