Su Malaikat enggu su Manaut a Linulun a Sulat
10
Na guna maipus su entu na nakailay aku menem sa sakataw pan a mabagel a malaikat a pembaba ebpun sa sulega, na naputus'u gabun enggu aden buludtu a nakalibet kanu ulu nin. Su beneng'in na manabia ka pan i senang a pedsigay enggu su manga lisen nin na mana palaus a apuy. 2 Na aden 'bpagamin nin a manaut a linulun a sulat ugaid'a nabelat den. Na su kawanan a ay nin na lu nin inidampu kanu lagat enggu su biwang menem na lu kanu lupa. 3 Linemalis sekanin a mana katanug'a tagaw na alimaw. Na kanu kinalalis'in na midsasalengan lemugung su pitu timan a lugung. 4 Guna maipus su kinalugung na ipedsulat ku su ngin i nakineg ku kanu lugung a entu ugaid'a aden suala a ebpun sa sulega a nia nin pedtalun sa laki na “Di ka ipebpayag su nakineg'engka kanu pitu timan a entu a lugung enggu di ka den ipedsulat!”5 Daka su malaikat a nailay ku a dinemampu lu kanu lagat enggu lu kanu lupa na inikayang'in su kawanan a lima nin kanu sulega 6 enggu midsapa sekanin kanu kaisa-isa nin a da taman nin a minaden kanu langit enggu su langun nu nakadalem lun, kanu lupa enggu su langun nu nakadalem lun apeg den nu lagat enggu su langun nu nakadalem lun. Na nia inidsapa nu malaikat a entu na “Mangagan den makauma su kutika a 'bpagingapan nu! 7 Ka amaika yupen den nu ikapitu a malaikat su tambuli nin na nan den ba su kutika a tumanen den nu Kadenan su inipagena a kahanda nin a mana su inipayag'in kanu manga sinugu nin a nabi.”
8 Na guna maipus i entu na nakineg ku menem su suala a ebpun sa sulega sa nia nin pidtalu sa laki na “Kua ka su manaut a linulun a sulat a nabelat den lu kanu lima nu malaikat a entu a pedtindeg kanu lagat enggu kanu lupa.” 9 Daka inubay ku su malaikat a entu ka pinangeni ku lun su manaut a linulun a sulat. Na nia nin pidtalu na “Kua ka den a nia enggu isungit'engka, ka mamis man i nia sia kanu ngali nengka a mana su kamis'u teneb ugaid'a mapait a benal sia kanu tian nengka.” 10 Na kinua ku mambu su entu enggu kinan ku. Na benal a mamis a mana su kamis'u teneb ugaid'a guna ku den malamed na nagedam ku i sangat i kapait'in sia kanu tian ku. 11 Na pidtalu menem sa laki i “Dait a ipayag'engka menem su manggula nu manga maginged, manga bangsa, manga basa apeg den nu manga datu.”