Su Sundal a Babay a Migkuda kanu Balangiawa a Makagkaid
17
Na isa kanu pitu kataw a malaikat a nakadtatanggit sa langgungan i minubay sa laki ka nia nin pidtalu na “Sia ka, ka ipailay ku sa leka su kapedsiksa kanu badtug a sundal a babay a lu nakambetad kanu madakel a lawas'a ig. 2 Inigkiuga nu babay ba a entu su manga sultan kanu liwawaw nu dunia enggu linemangut kanu langun nu maginged sabap kanu kinadtalakiuga nin.”3 Na linemangkap sa laki nu Suti a Ruh na mana init aku nu malaikat lu kanu tawan-tawan a dalepa. Na nakailay aku lu ba sa babay a migkuda sa maliga a balangiawa a makagkaid. Na su entu a balangiawa na pitu timan i ulu nin enggu sawati i sidung'in. Nakabaus kanu lawas'in su manga ngala a sakutu kanu Kadenan. 4 Nakambalegkas su babay sa lambayung enggu maliga a pibpalasan sa bulawan, tipay enggu manga balaalaga a watu. Na sia kanu sabala kanu lima nin na pegkapet sa tagayan a bulawan a napenu-penu na talampasa a nakua nin kanu katalakiuga nin. 5 Nakasulat kanu bias'in su gelal a nakapagena i maena nin a “Su nabadtug a Babilunia a ina nu manga sundal enggu manga talampasa sa dunia.” 6 Na nailay ku bun su babay a entu a nalangut'u kinainem'in kanu lugu nu manga sinuti a pinaimatayan nin sabap kanu kinadsaksi nilan pantag kanu Isa al-Masih.
Na kanu kinailay ku lun na sangat a nagaip aku. 7 Daka nia pidtalu nu malaikat sa laki na “Nginan ka 'gkagaip ka? Edsinantalen ku sa leka su nakapagena a maena nu babay a entu enggu su pigkudan nin a balangiawa a makagkaid a aden pitu timan a ulu nin enggu sawati a sidung'in. 8 Na su balangiawa a entu a nailay nengka, na kanu paganay na bibiag su entu ugaid'a saguna na minatay den. Ugaid'a embuat sekanin 'bpaluman ebpun kanu Kalut a Nangilem-kilem, entu pan ka idtug sekanin kanu naraka. Na su langun nu taw sia sa liwawaw na dunia a dala makasulat su ngala nilan kanu libelu nu mamakatalima kanu uyag-uyag a da taman nin iganat pan kanu kinalimbag kanu dunia na sangat a magaip silan sa kailay nilan kanu entu ba a balangiawa kagina kanu paganay na bibiag su entu enggu minatay den ugaid'a embuat 'bpaluman.
9-10 “Na nasisita su ilemu sa katuntay kanu nia. Su pitu timan a ulu nu balangiawa a entu, na entu ba su pitu timan a bakulud a 'bpagayanan nu babay enggu entu bun ba su pitu kataw a sultan. Na su lima kataw kanu manga sultan na minatay den ugaid'a su ikanem na pendatu pamun enggu su ikapitu menem na dala pamun makatingguma. Na sia kanu katingguma nu entu na endatu sekanin sa mangagan bu. 11 Na su balangiawa a entu a pakagkaid a paganay na bibiag enggu minatay den na sekanin su ikawalu a sultan a mimbuat 'bpaluman lu kanu isa kanu pitu kataw a entu a sultan enggu ibpagidtug sekanin kanu naraka. 12 Na su sawati menem a sidung'u balangiawa a nailay nengka na su sapulu a manga sultan a da pamun makandatu. Ugaid'a sakauras bu i kakamal'ilan kanu timpu a kakamal'u balangiawa a makagkaid. 13 Na su entu a manga sultan na isa bu i tangga na ginawa nilan. Inggay nilan kanu balangiawa a entu su bagel'ilan enggu su kamal'ilan. 14 Imbunua nilan su Manguda a Bili-bili ugaid'a tabanan silan nu Manguda a Bili-bili ka sekanin su Mapulu nu langun nu mapulu enggu Datu nu langun nu manga datu. Na kaped'in su 'gkangasaligan nin a pinamili nin a makapaginugut sa lekanin.”
15 Daka nia pan pidtalu nu malaikat sa laki na “Su madakel menem a lawas'a ig a nambetadan nu sundal, na entu ba su sakian-kian a manga taw a mana su embalangan nu maginged, bangsa enggu basa. 16 Na su sawati ba a entu a nailay nengka a manga sidung a su sapulu kataw a sultan enggu su balangiawa a makagkaid na kabensian nilan su sundal. Na panguan nilan su langun-taman nin taman sa makagkawas-kawas enggu kanen nilan su sapu nin taman sa tutungen nilan kanu apuy. 17 Na su Kadenan i minetad sa entu kanu atay nilan ka enggu matuman su kahanda nu Kadenan sia makanggulalan kanu manga sultan a entu. Tembu ba napagayunan nilan i kaenggay nilan kanu bagel'ilan sa kakamal kanu balangiawa a entu gagalu nu di pan matuman su manga kadtalu nu Kadenan. 18 Na su babay ba a entu a sundal a nailay nengka na entu ba su badtug a siudad a pendatu kanu langun nu datu kanu liwawaw nu dunia.”