Su Nauli den a manga Tiuba
15
Guna maipus su entu na nakailay aku menem lu sa sulega sa pakagaip-gaip enggu pakatiawan-tiawan a tanda. Na aden nailay ku lu a pitu kataw a malaikat a nait'ilan su pitu timan a mauli den a tiuba. Na entu den ba i mauli a tiuba ka 'gkatalutup den su lipunget'u Kadenan.2 Daka nakailay aku menem sa lagat a mana su katia i kalingaw nin a pegkaleg. Na nailay ku kanu ligid'in a pedtindeg su namakatalaw kanu balangiawa a makagkaid enggu kanu pinangumbal a buntal'in. Na nagaga nilan i dala silan katiapi nu lumilu a tanda nu ngala nu balangiawa a entu. Na uman i isa kanilan na aden mana kutiapi nin a inenggay lun nu Kadenan. 3 Na pedsengalen nilan su sengal'u Nabi Musa a panunugun nu Kadenan enggu su sengal'u Manguda a Bili-bili a
“'Hu Kadenan a Mapulu a Barakat sa Langun, sangat a pakagaip-gaip su manga pinggula nengka.
Seka a pendatu kanu langun nu bangsa taman sa taman na ikelas enggu bantang su manga ukit'engka.
4 Hu Kadenan a Mapulu, na entain ba i di magilek sa leka? Entain ba i di mugi kanu ingala nengka?
Ka seka bu man i suti!
Semupeg sa leka su langun nu bangsa ka semimba sa leka sabap sa napayag den kanilan su manga ikelas a pinggula nengka.”
5 Guna maipus su entu na nailay ku i naukan den lu sa sulega su Suti a 'Bpagagaman a su Balung-balung a Tuleda a binetadan kanu Kaun nu Kapasadan. 6 Na linemiu kanu entu ba su pitu kataw a malaikat a nakadtatanggit kanu pitu timan a tiuba. Linemambung silan sa sangat i kaputi nin enggu aden ambilut'u laleb'ilan a bulawan. 7 Na isa kanu pat timan a binatang a makasabalang na inenggay nin kanu pitu kataw a entu a malaikat su pitu timan a langgungan a bulawan a napenu nu lipunget'u Kadenan a su Kadenan a da taman nin. 8 Na su Suti a 'Bpagagaman na napenu na bel a ebpun kanu sigay enggu kabarakat'u Kadenan. Na dala isa bu a pakaludep lu ba taman a di pan mapasad su pitu timan a entu a tiuba a nait'u pitu kataw a malaikat.