Su Kinadadsang'u Babilunia
18
Guna maipus su entu na nakailay aku menem sa malaikat a nangalimbaba ebpun sa sulega. Na lu sa lekanin su mabagel a kakamal enggu su sigay nin na nakagkalinawag kanu sakadunia. 2 Na inilalis'in sa sangat i katanug'in i “Nakadadsang den su badtug a siudad a Babilunia a iniwadsanan kanu sundal a babay! Nakadadsang den su nabadtug a Babilunia! Nabaluy a walay a pegkalebenan nu manga saitan. Na pidsalagan den nu langun nu manga maledsik enggu pakangingilu a papanuk. 3 Ka timbang a nalangut'in su langun nu bangsa sabap kanu kinadtalakiuga nin. Na inigkiuga sekanin nu langun nu sultan sa dunia. Na su manga padagang sa dunia na migkakawasa sabap kanu kabpamasa nin kanu langun na bilu bangkawat a kiug'a ginawa nin.”4 Na aden menem nakineg ku a suala a ganat sa sulega a nia nin pedtalun na
“Sekanu a manga taw ku na tangkai nu sekanin, ka enggu di kanu pakalalagit kanu kapembaladusa nin asal'a di kanu makaamung kanu kapedtiuba lun.
5 Ka su kabaladusan nin na nakasugku den man kanu langit. Na di man kalipatanan nu Kadenan su manga kadaluakan nin.
6 Na u ngin i pinakaidan nin kanu apia entain na maitu bun ba i pakaidi nu lun. Takep'u i kasuli nu sa lekanin. Takep'u i kawag'u ibubus'u kanu tagayan nin.
7 Na u ngin i kinabadtug'in kanu ginawa nin enggu kinabpia-pia nin lun na maitu bun ba i kalasay nu lun enggu kapakapasang'u lun. Ka nia nin man kapegkailay kanu ginawa nin na bai sekanin, dala lidu na ginawa nin enggu dikena sekanin pagidsan nu manga balu.
8 Tembu ba kanu dalem'u sagay bu na makapenu sa lekanin su manga tiuba a mana su kapatay, lidu na ginawa enggu kanggutem. Na tepuken sekanin na apuy ka sangat man i kabarakat'u Kadenan a Mapulu a sinemugat lun sa kawagib.”
9 Na su langun nu manga sultan sa dunia a inigkiuga nin enggu su nagigiamung kanu kinabpia-pia nin na sangat a mangalidu i ginawa nilan lun taman sa makapaguguliang silan kanu kailay nilan kanu bel'u kapedtutung lun. 10 Na sangat a kangagilekan silan kanu kapedsiksa lun tembu pedsandengen nilan bu sekanin a nia nilan 'gkangadtalu na “Duan-duan nin den su badtug a siudad a Babilunia! Seka su nabadtug a mabagel a inged, na sakelap mata bu na nakatingguma den sa leka su kukuman sa leka!”
11 Na su manga padagang menem kanu dunia na mangalidu i ginawa nilan enggu makapaguguliang bun silan ka da den mamasa kanu manga dagangan nilan a mana su 12 manga bulawan, manga pilak, manga muntia, manga tipay enggu manga mapia a ginis, su lambayung a matinang a ginis, su matilak a ginis enggu su maliga a ginis. Na dala den mamasa kanu manga kamutan a kayu atawa ka su manga langun-taman a inumbal ebpun kanu sungay na gagia enggu manga balaalaga a kayu. Da den mamasa kanu manga langun-taman a inumbal ebpun sa galang, putaw enggu marmul a watu. 13 Da den mamasa kanu manga ibpanimbul a sinamun enggu manga paninu, manga tutungen a mamut, manga kamutan a mira, ig'a ubas, lana na ulibus, manga mapia a arina enggu bantad. Na da den mamasa kanu manga sapi enggu manga bili-bili, manga kuda enggu manga kalisa enggu manga ulipen.
14 Na nia edtalun nu manga padagang sa lekanin na “Da den su langun nu mapia a 'gkapangingalap'engka. Su langun nu kakawasan nengka na nadala den enggu di nengka den makua 'bpaluman!” 15 Na su manga padagang a mibpasa kanu langun nu entu sa lekanin a punan a inigkawasa nilan na pedsandeng bu sa lekanin ka sangat a 'gkangagilekan silan kanu kapedsiksa sa lekanin. Namakapaguguliang silan enggu 'gkangalidu i ginawa nilan 16 sa nia nilan 'gkangadtalu na “Duan-duan nin den su badtug a siudad! Paganay na nabausan sekanin na mangapia a ginis a lambayung enggu maliga enggu bulawan, balaalaga a watu enggu tipay. 17 Na sakelap mata bu na nabinasa den su langun na kakawasan a entu!”
Su langun nu kapitan nu kapal enggu su namageda lun, su manga palalayag enggu su langun na taw a nia nin pantialian na lu sa lagat na pedsandeng sa lekanin. 18 Na kanu kailay nilan kanu bel'u kapedtutung lun na nia nilan pakalalis pedtalu na “Dala pagidsan nin su nia a badtug a siudad!” 19 Na pinanaguan nilan sa aw su ulu nilan ka sangat a 'gkangalidu i ginawa nilan enggu pakapaguguliang silan sa matanug sa nia nilan 'gkangadtalu na “Duan-duan nin den su badtug a siudad a Babilunia! Sekanin su siudad a langun nu dinemunggu kanu pantalan nin na migkakawasa! Ugaid'a sakelap mata bu na nabinasa den.”
20 Tembu sekanu a san sa sulega na enggalaw-galaw kanu. Enggalaw-galaw kanu a manga sinuti, manga sinugu enggu manga nabi. Ka sinugat den man sekanin sa kawagib'u Kadenan sa kanu langun na pinggula nin sa lekanu!
21 Na nakailay aku menem sa mabagel a malaikat a kinemua sa masela a benal a watu a nia nin kasela na mana gilingan ka inidtug'in kanu lagat sa nia nin pidtalu na “Maya ba i kageled'u badtug a siudad a Babilunia enggu di den makambuat 'bpaluman! 22 Na di den makineg sa leka su manga suala nu pasesengal enggu su uni nu manga kutiapi, uni nu manga palendag enggu uni nu manga tambuli. Di den mailay sa leka su manga mategel a panday sa apia ngin enggu di bun makineg sa leka su ingel'u manga gilingan. 23 Na su kaliwanag'u manga palitan nengka na di den mailay sa leka 'bpaluman. Di den makineg sa leka su kagalaw nu manga pegkawingen. Kagina su manga padagang'engka na sangat den i kabpemamasela nin sia sa liwawaw na dunia enggu su langun nu bangsa na napagakalan nengka sia kanu kabpangalintaw nengka. 24 Seka i napaigis kanu lugu nu manga nabi enggu su manga sinuti taman den kanu langun nu ped pan a pinangimatayan sia sa dunia.”