Su Ikalima a Sulat
3
“Na isulat'engka kanu malaikat a pedsaligan kanu umpungan nu 'bpamaginugut sa Sardis i ‘Nia ba su katigan nu aden kamal'in kanu pitu kataw a malaikat'u Kadenan enggu pegkapet kanu pitu timan a bitun. Na katawan ku su penggalebeken nu san enggu katawan ku bun i nia itungan nu manga taw makapantag sa lekanu na timbang a natalima nu den su uyag-uyag a da taman nin. Ugaid'a nia nin man kabantang na timbang a minatay kanu den. 2 Imaman kanu! Embageli nu su ngin i nasama sa lekanu ka enggu di maibped madadag. Kagina nailay ku i su galebekan nu na di pamun pakatalutup kanu adapan nu Kadenan ku. 3 Nia nu 'gkakalendem na su ngin i natalima nu den enggu nakineg'u ka entu ba i paginuguti nu taman sa edtataubat kanu. Ka amaika di kanu mimaman na seman aku a mana tanegkawn a di nu katawan u ngin a kutika i kauma ku san. 4 Na apia ka maitu na aden pamun san sa lekanu sa Sardis i da pamun kabudsengi su balegkas'in. Na lemalakaw silan a kaped ku a nakambalegkas sa maputi ka nakadait man kanilan i munut sa laki. 5 Na apia entain i manaban na embalegkasan sa maputi enggu di ku punasen su ngala nin lu kanu libelu a sinulatan kanu mamakatalima kanu uyag-uyag a da taman nin. Na sia kanu adapan nu Ama ku a su Kadenan enggu kanu manga malaikat'in na ipayag ku i saben-sabenal a nalusud sekanin sa laki.6 “ ‘Na apia entain i aden tangila nin a pakakineg na makikineg kanu pedtalun nu Suti a Ruh kanu manga umpungan nu 'bpamaginugut.’ ”
Su Ikanem a Sulat
7 “Na isulat'engka kanu malaikat a pedsaligan kanu umpungan nu 'bpamaginugut sa Piladilpia i ‘Nia ba su katigan nu sekanin a entu a Suti enggu Bantang. Na sekanin i pegkakataw kanu gunsi nu pendatuan a inibpasad kanu Nabi Daud. Na amaika ukan nin su entu na dala makapamintu lun enggu amaika menem ka pamintuan nin na dala makagaga lun muka.a 8 Na katawan ku su penggalebeken nu san. Ilay nu! Inukan ku sekanu sa pintu a da makagaga lun mamintu. Na 'gkatawan ku i dikena kanu gaid mabagel ugaid'a apia ka maitu na initagu nu sa ginawa su kangadtalu ku taman sa da aku nu ikias. 9 Na ilay nu! Su manga taw a pedtalu sa Yahudi silan inunta na budtuden silan ka luyud silan kanu umpungan nu Datu na Giadsal na pasugiuden ku kanu palad'u ay nu. Na lu nilan ba katawan i pinadtaya ku sekanu. 10 Na sabap sa pinaginugutan nu su kasuguan ku a temigkel kanu na pangelungan ku sekanu kanu makatingguma a bataluan sa dunia a matalu kanu langun nu taw. 11 Na mangagan aku den makatingguma san. Na nia nu papanalus na u ngin i natuntayan nu sia sa laki ka enggu di maagaw sa lekanu su balas'u. 12 Na u entain i manaban na umbalen ku a palaus'u Suti a 'Bpagagaman kanu Kadenan ku. Na di den sekanin maawa lu taman sa taman. Itiap ku lun su ingala nu Kadenan enggu su ingala nu pendatuan nin a mana su bagu a Awrusalim a 'bpangalimbaba ebpun sa sulega a ganat kanu Kadenan. Itiap ku bun sa lekanin su bagu a ngala ku.
13 “ ‘Na apia entain i aden tangila nin a pakakineg na makikineg kanu pedtalun nu Suti a Ruh kanu manga umpungan nu 'bpamaginugut.’ ”
Su Ikapitu a Sulat
14 “Na isulat'engka kanu malaikat a pedsaligan kanu umpungan nu 'bpamaginugut sa Laudisia i ‘Nia ba su katigan nu bedtuan sa pakatuman a su matidtu enggu tidtu a saksi a nabpunan nu langun nu pinangaden nu Kadenan. 15 Na katawan ku su penggalebeken nu san a dikena menem matenggaw enggu dikena menem mayaw. Na nia tinemu i matenggaw kanu atawa ka mayaw. 16 Kagina sabap sa dikena kanu matenggaw enggu dikena kanu menem mayaw na itubpa ku sekanu! 17 Na nia nu pan pedtalun kanu ginawa nu na “Kawasa aku, madakel i nakua ku a kaaden, da den nasisita ku.” Ugaid'a nia nin kabantang na duan-duan nu den, pakalat kanu sa nanam, miskinan, pisek enggu nakagkawas-kawas kanu. 18 Tembu nia ku madtalu sa lekanu na pamasa kanu sia sa laki sa bulawan a sinayaban sa apuy ka enggu kanu pegkawasa. Maitu bun pamasa kanu sa laki sa maputi a lambung a makasapeng'u kanu pakayaya a kinagkawas-kawas'u. Pamasa kanu bun sa laki sa makagamut sa mata nu ka enggu kanu makailay.
19 “ ‘Na edtaluan ku man sa kapatidtu ku lun su apia entain a pinadtaya ku. Tembu ba itagu nu sa ginawa su entu taman sa edtataubat kanu. 20 Ilay nu! Nia aku den pedtindeg kanu liu nu pintuan nu a pedsalam sa lekanu. Na apia entain i makakineg kanu suala ku taman sa ukan aku nin na lemudep aku enggu makapagatuang kami keman. 21 Na apia entain i manaban na paayanen ku kanu tapid ku kanu kulesi ku a mana bun su kinapanaban ku enggu kinapagagayan ku kanu tapid'u Ama ku lu sa kulesi nin.
22 “ ‘Na apia entain i aden tangila nin a pakakineg na makikineg kanu pedtalun nu Suti a Ruh kanu manga umpungan nu 'bpamaginugut.’ ”