Su Ikapitu a Tiap
8
Na guna su iniawa nu Manguda a Bili-bili su ikapitu den a tiap na kanu dalem'u tenga sa uras na dala 'gkakineg lu sa sulega. 2 Daka nailay ku su pitu kataw a manga malaikat a pedtindeg kanu adapan nu Kadenan enggu uman i isa kanilan na inenggan sa tambuli.3 Na aden bun sakataw a malaikat a nakauma a aden it'in a tudtugan a bulawan a midtindeg lu kanu adapan nu pegkurbanan. Na inenggan sekanin sa madakel a tutungen a mamut ka tinutung'in kanu pegkurbanan a bulawan lu kanu adapan nu Kulesi. Na iniamung'in su entu kanu manga pangeni-ngeni nu manga taw a sinuti. 4 Na su bel'u tutungen a mamut a pegkapetan nu malaikat na nakasabpet kanu adapan nu Kadenan a unut su manga pangeni-ngeni nu manga taw a sinuti. 5 Daka su tudtugan a bulawan na pinenu nu malaikat sa but'u apuy a ebpun kanu pegkurbanan ka initapuyak'in kanu dunia. Na guna su maitu na mibpapaleti, namelugung, namedtalas su kilat enggu lineminug.
Su Pitu Timan a Tambuli
6 Na su pitu kataw a entu a malaikat na adil den silan sa kayup'ilan kanu manga tambuli nilan.
7 Na guna su iniyup'u nauna a malaikat su tambuli nin na minulan sia sa dunia sa ilu enggu apuy a midsimbul sa lugu. Na natutung su sabad kanu telu bad kanu kalupan enggu su sabad kanu telu bad kanu manga kayu taman den kanu langun nu utan.
8 Na guna menem su iniyup'u ikadua a malaikat su tambuli nin na inidtug lu kanu lagat su manabia ka pan i palaw a pegkaleg. Na mimbaluy a lugu su sabad kanu telu bad kanu lagat, 9 na naibped minatay su sabad kanu telu bad kanu langun na balangiawa a natabu lu enggu naibped bun nabinasa su sabad kanu telu bad kanu manga kapal lu.
10 Na guna menem su iniyup'u ikatelu a malaikat su tambuli nin na naulug ebpun kanu langit su masela gaid a bitun a pegkaleg a mana den bulalakaw.a Na naulugan nin su sabad kanu telu bad kanu manga lawas'u ig enggu manga bualan. 11 Binedtuan su bitun a entu sa Patawali. Na migkapait su sabad kanu telu bad kanu ig. Na madakel i minatay sabap kanu kinainem'ilan kanu entu a ig a migkapait-pait.
12 Na guna menem su iniyup'u ikapat a malaikat su tambuli nin na nabinasa su sabad kanu telu bad kanu senang, kanu ulan-ulan enggu kanu manga bitun. Tembu migkalibuteng su sabad kanu telu bad kanu nagagabian taman sa da den 'gkalinawag su sabad kanu telu bad kanu nalalamagan.
13 Na guna maipus su entu na nakailay aku sa satiman a masela a papanuk a pendadalayug lu sa kawang-kawangan enggu inibpedan nin sa katanug su kabpelalis'in sa “Sangat i kapasang'in a tiuba su makatingguma kanu taw sia sa dunia amaika yupen den nu telu kataw pan a malaikat su manga tambuli nilan!”