9
Na guna su iniyup'u ikalima a malaikat su tambuli nin na nailay ku su isa a bitun a naulug sia sa dunia. Na inenggay lun su gunsi nu Kalut a Nangilem-kilem. 2 Guna nin 'bpagukai su Kalut a entu na linemiu i makapal a benal a bel tembu mindukilem su senang enggu su kawang-kawangan. 3 Daka nameliu su manga tapudi a lu ebpun kanu bel, na nakalapat silan kanu liwawaw na dunia enggu inenggan silan sa kawagib sa kapamungkaid a mana manga ulang. 4 Na pidtutuman silan sa di nilan binasan su manga utan, su manga kayu atawa ka apia ngin a pamumulan ka nia nilan bu pamungkaidanan na su manga taw a dala tiap'u Kadenan sia kanu bias'in. 5 Ugaid'a dala silan enggi sa kawagib sa kapangimatay kanu taw ka nia bu inenggay kanilan na kalasay nilan lun sa dalem'u lima ulan sa ukit a kabut'ilan lun a mana su kabut'u manga ulang. 6 Na kanu entu a timpu na 'bpapangilayn nu manga taw u panun i kapatay nilan, nia nilan 'gkalilinian na matay den silan ugaid'a di bun silan pebpatay.7 Nia kalagidan nu manga tapudi a entu na mana su buntal'u manga kuda a inadil sa kambunua. Na aden nakauntul kanu ulu nilan a mana sansangan a bulawan. Su beneng'ilan na mana beneng'a taw. 8 Su buk'ilan na mana buk'u babay enggu su ngipen nilan na mana ngipen na alimaw. 9 Na su manga laleb'ilan na nabausan na mana putaw a linala enggu su uni nu papak'ilan na makalagid sa sagedsel'u madakel a kuda enggu manga kalisa a pedseseleda sa kapembunua. 10 Na aden manga ikug'ilan a ibpanebek a mana bun ikug'u ulang, na entu ba i ibpelasay nilan kanu manga taw kanu dalem'u lima ulan. 11 Na aden datu nilan a pegkakataw kanilan. Na sekanin su pegkamal kanu Kalut a Nangilem-kilem. Nia ngala nu entu sa basa a Hibru na Abadun enggu Apuliuna sa basa a Grik.
12 Na entu ba su nauna a tiuba a nakauma kanu manusia ugaid'a aden pamun dua timan a pakatundug.
13 Daka guna menem su iniyup'u ikanem a malaikat su tambuli nin na nakakineg aku sa suala a ebpun kanu pat timan a sidung a lu kanu manga pisuk'u pegkurbanan a bulawan lu kanu adapan nu Kadenan. 14 Na nia menem pidtalu nu suala kanu ikanem a malaikat na “Butawani ka su pat kataw a malaikat a pinawik lu kanu masela a pulangi a Yupratis.” 15 Daka binutawanan mambu su pat kataw a entu a malaikat a inadil sa nauget den a timpu sa kanu nia ba a kutika, sa kanu nia ba a gay, ulan-ulan enggu lagun ka enggu nilan 'gkapangimatayan su ikatelu bad kanu manusia. 16 Na nakineg ku i nia kadakel'u sundalu nilan a migkukuda na dua gatus kamiliun. 17 Na inipaalung sa laki su palas'u manga kuda nilan apeg'u migkukuda lun. Na nia nilan palas na mimbabalegkas sa putaw a pakakelung kanu laleb'ilan. Na su suga nu kelung'ilan na maliga a mana apuy, malutu a bilu enggu binaning a mana sandawa. Na su ulu nu manga kuda na nia ku lun kalagidan na mana ulu na alimaw. Na 'bpeliuan na apuy enggu bel enggu sandawa su ngali nilan. 18 Daka naibped matay su sabad kanu telu bad kanu manusia sia sa liwawaw na dunia sabap kanu telu timan a entu a tiuba a mana su apuy, bel enggu sandawa a 'bpeliu kanu ngali nu manga kuda. 19 Na su ibpangimatay nu manga kuda a entu na lu pakabpun kanu manga ngali nilan enggu lu kanu manga ikug'ilan ka su manga ikug'ilan na mana nipay a 'bpanuka.
20 Na su nangasama kanu manusia a da matay sa entu na da nilan bun edtataubati su kapedsimba nilan kanu manga saitan enggu su kapedsimba nilan kanu pinangumbal'ilan a balahala a bulawan, pilak, galang, watu enggu kayu apia di pamakailay su entu, di pamakalakaw enggu di pamakakineg. 21 Na da nilan bun edtataubati su kinapamunu nilan, su kinapangalintaw nilan enggu su kinadsisina nilan taman den kanu kinapamanegkaw nilan.