Su Sangibu Lagun
20
Na guna maipus i entu na nakailay aku menem sa malaikat a mimbaba ebpun sa sulega a pegkapetan nin su gunsi nu Kalut a Nangilem-kilem enggu 'bpananggit sa masela a lantay-lantay. 2 Sinigkem'in su Naga ka pinawik'in sa dalem'u nakasangibu lagun. Na entu ba su nipay a iganat sa ganatan, su binedtuan sa Datu na Giadsal atawa ka Saitan. 3 Daka inidtug'in su entu lu kanu Kalut a Nangilem-kilem enggu kinandaduan nin ka enggu di makaliu asal'a di den makapamagakal kanu manga bangsa taman sa kapupus'u sangibu lagun. Na u maipus i entu na paliun sekanin sa mangagan bu.4 Daka nakailay aku sa manga kulesi a su 'bpamagagayan lun na inenggan sa kawagib sa kapangukum. Na nailay ku bun lu su manga ngiawa a pinamutukan sa ulu sabap kanu kapedsaksi nilan pantag kanu Isa al-Masih enggu su kabpangusiat'ilan kanu kadtalu nu Kadenan. Na silan su dala simba kanu balangiawa a makagkaid atawa ka kanu pinangumbal a palas'u balangiawa. Dala nilan bun talima su tiap'u balangiawa a ipedtiap sia kanu bias atawa ka sia kanu lima. Na embibiag silan 'bpaluman ka endatu silan a kaped'u Isa al-Masih kanu dalem'u sangibu lagun. 5 Na nia ba su binedtuan sa nauna a kapambibiag 'bpaluman kanu namamatay. Na su ped pan a namamatay na pambibiagen silan amaika maipus den su sangibu lagun. 6 Na mapia den a benal kanu manga taw a entu a sinuti a makaamung kanu nauna a kinapambibiag 'bpaluman kanu namamatay. Dala den bagel'in kanilan su ikadua a kapatay ka mabaluy den silan a 'bpangurban kanu Kadenan enggu kanu Masih. Na endatu silan a kaped'u Isa al-Masih kanu dalem'u sangibu lagun.
Su Kinatalaw kanu Datu na Giadsal
7 Na amaika mapupus den su sangibu lagun na butawanan den su Datu na Giadsal. 8 Na lemiu kanu inidtugan lun ka pamagakalan nin su manga bangsa kanu pat a pisuk'u dunia a binedtuan sa Gug enggu Magug. Na limuden nin silan ka paamungen nin sa kambunua. Na sangat i kadakel'ilan ka mana silan kadakel'u pedtad sa dedsan. 9 Na linemapat silan kanu pat a pisuk'u dunia ka binalibet'ilan su pegkampuan nu manga taw nu Kadenan enggu kanu siudad a 'gkasuatan nin. Ugaid'a napaulan su Kadenan sa apuy a ganat sa sulega ka ginepul'in silan langun. 10 Na su Datu na Giadsal a nagakal kanilan na inidtug lu kanu lanaw nu apuy a 'bpangalaw-kalaw a aden sandawa nin. Na lu bun ba inidtug su balangiawa a makagkaid enggu su 'bpenabi-nabi. Na lu den ba silan siksan magabi sa malamag taman sa taman.
Su Nauli den a Kukuman
11 Daka nakailay aku menem sa kulesi a sangat i kaputi nin enggu kasela nin. Na nailay ku bun lu su 'bpagagayan lun. Nadadag kanu adapan nin su langit enggu lupa taman sa di den mailay 'bpaluman. 12 Na nailay ku bun a namakadtindeg kanu adapan nu kulesi a entu su namamatay a magidsan i balapantag atawa ka dikena balapantag a taw. Na aden lu pinangukan a libelu enggu inukan bun su libelu a sinulatan kanu ngala nu mamakatalima kanu uyag-uyag a da taman nin ka kinukum su langun nu namamatay sia luyud kanu ngin i pinggalebek'ilan a nakasulat kanu manga libelu a entu 13 magidsan pan su namamatay kanu lagat enggu su namamatay a lu kanu didalem'u lupa lu kanu Dalepa nu Namamatay. Na kinukum su uman i isa sia luyud kanu ngin i pinggalebek'in. 14-15 Na su dala makasulat i ngala nin kanu libelu a sinulatan kanu ngala nu mamakatalima kanu uyag-uyag a da taman nin na inidtug den lu kanu pegkalaw-kalaw a apuy. Na entu ba su ikadua a kapatay. Na apia su kapatay enggu su Dalepa nu Namamatay na iniamung bun midtug lu.