Su Kulesi
4
Na guna maipus su entu na aden nailay ku lu sa sulega a bengawan a naukan. Na nakineg ku menem su nauna a suala a mana katanug'u tambuli sa nia nin pedtalun na “'Bpapulu ka sia ka ipailay ku sa leka su ngin i dait a manggula u maipus su nia.” 2 Daka midsambuta demun i kinalangkap'u Suti a Ruh sa laki enggu nailay ku su Kulesi a aden 'bpagagayan lun. 3 Nia palas'u 'bpagagayan lun na manabia ka pan i mana katinang'u palamata a yaspir enggu rubi. Na su Kulesi menem na nabalibet'a buludtu a mana katinang'u imirald. 4 Na nakabalibet bun kanu Kulesi su duapulu enggu pat a kulesi a nia 'bpagagayan lun na su duapulu enggu pat kataw a manga kalukesan a nakalambung sa maputi enggu nakadsansangan sa bulawan. 5 Iganat kanu Kulesi a entu na 'bpamedtalas su kilat, paleti enggu manga lugung. Na sia kanu adapan nu Kulesi na aden pitu timan a sulu a pegkaleg. Na entu ba su pitu kataw a malaikat'u Kadenan. 6 Na sia kanu adapan nu Kulesi na aden bun mana lagat a mana katia i kalingaw nin. Na aden pat timan a makasabalang a manga binatang a nabausan na manga mata a nakatuki kanu pat timan a ligid'u Kulesi. 7 Na su ika-isa a binatang na palas'a alimaw, su ikadua na palas'a sapi, su ikatelu menem na mana buntal'a taw enggu su ikapat na palas'a 'bpelayug a masela a papanuk. 8 Na uman i satiman kanu manga binatang a entu na aden nem timan a papak'in. Na nabausan nu manga mata su manga lawas'ilan. Na magabi sa malamag na da den pinda na kapebpugi nilan sa nia nilan ipedsengal na“Suti, Suti, Suti su Kadenan a Mapulu a Barakat sa Langun!
Sekanin su Kadenan iganat sa ganatan taman sa taman!”
9 Na gagalu nu kapedsesengal'u manga binatang a entu sa kapebpugi nilan, kabpanginsukulen nilan enggu su kapembadtug'ilan kanu 'bpagagayan a entu kanu Kulesi a bibiag taman sa taman 10 na su duapulu enggu pat kataw a manga kalukesan na pedsugiud kanu adapan nu 'bpagagayan kanu Kulesi ka pedsimban nilan su sekanin a entu a 'bpaguyag-uyag taman sa taman. Na ipebpalad'ilan su manga sansangan nilan a bulawan lu kanu adapan nin sa nia nilan ipedsengal na
11 “Hu Kadenan nami enggu Mapulu nami, na nakadait a benal sa leka su kapugi, su kabadtugan enggu su kadatu.
Ka seka man i nangaden kanu langun-langun.
Seka i migkahanda sa kinapangaden kanu langun nu entu taman sa napangaden su entu enggu nakapaguyag-uyag.”