Su manga Langgungan nu Lipunget'u Kadenan
16
Na nakakineg aku sa matanug a suala a ebpun kanu Suti a 'Bpagagaman sa nia nin pedtalun kanu pitu kataw a malaikat na “Ganat kanu den ka ibubus'u den kanu dunia su lipunget'u Kadenan a nakabetad kanu pitu timan a langgungan.”2 Na ginemanat den mambu su ika-isa a malaikat. Na inibubus'in den kanu kalupan su dalem'u langgungan nin. Daka naaden su masakit enggu pakangingili a sakit sa lanitan kanu manga taw a tiniapan kanu tiap'u balangiawa a makagkaid enggu pedsimba kanu pinangumbal a buntal'u entu a balangiawa.
3 Na inibubus menem'u ikadua a malaikat su dalem'u langgungan nin lu kanu lagat. Daka nabaluy a mana lugu nu namamatay den a taw su lagat taman sa su langun nu balangiawa kanu didalem'in na naibped minatay.
4 Na inibubus menem'u ikatelu a malaikat su dalem'u langgungan nin lu kanu manga bualan enggu lu kanu manga lawas'a ig. Na daka nabaluy a lugu su langun nu entu. 5 Na nakineg ku su malaikat a pedsaligan kanu langun nu 'gkabpunan nu ig sia sa dunia sa nia nin pedtalun na “Hu Kadenan ku a Suti, seka su Kadenan iganat sa ganatan sampay saguna, su manga siksa nengka a nia kanu manga taw na wagib 6 ka pinaigis'ilan man su lugu nu manga sinuti nengka enggu su lugu nu manga nabi nengka. Tembu nia nengka den ipebpaginem kanilan na lugu. Na nia man ba i dait kanilan!”
7 Na nakakineg aku menem sa suala a ebpun kanu pegkurbanan a pedtalu sa “Hu Kadenan a Mapulu a Barakat sa Langun! Bantang man enggu wagib su manga kukuman nengka!”
8 Na inibubus menem'u ikapat a malaikat su dalem'u langgungan nin lu kanu senang asal'a pegkayaw a benal su senang ka enggu 'gkalupang su manga taw. 9 Na apia 'gkalupang su manga taw na di bun silan pedtataubat, dala nilan bun enggi sa pugi su Kadenan ka makin nilan pan inidsinta su Kadenan a pegkakataw kanu langun nu entu a manga tiuba.
10 Daka inibubus menem'u ikalima a malaikat su dalem'u langgungan nin lu kanu kulesi nu balangiawa a makagkaid. Daka migkalibuteng su pendatuan nin. Na sabap kanu 'gkatala nilan a kamalasayan na 'gkapangebut'u manga taw su dila nilan 11 ugaid'a da nilan bun edtaubati su manga pinggula nilan ka makin nilan pan inidsinta su Kadenan a lu sa sulega sabap kanu manga tiuba a pakalasay kanilan.
12 Na inibubus menem'u ikanem a malaikat su dalem'u langgungan nin lu kanu maulad a lawas'u ig a Yupratis. Daka nailatan su lawas'u a ig ka enggu 'gkaukitan nu manga sultan a ebpun sa sebangan. 13 Daka nakailay aku sa telu timan a saitan a mana buntal'a babak a linemiu ebpun kanu ngali nu Naga, kanu ngali nu balangiawa a makagkaid enggu kanu ngali nu 'bpenabi-nabi.a 14 Na entu ba su manga saitan a penggalebek sa manga kagaipan a tanda. Na pibpawangan nilan su manga sultan kanu lusud'u dunia ka linimud'ilan sa kambunua kanu gay a kapagedam'u Kadenan a Barakat sa Langun kanu lipunget'in.
15 Na nia pidtalu nu Isa al-Masih na “Pakikineg aku nu! Makauma aku san sa lekanu a manabia ka pan i tanegkawn a di nu katekawan. Na mapia den a benal kanu manga taw a pendiaga enggu di kaawan na balegkas ka di silan makagkadaw enggu dili makayaya kanu kauma ku.”
16 Na su manga saitan a entu, na lu nilan linimud su manga sultan a entu apeg'u manga sundalu nilan kanu dalepa a bedtuan sa Armagidun sa basa a Hibru.
17 Na inibubus menem'u ikapitu a malaikat su dalem'u langgungan nin lu kanu kawang-kawangan. Na aden pedtalu sa matanug lu kanu Kulesi kanu Suti a 'Bpagagaman sa “Napasad den!” 18 Daka namedtalas su kilat, mibpapaleti, namelugung enggu lineminug sa sangat i kabagel'in. Na da pagidsan nu kabagel'in iganat pan kanu kinapangaden kanu manusia 19 ka naupak sa telu bad su badtug a siudad a Babilunia taman sa naibped nageba su langun nu siudad kanu liwawaw nu dunia. Na benal a dala kalipatani nu Kadenan su badtug a Babilunia ka inenggan nin kanu tagayan a dinaleman kanu ig'a ubas a su lipunget'in. 20 Na napenas su langun nu punul enggu da nasama a palaw. 21 Minulan sa mangasela a benal a ilu a manga patpulu enggu lima kakilu i kangaugat'in a pakadadsang kanu manga taw. Na nakasinta nilan su Kadenan kanu entu a kinaulan sa ilu sabap sa sangat den a pakatiawan-tiawan su entu a tiuba.