Su Babay enggu su Naga
12
Na guna maipus su entu na mibpapayag lu kanu kawang-kawangan su tanda a pakagaip-gaip a babay a nambalegkas'in su senang enggu su ay nin na lu nakadampu kanu ulan-ulan. Nakadsansangan sekanin sa sapulu enggu dua a bitun. 2 Na su entu a babay na pembata taman sa pakalalis sa kasakit'u kapembata nin.3 Saleta mambu na aden bun mibpapayag lu kanu kawang-kawangan a tanda a pakagaip-gaip a maliga a naga a sangat i kasela nin a aden pitu timan a ulu nin enggu sawati i sidung'in. Na uman i ulu nin na aden sansangan nin. 4 Na linabpes'in kanu ikug'in su sabad kanu telu bad kanu manga bitun ka inidtug'in sia sa dunia. Entu pan ka midtindeg sekanin lu kanu adapan nu babay a pembata ka enggu nin 'gkasakab su wata sa endaw i kagemaw nin. 5 Saleta mambu na mimbata den su babay sa wata a mama. Na su entu a wata na mabagel i kandatu nin a mana su tungked a putaw. Endatuan nin su langun nu manga bangsa sa liwawaw na dunia. Na inagaw su entu a wata ka pinananggit lu kanu adapan nu Kadenan a lu kanu Kulesi nin. 6 Na su babay mambu na nalalaguy lu kanu tawan-tawan a dalepa a inadil'u Kadenan sa lekanin a kandalepan nin enggu lu ba sekanin katiakapan kanu dalem'u sangibu enggu dua gatus enggu nempulu a gay.
7 Guna su maitu na mimbunua lu kanu sulega. Ka su malaikat a su Mikail apeg'u kaped'in a malaikat na inimbunua nilan su Naga taman sa minatu mambu su Naga apeg'u manga ulayat'in. 8 Na natalaw nilan su Naga taman sa pinaawa sekanin lu sa sulega 9 ka inidtug sekanin sia sa dunia. Na entu ba su nipay a iganat sa ganatan, su binedtuan sa Datu na Giadsal atawa ka Saitan. Sekanin ba su 'bpanalimbut kanu sakadunia. Na su manga ulayat'ina na iniunut bun midtug sia sa dunia.
10 Na nakakineg aku menem sa matanug a suala a ebpun sa sulega a nia nin pedtalun na
“Saguna na nakauma den su kalipuasan, kabarakatan
enggu su kapendatu nu Kadenan tanu!
Na nakatingguma bun su kakamal'u Masih a pinamili nin
ka tinabanan nin enggu inidtug sia sa dunia su Datu na Giadsal
a magabi sa malamag na 'bpanendit bu kanu manga suled tanu sa paginugut sia kanu adapan nu Kadenan.
11 Tinabanan nilan sekanin sia nakanggulalan kanu lugu nu Manguda a Bili-bili
enggu kanu kabpangimbenal'ilan kanu bantang
apia nia nin kaaden i ipatay nilan pan.
12 Na kagina ka maitu na dait a edsisigalaw kanu a lu sa sulega
taman den kanu langun na pegkaleben lu.
Ugaid'a sangat i kapasang'in a tiuba i makatingguma sa lekanu san sa liwawaw nu lupa taman den kanu lagat
ka su Datu na Giadsal na san den
a sangat a 'bpangaliputeng
kagina 'gkatawan nin i mangagan bu i kutika nin!”
13 Na guna kaimamani nu Naga i inidtug sekanin sia sa dunia na pinaneled'in su babay a mimbata sa wata a mama. 14 Ugaid'a inenggan su babay sa dua timan a papak'u masela a papanuk asal bu na makalayug sekanin ka enggu dili masaut'u Naga lu kanu midtawan-tawan a dalepa a pinagenan sa lekanin. Na lu ba sekanin tiakapan nu Kadenan sa dalem'u telu lagun enggu tenga. 15 Daka tinemubpa su Naga sa ig a manabia ka pan i degan ka asal'a maanud su babay. 16 Ugaid'a mimbutekad su lupa ka inigup'in su ig a initubpa nu Naga tembu nakalipuas su babay. 17 Daka miniseg i sakit'a ginawa nu Naga kanu babay, na nia nin mambu pidsangul na su nasama kanu manga tupu nu babay ka inimbunua nin. Silan ba a nia su manga taw a penggulalan kanu manga kasuguan nu Kadenan enggu di den edsalin-salin su atay nilan sa kanu kinapaginugut'ilan kanu tutuma nu Isa al-Masih.
18 Daka midtindeg lu kanu dedsan su Naga.