Su Tiniapan a Linulun a Sulat
5
Daka nakailay aku lu kanu kawanan a lima nu 'bpagagayan kanu Kulesi sa linulun a sinulatan kanu duakambala enggu tiniapan sa pitu timan asal'a di kaukan. 2 Na nakailay aku bun sa mabagel a malaikat a 'bpananawag sa “Entain basi i wagib a makaawa kanu manga tiap'u linulun a nia asal'a mabungkal?” 3 Na dala isa bu a pakabungkal lun atawa ka pakailay kanu nakadalem lun magidsan i lu sa sulega atawa ka sia sa liwawaw na dunia taman den sia kanu didalem'u lupa. 4 Na sabap sa da den wagib a pakabungkal kanu linulun a entu atawa ka pakailay kanu nakadalem lun na sangat a nakapaguguliang aku. 5 Daka isa kanu manga kalukesan a entu i midtalu sa laki sa “Da ka 'bpaguguliang. Ilay ka, nanaban den su Alimawa a muliataw nu Nabi Daud a tupu nu Yahuda. Na mapakay den a maawa nin su pitu timan a tiap'u linulun ka bungkalen nin.”6 Na nakailay aku sa inigkurbanb a Manguda a Bili-bili a pedtindeg kanu pageletan nu Kulesi enggu kanu manga makasabalang a binatang enggu kanu manga kalukesan. Na aden pitu timan a sidung'in enggu aden pitu timan a mata nin. Na su pitu timan a mata, na entu ba su pitu kataw a malaikat'u Kadenan a nakapayapat sia sa liwawaw nu dunia. 7 Na minubay su Manguda a Bili-bili kanu Kulesi ka kinua nin su linulun a entu lu kanu kawanan a lima nu 'bpagagayan kanu Kulesi. 8 Na endaw i kinakua nin lun na sinemugiud sa lekanin su pat timan a binatang a makasabalang enggu su duapulu enggu pat a manga kalukesan. Na uman i isa kanilan na aden palabuni-bunian nin a kutiapi. Na aden bun pegkapetan nilan a manga tudtugan a bulawan a napenu na mamut a tutungen a entu ba su manga pangeni-ngeni nu manga taw a sinuti. 9 Na pedsengal silan sa bagu a sengal a
“Wagib i seka i nakakua kanu linulun
enggu makaawa kanu manga tiap'in!
Ka seka i inigkurban, na sia nakanggulalan kanu lugu nengka na natebus'engka su manga taw nu Kadenan
a ebpun kanu uman i manga tribu, basa, maginged enggu manga bangsa.
10 Na binaluy nengka silan a isa a pendatuan enggu 'bpamangurban kanu Kadenan.
Na endatu silan kanu dunia.”
11 Na tinemingada aku menem na nakakineg aku sa suala nu ngibu-ngibuan a manga malaikat. Na nakabalibet silan lu kanu Kulesi, lu kanu manga binatang a makasabalang enggu kanu manga kalukesan. 12 Na pedsengal silan sa matanug sa
“Nakadait man kanu Manguda a Bili-bili a inigkurban
su kadatu enggu su kakawasan,
su ilemu enggu su kabagel, su kabadtugan enggu su pugi taman kanu kasigay.”
13 Daka nakineg ku su langun nu linimbag'u Kadenan a lu sa sulega, kanu liwawaw na dunia, kanu didalem'u lupa enggu kanu pused'u lagat taman kanu langun pan na nakadalem lun a pedsengal sa
“Hu Sekanin a 'bpagagayan kanu Kulesi enggu Sekanin a Manguda a Bili-bili,
sa lekanu su kasigay enggu su kabadtugan, su kapugi enggu su kadatu taman sa taman.”
14 Na su pat timan a binatang a makasabalang na midtalu sa “Amin.” Na su manga kalukesan menem na sinemugiud ka sinemimba silan.