Su Dua Kataw a Saksi
11
Daka inenggan aku sa ibpanembu a mana tungked enggu pidtaluan aku sa “Tembu ka su Suti a 'Bpagagaman kanu Kadenan taman kanu pegkurbanan lun enggu bilang ka su 'bpamedsimba lu. 2 Ugaid'a di ka den ibpagamung pedtembu su lama-lama nu Suti a 'Bpagagaman lu sa liu kagina iniumun den i entu kanu manga taw a dikena-Yahudi. Na dakudaken nilan su suti a siudad kanu dalem'u patpulu enggu dua ulan. 3 Na sugun ku san su dua kataw a saksi ku a mimbalegkas sa saku ka kanu dalem'u sangibu enggu dua gatus enggu nempulu gay na ipayag'ilan bu su kadtalu nu Kadenan.”4 Na su dua kataw a entu a saksi na silan su nadtalu a su duapun a kayu a ulibus atawa ka su dua timan a 'bpanaguan sa palitan. Na lu silan pedtindeg kanu adapan nu Kadenan a Mapulu sa langun. 5 Na amaika aden miug mamungkaid kanilan na 'bpeliuwan na apuy su ngali nilan a temupuk kanu mamungkaid a entu kanilan. Na maitu ba i ukit a kapangimatay kanu apia entain a mamungkaid kanilan. 6 Na aden bagel'ilan sa kadapeng kanu kawang-kawangan ka enggu di makaulan kanu manga timpu a kapebpayag'ilan kanu kadtalu nu Kadenan. Na aden bun bagel'ilan sa kapambaluy sa lugu kanu ig enggu kapangaden kanu embalang-balang a tiuba sia sa dunia sa kanu apia ngin a kutika a kiug'ilan.
7 Na amaika makapasad den silan mangimbenal, na embuat su balangiawa a makagkaid a lu makabpun kanu Kalut a Nangilem-kilem ka imbunua nin silan, na talawn nin silan taman sa matay nin. 8 Na su bangkay nu dua kataw a entu a midsaksi na tagaken lu kanu lalan nu badtug a siudad a iniwadsanan sa Sudum enggu Egypt. Na lu bun ba a siudad initutuk kanu kayu a pinambalawaga su Mapulu nilan. 9 Na kanu dalem'u telu gay enggu tenga na edtulikan bu nu manga taw su bangkay nilan a ebpun kanu embalang-balang a maginged, tribu enggu basa taman kanu embalang-balang a manga bangsa. Na di nilan sugutan su manga taw sa kalebeng kanilan. 10 Na sabap kanu kapatay nu dua kataw a entu a saksi na edsela-sela silan taman sa mamagenggaya silan. Na edsudian nilan su bangkay nu dua kataw a entu a nakagkaid kanilan. 11 Ugaid'a maipus su telu gay enggu tenga na yupan nu Kadenan su dua kataw a entu a saksi kanu napas a 'bpagenggay sa uyag-uyag, na makambangun silan taman sa apia entain i makailay kanilan na kaawan na makatu sa gilek'in lun. 12 Na makakineg su dua kataw a entu a saksi sa matanug a suala a makabpun sa sulega sa nia nin edtalun na “'Bpapulu kanu den!” Daka 'bpapulu den mambu silan lu sa sulega a pedtulikan nu manga kuntela nilan gagalu nu kapebpapulu nilan taman sa makasaleta den silan kanu manga gabun. 13 Na kanu entu ba a kutika na leminug sa sangat i kabagel'in. Na mabinasa su sabad kanu sapulu bad kanu badtug a siudad taman sa pitu ngibu a taw i matay. Na su mangasama a da matay na sangat a 'gkangagilekan. Na sabap sa entu na pugin nilan su Kadenan a lu sa sulega.
14 Na entu ba su ikadua a tiuba. Na aden pan pakatingguma a ikatelu a tiuba.
Su Ikapitu a Tambuli
15 Na guna su iniyup'u ikapitu a malaikat su tambuli nin na nakakineg aku sa manga matanug a suala a lu pakaganat sa sulega sa nia nilan pedtalun na
“Su kapendatu kanu dunia na nakatapenay den kanu Kadenan tanu a Mapulu enggu kanu Masih nin. Na sekanin i endatu taman sa taman!”
16 Na su duapulu enggu pat kataw a manga kalukesan a 'bpamagagayan kanu kulesi nilan lu kanu adapan nu Kadenan na sinemugiud silan ka sinimba nilan su Kadenan 17 sa nia nilan pedtalun na
“Hu Kadenan a Mapulu a Barakat sa Langun, sangat a pedsukul-sukul kami sa leka!
Seka su Kadenan iganat sa ganatan sampay saguna.
Ipenggulalan nengka den su dala idsan nin a kabarakat'engka
enggu su kapendatu nengka!
18 Na sangat a 'gkalipunget su manga taw a dikena 'bpamaginugut,
su lipunget'engka na nakatingguma den,
nia den ba su kutika a sugaten den sa kawagib su namamatay.
Na su manga nabi a panunugun nengka
enggu su langun nu taw a sinuti nengka a aden gilek'in sa leka
magidsan pan i balapantag enggu dikena balapantag a taw na balasan nengka den silan.
Na su manga mininasa menem kanu dunia na binasan nengka den silan.”
19 Daka inukan den su Suti a 'Bpagagaman lu sa sulega, na nailay ku lu su Kaun nu Kapasadan. Na guna su maitu na namedtalas su kilat, mibpapaleti, namelugung enggu lineminug taman sa minulan sa mangasela a benal a ilu.