Su Bili-bili enggu su Paganayan a Unga nu Sabpet
14
Na guna maipus su entu, na nailay ku menem su Manguda a Bili-bili a pedtindeg kanu Palaw nu Zion. Na nia nin kaped na su magatus enggu patpulu enggu pat ngibu a manga taw a tiniapan su bias'ilan kanu ngala nu Manguda a Bili-bili enggu kanu ngala nu Ama nin sa Sulega. 2 Daka aden menem nakineg ku a suala a ebpun sa sulega a mana bun su mabagel a dagus'a ig enggu nia nin katanug na mana bun su katanug'u lugung. Na su suala a entu a nakineg ku na mana manga taw a pegkukutiapi. 3 Pedsesengal silan sa bagu a sengal lu kanu adapan nu Kulesi enggu su pat timan a binatang a makasabalang taman den kanu manga kalukesan. Na dala mataw lun edsengal su entu a sengal nia tabia na su magatus enggu patpulu enggu pat ngibu bu a manga taw a tinebus kanu dunia. 4 Na silan ba a entu na dala kabudsengi na babay kagina dala a benal nambalagiuma nilan. Na pedtatanggunut silan kanu entu a Manguda a Bili-bili sa apia endaw den sekanin pedsangul. Na silan ba a entu i tinebus ebpun kanu langun nu manusia ka iniumun kanu Kadenan enggu kanu Manguda a Bili-bili a mana su paganayan a unga nu sabpet. 5 Na liu pan sa entu, na dala kabudtud a linemiu kanu ngali nilan taman sa dala tila nilan.Su Telu Kataw a Malaikat
6 Na nakailay aku sa sakataw a malaikat a pendadalayug lu kanu kawang-kawangan a nadtatanggit'in su Mapia a Tutuma a dala kapegkapupus'in, ka ipebpayag'in kanu langun nu taw sia sa dunia a nakabpun kanu embalang-balang a manga bangsa, manga tribu enggu kanu langun nu manga basa taman den kanu langun nu maginged. 7 Nia nin ibpananawag na “Ikagilek'u su Kadenan enggu pugi nu sekanin sabap sa nauma den ba a nia su kutika a kabpangukum'in kanu langun nu manusia. Simba nu sekanin a nangaden kanu langit enggu lupa, kanu lagat enggu kanu manga bualan na ig.”
8 Na nakailay aku menem sa sakataw a malaikat a pedtalu sa “Nakadadsang den! Nakadadsang den su badtug a siudad a Babilunia a timbang a linemangut kanu langun nu bangsa sabap kanu kinadtalakiuga nin.”
9 Na aden menem nailay ku a malaikat a nia nin ibpananawag na “Apia entain i pedsimba kanu balangiawa a makagkaid enggu kanu pinangumbal a buntal'in apeg den nu tinemalima kanu tiap'in magidsan pan i sia nilan inipatiap kanu bias'ilan atawa ka sia kanu lima nilan, 10 na makaamung silan minem kanu lipunget'u Kadenan a inibubus den kanu tagayan nu da idsan nin a lipunget'in! Na pedsiksan silan kanu apuy a 'bpangalaw-kalaw a aden sandawa nin sia kanu adapan nu manga malaikat a suti enggu kanu Manguda a Bili-bili. 11 Na su bel'u kapedsiksa kanilan na di den maawa taman sa taman. Na magabi sa malamag na da den kalilintad'u manggiginawa nu pedsimba kanu balangiawa a makagkaid enggu kanu pinangumbal a buntal'in taman den kanu manga taw a napatiap kanu ngala nin.”
12 Tembu dait a mapakatigkel su manga taw a sinuti a penggulalan kanu manga kasuguan nu Kadenan enggu pedsalig kanu Isa al-Masih.
13 Daka nakakineg aku menem sa suala a ebpun sa sulega a pedtalu sa “Isulat'engka su nia ba: ‘Iganat saguna na ngin den i kapia nin kanu taw a minatay a nalusud kanu Mapulu.’ ” Na nia menem pidtalu nu Suti a Ruh na “Uway! Makapangintelenen den silan kanu langun nu kinanggalebek'ilan ka pedtapiden man silan nu balas'u pinggalebek'ilan.”
Su Kapedsabpet kanu Sakadunia
14 Na guna maipus i entu na tinemingada aku, na nailay ku kanu gabun a maputi su mama a 'bpagagayan a makalagid kanu Kaka nu Manusia a midsansangan sa bulawan enggu pegkapet sa magalang a benal a kumpay. 15 Daka aden menem malaikat a linemiu kanu Suti a 'Bpagagaman a nia nin pedtalun sa matanug kanu 'bpagagayan a entu a lu kanu gabun na “Ikumpay nengka den su kumpay nengka ka nauma den su kutika nu kabpagagani ka su 'bpagaganin sa dunia na migkalutu den!” 16 Daka inikumpay den mambu nu 'bpagagayan a entu su kumpay nin ka pinagagani nin den su sakadunia.
17 Na aden menem malaikat a linemiu ebpun kanu Suti a 'Bpagagaman a lu sa sulega a aden bun kumpay nin a magalang. 18 Na aden bun linemiu a malaikat a ebpun kanu pegkurbanan a sinaligan kanu apuy sa nia nin pedtalun sa matanug kanu malaikat a aden kumpay nin a magalang na “Kumpay ka den. Pagagani ka den su sakadunia a mana su pinamula a ubas a malutu den su unga nin!” 19 Daka inikumpay den mambu nu malaikat su kumpay nin kanu embala-bala kanu sakadunia. Na linimud'in su manga kinumpay nin ka inidtug'in lu kanu lulisan a winadsanan kanu lipunget'u Kadenan. 20 Na nalupet-lupet kanu lulisan lu kanu liu nu siudad su manga pinagagani nin a mana linulis a unga na ubas. Na su lugu nilan na linemanag ebpun kanu lulisan taman sa dinemegan su entu sa nia nin kadalem na nakauma kanu kakang'u manga kuda enggu su kaulad'u nalanagan nin na nakauma sa telupulu ngibu lenet.a