Su manga Tiap
6
Daka nailay ku su Manguda a Bili-bili a iniawa nin su muna-muna kanu pitu timan a tiap'u linulun. Na nakineg ku a midtalu su satiman kanu pat timan a binatang a makasabalang sa “Talus ka!” Na su suala nin na mana den lugung. 2 Daka aden nailay ku a maputi a kuda a su migkuda lun na aden busug'in enggu inenggan sekanin sa sansangan. Na ginemanat sekanin ka embunua enggu tabanan nin su apia entain a pakambunua nin.3 Na guna su iniawa menem'u Manguda a Bili-bili su ikadua a tiap na nakineg ku su ikadua a binatang a makasabalang a midtalu sa “Talus ka!” 4 Na mimbuat menem su satiman a kuda a maliga i bumbul'in. Na su migkuda lun na inenggan sa kampilan enggu kawagib sa kasamuk kanu kalilintad'u taw sia sa dunia ka enggu pebpapataya su manga taw.
5 Na guna su iniawa menem'u Manguda a Bili-bili su ikatelu a tiap'u linulun na nakineg ku menem a midtalu su ikatelu kanu binatang a makasabalang sa “Talus ka!” Nia ku menem nailay na kuda a maitem i bumbul'in a su migkuda lun na 'bpananggit sa timbangan. 6 Na aden nakineg ku a suala a mana ebpun kanu pat timan a entu a binatang a midtalu sa “Su kagagabian a sukay nu taw na nia nin bu makua na alaga nu tenga sa supa a bantad atawa ka isa enggu tenga sa supa a bantad a barli. Ugaid'a di ka mapagkapulu su lana na ulibus enggu su ig'a ubas.”
7 Na guna su iniawa den nu Manguda a Bili-bili su ikapat a tiap'u linulun a entu na nakineg ku i midtalu su ikapat a binatang a makasabalang sa “Talus ka!” 8 Nia ku menem nailay na su kuda a magaw i bumbul'in. Nia lun migkuda na bedtuan sa Kapatay a pedtundug-tundugen nu Dalepa nu Namamatay. Na inenggan silan sa bagel sa kapamunu kanu manga taw sa kanu sabad kanu pat bad kanu dunia sa ukit a matalem, kanggutem, kadsakit enggu kapangimatay nu manga mawalaw a binatang.
9 Na guna su iniawa nu Manguda a Bili-bili su ikalima a tiap'u linulun a entu na nailay ku lu kanu atag'u pegkurbanan su ngiawa nu manga taw a nasabil sabap kanu kabpaginugut'ilan kanu kadtalu nu Kadenan taman kanu kapedsaksi nilan lun. 10 Na ibpelalis'ilan sa matanug i “Hu Kadenan a Mapulu a Suti enggu Bantang! Kanu pan i kasiksa nengka kanu manga taw sa dunia a minimatay sa lekami asal'a makasuli kanu kinapatuga nilan kanu lugu nami?” 11 Na uman i isa sa kanilan na inenggan sa maputi a lambung enggu pidtalu kanilan i mangingapa pan silan sa paidu ka mangagan den pangimatayan nu taw su manga suled'ilan sa paginugut a kaped'ilan a manga ulipen nu Kadenan a makatalutup kanu bilangan nilan.
12 Na guna su iniawa nu Manguda a Bili-bili su ikanem a tiap'u linulun na lineminug sa mabagel. Na mindukilem su senang ka pidsan nengka sudsaken su mata. Maitu bun su ulan-ulan na migkaliga sa mana den lugu i kinagkaliga nin. 13 Su manga bitun sa kawang-kawangan na nangaulug a mana su unga na kayu a igus a 'gkangaulug amaika 'gkasugat'a mabagel a sambel. 14 Na nakatekaw demun nalekat su langit a manabia ka pan i kaletas a nalulun enggu su langun nu manga palaw apeg'u manga punul na naawa kanu nabetadan nilan. 15 Saleta mambu na su manga sultan kanu dunia enggu su manga balapantag a taw, su 'gkangaunutan nu manga sundalu, su manga kawasa, su manga mabagel taman den kanu langun nu manga taw a magidsan pan i ulipen enggu dikena ulipen na namagena den silan lu kanu manga takub enggu lu kanu manga lingkab'u lakungan nu manga palaw. 16 Nia nilan ibpelalis kanu manga palaw taman kanu manga lakungan na “Tambaki kami nu den ka enggu nami 'gkapagenan su 'bpagagayan lu kanu Kulesi enggu malipuas kami kanu lipunget'u Manguda a Bili-bili. 17 Ka nauma den ba a nia su gay a ipagedam den su lipunget'ilan kanu manga taw sia sa dunia. Na apia sakataw na dala makagaga lun i kapasang'in.”