Su Ika-isa a Sulat
2
“Na isulat'engka kanu malaikat a pedsaligan kanu umpungan nu 'bpamaginugut sa Ipisu i ‘Nia ba su katigan nu pegkapet kanu pitu timan a bitun kanu kawanan a lima nin a 'bpelakaw kanu luk'u pitu timan a 'bpanaguan sa palitan a bulawan. 2 Katawan ku su manga penggalebeken nu apeg'u kabpaginapas'u enggu su kapedtigkel'u. Katawan ku bun i pedsapalan nu su manga taw a penggula sa mawag. Na inipaamad'u su 'bpamagigiling sa manga sinugu nu Isa al-Masih taman sa natuntayan nu i dikena silan tidtu a sinugu. 3 Katawan ku i midsabal kanu, enggu katawan ku bun i sabap kanu paginugut'u sa laki i kapedtigkel'u kanu kamalasayan taman sa dala kanu a benal sangkup. 4 Ugaid'a nia ku makadaway sa lekanu na mana migkalubay su kapegkalimu nu ka dikena den mana kanu paganay. 5 Na 'gkakalendem'u su mabagel a kapegkalimu nu sa laki paganay. Na makin edtaubat kanu ka embalingani nu su galebek'u paganay ka amaika di kanu edtaubat na seman aku ka iawa ku su 'bpanaguan sa palitan kanu nabetadan nin. 6 Ugaid'a nia ku mapamedta sa lekanu na 'gkabensian nu su galebek'u manga Nikulaita, na maitu aku bun 'gkabensian ku bun su entu. 7 Na apia entain i aden tangila nin a pakakineg na makikineg kanu pedtalun nu Suti a Ruh kanu manga umpungan nu 'bpamaginugut enggu apia entain i manaban na inggay ku lun su kawagib sa makakan kanu unga nu kayu a pakaenggay sa uyag-uyag a da taman nin a lu kanu pamumulanan nu Kadenan.’Su Ikadua a Sulat
8 “Na isulat'engka kanu malaikat a pedsaligan kanu umpungan nu 'bpamaginugut sa Ismirna i ‘Nia ba su katigan nu sekanin a Punan-punan enggu su Kapupusan, su isa a minatay enggu mimbibiag 'bpaluman. 9 Katawan ku su kapegkapasang sa lekanu enggu su kamiskin nu apia nia nin kabantang i kawasa kanu sia kanu adapan nu Kadenan. Katawan ku bun su kapendalat sa lekanu nu manga taw a pedtalu sa Yahudi silan inunta na luyud silan kanu umpungan nu Datu na Giadsal. 10 Da kanu magilek kanu manga kamalasayan a mangagan nu den matala. 'Gkatalatantu ku i aden sa lekanu i ipabilanggu nu Datu na Giadsal asal'a matepeng kanu, na malasay kanu sa dalem'u sapulu gay. Ugaid'a embageli nu su salig'u taman sa kapatay ka balasan ku sekanu sa uyag-uyag a da taman nin. 11 Na apia entain i aden tangila nin a pakakineg na makikineg kanu pedtalun nu Suti a Ruh kanu manga umpungan nu 'bpamaginugut. Na apia entain i manaban na di den temala sa kanarakan, na entu ba su ikadua a kapatay.’
Su Ikatelu a Sulat
12 “Na isulat'engka kanu malaikat a pedsaligan kanu umpungan nu 'bpamaginugut sa Pirgamu i ‘Nia ba su katigan nu aden magalang a benal a sundang'in a dua embala i galangan nin. 13 Katawan ku i endaw kanu pegkakaleben, ka lu kanu pendatuan nu Datu na Giadsal. Pidsan ka maitu na da kanu pitas sa laki ka da nu ikias su salig'u sa laki apia kanu kinaimatay kani Antipas a matidtu a pedsaksi sa laki san kanu pendalepan nu a pendatuan nu Datu na Giadsal.
14 “ ‘Ugaid'a aden bun pakadaway ku sa lekanu. Aden san sa lekanu i di pamun pebpitas kanu manga panduan ni Balaam.a Sekanin i namandu kani Balak sa kasasat kanu tupu nu Israil asal'a makakan silan kanu pegken a iniapal kanu manga balahala enggu makadsisina silan. 15 Na aden pamun san sa lekanu i di pamun pebpitas kanu panduan nu manga Nikulaita. 16 Edtataubat kanu! Ka amaika dili na seman aku mangagan ka imbunua ku sekanu kanu sundang'u ngali ku.
17 “ ‘Na apia entain i aden tangila nin a pakakineg na makikineg kanu pedtalun nu Suti a Ruh kanu manga umpungan nu 'bpamaginugut enggu apia entain i manaban na inggay ku lun su kauyagan a inipagena a bedtuan sa manna. Na enggan ku bun su uman i isa kanilan sa watu a maputi a sinulatan sa bagu a ngala a da salakaw a makataw lun nia tabia na su makatalima lun.’ ”
Su Ikapat a Sulat
18 “Na isulat'engka kanu malaikat a pedsaligan kanu umpungan nu 'bpamaginugut sa Tiatira i ‘Nia ba i katigan nu Tunggal'u Kadenan a su mata nin na manabia ka pan i apuy a pegkaleg enggu su ay nin na mana galang a pedtinang. 19 Katawan ku su manga pinggalebek'u, su kakalimu nu, su salig'u, su kinapananabangan nu enggu su katigkel'u. Katawan ku bun i su galebek'u saguna na lawan pan kanu galebek'u paganay. 20 Ugaid'a nia ku ipendaway sa lekanu na pedsugutan nu su babay a nan a si Yisibil a 'bpenabi-nabi. Sabap kanu manga panduan nin na nakapasibay nin su manga panunugun ku sa enggalebek silan sa kadsisina enggu keman kanu pegken a iniapal kanu manga balahala. 21 Na inenggan ku sekanin sa timpu a kadtaubat kanu kinadsina nin ugaid'a da bun sekanin embagu. 22 Itagu nu sa ginawa i nia ba, ideket ku sekanin sa ikam enggu su langun na kaped'in sa kapedsina na temala silan sa tidtu-tidtu a kamalasayan amaika di den silan edtataubat. 23 Imatayan ku pan su 'bpamangunut kanu manga panduan nin ka enggu 'gkatuntayan nu langun nu manga umpungan nu 'bpamaginugut i saki ba i pakailay kanu manga itungan enggu atay nu manga taw. Na inggay ku kanu uman i isa su ngin i dait kanu pinggalebek'in.
24 “ ‘Ugaid'a su manga ped a taw sa Tiatira a dala paginugut kanu inipamandu ni Yisibil enggu dala paganad kanu nadtalu a madidalem a panduan nu Datu na Giadsal na nia ku madtalu sa lekanu na di ku den umanan su manga pakaugat sa lekanu a kasuguan. 25 Nia nu bu papanalus taman sa kauma ku na u ngin i natuntayan nu sia sa laki. 26-28 Na apia entain i manaban enggu penggulalan kanu kahanda ku taman sa kapupus'u dunia na inggay ku lun su kakamal kanu manga bangsa a mana su kinaenggay nu Ama sa laki kanu entu. Makakamal silan sa mabagel a mana su aden tungked'in a putaw a ibpamelupet a manabia ka pan sa 'gkalupet a binangga.b Nia inggay kanu manaban a entu na su bitun a pedsebang kanu 'gkatibuas.c
29 “ ‘Na apia entain i aden tangila nin a pakakineg na makikineg kanu pedtalun nu Suti a Ruh kanu manga umpungan nu 'bpamaginugut.’ ”