Su Balangiawa a Makagkaid
13
Na guna su naipus i entu na nakailay aku menem sa balangiawa a makagkaid a mimbuat kanu lagat a aden pitu timan a ulu nin enggu sawati i sidung'in. Na uman i sidung'in na aden sansangan nin. Na uman i ulu nin na aden nakasulat lun a ngala a sakutu kanu Kadenan. 2 Na su entu a balangiawa na nia ku lun kalagidan na masela a tinggalung, su ay nin na mangasela gaid enggu su ngali nin na mana ngali na alimaw. Na inenggan nu Naga sa kapegkagaga, kadatu enggu mabagel a kakamal. 3 Na isa kanu manga ulu nin i napalian na sundang sa masela ugaid'a migkapia su entu. Na sabap sa kinagkapia nu entu a pali nin na nakagaip kanu sakadunia su entu taman sa nabaluy silan a ulayat'in. 4 Na sinimba nilan su Naga ka sekanin i minenggay sa kakamal kanu balangiawa a makagkaid. Sinimba nilan bun su balangiawa a entu a makagkaid sa nia nilan pedtalun na “Entain ba i makalepeng kanu balangiawa a makagkaid? Entain ba i makagaga lun embunua?”5 Na sinugutan su entu a balangiawa sa kadsandag'in enggu kasakutu nin. Sinugutan bun sekanin sa kanggulalan nin kanu kamal'in kanu dalem'u patpulu enggu dua ulan. 6 Na tinemandang den edtalu-talu su balangiawa a entu sa sakutu kanu Kadenan, magidsan pan kanu ingala nu Kadenan, kanu pendalepan nin taman den kanu langun na 'bpamegkaleben lu sa sulega. 7 Na sinugutan bun sekanin sa kambunua nin kanu manga taw a sinuti nu Kadenan taman sa matalaw nin silan. Inenggan bun sa kawagib sa kakamal kanu uman i tribu, maginged, basa enggu bangsa. 8 Na langun nu taw sa liwawaw na dunia na simban nilan sekanin, nia tabia a di semimba lun na su manga taw a nakasulat su manga ngala nilan kanu libelu a sinulatan kanu mamakatalima kanu uyag-uyag a da taman nin iganat pan kanu kinalimbag kanu dunia. Su entu a libelu na nia lun kigkuan na su Manguda a Bili-bili a inigkurban.a
9 Na apia entain i aden tangila nin a pakakineg na makikineg sa mapia!
10 Na apia entain i nia inenggay lun nu Kadenan a bagi na masigkem na natalatantu a masigkem. Su nia menem inenggay lun a bagi i matay na sundang na entu bun ba i makapatay lun na sundang.
Na nia ba i sabap'in i dait a temigkel su manga taw a sinuti enggu embagelan nilan i salig'ilan.
Su Ikadua a Balangiawa
11 Daka nailay ku menem su salakaw a balangiawa a makagkaid a mimbuat a ebpun kanu didalem'u lupa.b Aden dua timan a sidung'in a mana su sidung'u manguda a bili-bili ugaid'a su suala nin na mana su suala na naga. 12 Na sekanin ba i sinaligan nu nauna a balangiawa enggu 'bpagusalen nin su langun na kamal'u nauna a balangiawa. Langun nu taw sa liwawaw na dunia na 'bpamegesen nin sa kasimba nilan kanu nauna a balangiawa a napalian sa masela i ulu nin ugaid'a migkapia bun. 13 Benal a pakagaip-gaip a manga tanda su penggalebeken nu nia ba a balangiawa ka apia su kapebpagulan sa apuy a ebpun sa langit na 'gkagaga nin penggula sia kanu kaadapan nu madakel a taw. 14 Na sia nakanggulalan kanu manga tanda a kagaipan a inipanggalebek lun nu nauna a balangiawa na naakalan nin su manga taw sa liwawaw na dunia sa nia nin pedtalun kanilan na mumbal silan sa balahala a palas'u nauna a entu a balangiawa a napalian sa masela i ulu nin ugaid'a migkapia bun. 15 Na sinugutan sa kaenggan nin sa napas su balahala a palas'u nauna a balangiawa ka enggu pakadtalu ka enggu nin makasugu i imatayan su langun nu di pedsimba lun. 16 Na 'bpamegesen nu balangiawa a entu su manga taw a magidsan i balapantag atawa ka dikena balapantag, kawasa atawa ka dikena kawasa, ulipen atawa ka dikena ulipen sa patiapan nilan su kawanan a lima nilan atawa ka su bias'ilan. 17 Ka apia entain i dala tiap'in na di mapakay a makapamasa atawa ka makabpasa. Na nia nilan ba a entu ipedtiap na su ngala nu nauna a balangiawa atawa ka su lumilu nu ngala nin.
18 Na nia ba i sabap'in i dait a aden ilemu tanu sa kataw tanu kanu lumilu nu nauna a entu a balangiawa. Ka su entu a lumilu na tanda kanu ngala nu taw. Na nia ba a entu lumilu nu entu a balangiawa na 666.