Su Magatus enggu Patpulu enggu Pat Ngibu a Taw a Tiniapan
7
Na guna maipus i entu na aden nailay ku a pat kataw a malaikat a pedtindeg kanu pat a pisuk'u dunia. 'Bpagelenen nilan su sambel a pedsanggiup kanu pat a pisuk'u dunia ka enggu di makasanggiup kanu kalupan, kanu manga lagat taman kanu palakayu-kayuan. 2 Na aden bun nailay ku a sakataw a malaikat a pakauma a ganat sa sebangan a pedtatanggiten nin su ibpaniap'u Kaisa-isa nin a Kadenan. Na ibpananawag'in sa matanug kanu pat kataw a entu a malaikat a inenggan sa bagel sa kabinasa kanu kalupan taman kanu manga lagat i 3 “Di nu pan pembinasa su kalupan, su lagat enggu su palakayu-kayuan taman sa di tanu pan katiapan su langun na bias'u ulipen nu Kadenan.”4 Na su nakineg ku a natiapan na magatus enggu patpulu enggu pat ngibu i kadakel'in a ganat kanu langun nu katupuan nu manga taw a Israil. 5-8 Na nia kadakel'u natiapan a ebpun kanu tupu nu Yahuda na sapulu enggu dua ngibu, maitu bun ba i kadakel'u natiapan a ebpun kanu tupu ni Rubin, tupu ni Gad, tupu ni Asir enggu tupu ni Naptali. Na maitu bun ba, sapulu enggu dua ngibu bun i kadakel'u natiapan a ebpun kanu tupu ni Manasi, tupu ni Simiun, tupu ni Libi, tupu ni Isakar enggu tupu ni Sibulun, tupu ni Yusup taman den kanu tupu ni Buniamin.
Su manga Nakatigkel
9 Na guna maipus su entu na nakailay aku sa sakian-kian a manga taw a dala makagaga lun milang i kadakel'in. Na nakabpun i entu kanu langun nu bangsa, tribu, maginged enggu kanu langun nu basa. Na pedtindeg silan lu kanu kaadapan nu Kulesi enggu kanu Manguda a Bili-bili. Na linemambung silan sa maputi enggu pegkapet i uman i isa sa laun na libi. 10 Na ibpelalis'ilan sa matanug i “Su kalipuasan tanu na sia kanu Kadenan tanu a su 'bpagagayan kanu Kulesi enggu kanu Manguda a Bili-bili!” 11 Na su namedtindeg a manga malaikat a nakabalibet kanu Kulesi enggu su manga kalukesan apeg'u pat timan a binatang a makasabalang na sinemugiud silan kanu adapan nu Kulesi ka sinimba nilan su Kadenan 12 sa nia nilan pedtalun na “Amin!”
Pidtalu nilan bun i
“Hu Kadenan nami, sa leka man su kasigay, su pugi, su ilemu,
su kadsukul-sukul enggu su kabadtugan,
su kadatu enggu su kabagel.
Ka leka man su langun nu entu taman sa taman! Amin.”
13 Na isa kanu manga kalukesan i minidsa sa laki sa “Entain basi i namba a namelambung a nan sa maputi enggu endaw silan nakabpun?” 14 Na nia ku nakasumpat na “Hu mapulu, seka bun i mataw kanilan!” Na nia mambu pidtalu nu kalukesan na “Silan ba a nan su manga taw a nakalipuas enggu nakatigkel kanu mapasang a kinapamungkaid. Na sinuti nilan su manga lambung'ilan kanu lugu nu Manguda a Bili-bili. 15 Na namba i sabap'in a nan silan kanu adapan nu Kulesi nu Kadenan ka pedsimban nilan sekanin sa magabi sa malamag sia kanu Suti a 'Bpagagaman lu sa sulega. Na su 'bpagagayan kanu Kulesi i pegkelung kanilan. 16 ‘Di den silan temala sa gutem enggu di den silan kamalan. Di den silan maagag'a senang atawa ka apia ngin a mayaw.’a 17 Ka su Manguda a Bili-bili a lu kanu Kulesi i pedtuganul kanilan. ‘Tutulun nin silan kanu bualan nu ig a pakaenggay sa uyag-uyag a da taman nin.’b ‘Na punasan nu Kadenan su langun nu manga igis'u lu nu mata nilan.’c”