Su Kapugi kanu Kadenan a Mapulu
19
Na guna maipus i entu na nakakineg aku menem sa matanug a suala nu madakel a taw a lu sa sulega sa nia nilan 'bpamedtalun na“Pugin su Kadenan a Mapulu!
Sa lekanin a Kadenan tanu su kalipuasan, su kasigay enggu su kabarakatan.
2 Ka su kukuman nin na bantang enggu wagib.
Sinugat'in sa kawagib su nabadtug a sundal
a nakapakaledsik kanu dunia sabap kanu katalakiuga nin.
Inisuli nin kanu sundal su kinapaigis'in kanu lugu nu manga ulipen nin.”
3 Na linemalis menem silan 'bpaluman sa
“Pugin su Kadenan a Mapulu!
Na embayug-bayug sa da taman nin su bel'u nabadtug a siudad!”
4 Na su duapulu enggu pat a kalukesan enggu su pat timan a makasabalang a binatang na sinemugiud ka sinimba nilan su Kadenan a 'bpagagayan kanu Kulesi, sa nia nilan pedtalun na
“Pugin su Kadenan a Mapulu. Amin!”
5 Na aden menem nakineg ku a suala ebpun kanu Kulesi sa nia nin pedtalun na
“Pugi nu su Kadenan tanu,
su sekanu a manga ulipen nin,
su sekanu a aden gilek'in sa lekanin
magidsan i balapantag enggu dikena balapantag a taw.”
6 Daka nakakineg aku menem sa suala nu madakel a taw a mana mabagel a dagus'a ig enggu nia nin katanug na mana katanug'u lugung. Na nia nilan pedtalun na
“Pugin su Kadenan tanu a Mapulu a Barakat sa Langun
ka sekanin su pegkamal!
7 Enggalaw-galaw tanu enggu 'gkakalini tanu,
pugin tanu sekanin
ka nauma den ba a nia su kutika a kapapedtampung kanu Manguda a Bili-bili.
Na nakapagadil den su babay a 'gkadtampung'in!
8 Pinambalegkas den sekanin
sa ebpun kanu mapia a ginis a pedtinang enggu sangat i kaputi nin.”
Na su mapia a entu a ginis na entu ba su ikelas a pinggalebek'u manga sinuti.
9 Daka pidtalu menem'u malaikat sa laki i “Isulat'engka su nia: ‘Mapia den a benal kanu manga taw a pinangenggat sa katalabuk kanu kanduli nu kapapedtampung kanu Manguda a Bili-bili!’ ” Pidtalu nin pan i “Su nia na saben-sabenal a kadtalu nu Kadenan.” 10 Daka sinemugiud aku kanu ay nin ka enggu ku masimba ugaid'a nia nin pidtalu sa laki na “Di ka penggula i nan ka pagidsan ku bun seka a ulipen a mana bun su manga tagapeda nengka a pedsaksi pantag kanu Isa al-Masih. Nia ka bu simba na su Kadenan. Ka su kapedsaksi man pantag kanu Isa al-Masih na namba su dalem'u kadtalu nu Kadenan a ipebpayag.”
Su Migkuda kanu Maputi a Kuda
11 Na guna maipus su entu na nailay ku i naukan su sulega, na aden nailay ku lu a maputi a kuda a pigkudan nu bedtuan sa Kasaligan enggu Bantang. Na su kapangukum'in enggu su kambunua nin na wagib. 12 Su mata nin na manabia ka pan i apuy a pegkaleg enggu su ulu nin na madakel i sansangan nin. Na aden ngala a nakasulat kanu badan nin a sekanin bu i pakatuntay kanu maena nin. 13 Mimbalegkas sekanin sa lambung a inisumbuk sa lugu enggu nia ipembedtu sa lekanin na “Su Kadtalu nu Kadenan.” 14 Pedtundugen sekanin nu manga sundalu nu sulega a migkukuda sa maputi enggu mimbabalegkas sa ebpun sa mapia a ginis a sangat i kaputi nin. 15 Na 'bpeliu kanu ngali nin su sundang a magalang a ibpamunu kanu manga bangsa enggu mabagel i kandatu nin lun a mana su tungked a putaw. Na sekanin i lemulis kanu unga nu ubas a su lipunget'u Kadenan a Barakat sa Langun. 16 Na sia kanu lambung'in enggu kanu bubun nin na nia lun nakasulat a ngala na su “Datu nu langun nu datu enggu Mapulu nu langun nu mapulu.”
17 Daka nakailay aku menem sa sakataw a malaikat a pedtindeg kanu senang. Na tinawag'in sa matanug su manga papanuk sa kawang-kawangan sa nia nin pidtalu na “Sia kanu ka edtimu-timu tanu kanu masela a Kanduli nu Kadenan 18 ka enggu kanu makakan kanu sapu nu manga datu, su sapu nu 'gkangaunutan nu sundalu enggu su manga mabagel a sundalu apeg'u sapu nu manga kuda enggu su migkukuda lun taman den kanu sapu nu langun nu taw, magidsan pan i ulipen enggu dikena ulipen, balapantag enggu dikena balapantag a taw!”
19 Daka nailay ku menem su balangiawa a makagkaid enggu su manga datu nu dunia apeg'u manga sundalu nilan a mindidilimudan ka ipembunua nilan su migkuda sa maputi enggu su manga sundalu nin. 20 Na nasigkem su balangiawa a makagkaid apeg'u 'bpenabi-nabi a pinanggalebek'in kanu manga tanda a kagaipan a nakaakal kanu manga taw a tinemalima kanu tiap'u balangiawa a makagkaid enggu su sinemimba kanu inumbal a palas'u entu a balangiawa. Na su balangiawa a entu enggu su 'bpenabi-nabi na idtug silan a bibiag pamun lu kanu lanaw na apuy a 'bpangalaw-kalaw a aden sandawa nin. 21 Su manga tagapeda nilan na pinangimatayan kanu sundang a 'bpeliu kanu ngali nu mama a migkuda sa maputi. Na nasemu-semu keman su manga papanuk kanu manga sapu nu pinangimatayan a entu.