Su Inipayag
Su Inipayag
1
Nia ba su inipayag'u Isa al-Masih a inisampay lun nu Kadenan ka enggu nin makapayag kanu manga panunugun nin su manganggula a mangagan den makatingguma. Na inipayag'u Isa al-Masih su entu kanu panunugun nin a si Yuhan sia nakanggulalan kanu malaikat'in 2 enggu nakapangimbenal menem'i Yuhan su kadtalu a entu nu Kadenan a su inipayag'u Isa al-Masih a bantang taman den kanu langun pan nu nailay nin. 3 Na mapia den a benal kanu manga taw a matia enggu makikineg taman sa itagu nilan sa ginawa su manga kadtalu nu Kadenan a inipayag'in kanu nia a kitab ka mangagan den a benal i nia makatingguma.Su Salam
4 Salam sa lekanu, saki si Yuhan, su nia a sulat na san pakatumpa kanu pitu timan a umpungan nu 'bpamaginugut sa prubinsia a Asia.
San sa lekanu su da idsan nin a limu enggu kalilintad a ebpun kanu Kadenan a su Kadenan a iganat sa ganatan taman sa taman enggu kanu pitu kataw a malaikat a lu kanu kaadapan nu kulesi nin 5 enggu kanu Isa al-Masih a matidtu a saksi a muna-muna a mimbibiag 'bpaluman enggu datu nu langun nu manga datu sia sa dunia.
Na su sekanin a sangat a pegkalimu sa lekitanu enggu tinemebus sa lekitanu kanu kabaladusan a nangungulipen sa lekitanu sia nakanggulalan kanu kinaigis'u lugu nin 6 taman sa binaluy tanu nin a pendatuan nin enggu 'bpamangurban kanu Kadenan a Ama nin bun na sa lekanin su pugi enggu kapendatu taman sa taman. Amin.
7 Ilay nu! Pakauma sekanin a makasaleta kanu gabun sa kawang-kawangan.a
Na edsulimanen sekanin nu langun nu taw
apeg den nu manga sinemagkal lun.
Na su langun nu bangsa kanu pat a pisuk'u dunia na makapaguguliang sa kailay nilan sa lekanin.b
Na manggula su entu. Amin!
8 Na nia pedtalun nu Kadenan a Mapulu na “Saki su Punan-punan enggu su Kapupusan. Saki su Kadenan iganat sa ganatan taman sa taman. Saki su Barakat sa Langun.”
Su Nakalagid sa Kaka nu Manusia
9 Na saki a si Yuhan na suled'u sa paginugut a kaped'u sia kanu kamalasayan, kapedtigkel enggu kapendatu sia kanu Isa al-Masih. Na inidtug aku kanu nia a punul a bedtuan sa Patmus sabap kanu kabpangusiat ku kanu kadtalu nu Kadenan enggu su kapedsaksi ku pantag kanu Isa al-Masih. 10 Na kanu gay a kapedsimba kanu Mapulu na linemangkap sa laki su Suti a Ruh. Na aden nakineg ku a matanug a suala sia kanu taligkudan ku a mana katanug'a uni na tambuli 11 sa nia nin pedtalun na “Isulat'engka kanu linulun a pedsulatan su ngin i mailay nengka ka ipapait'engka lu kanu pitu timan a umpungan nu 'bpamaginugut sa dalepa a Ipisu, Ismirna, Pirgamu, Tiatira, Sardis, Piladilpia enggu Laudisia.”
12 Na linemengi aku ka enggu ku mailay su pedtalu a entu. Na nailay ku i pitu timan a 'bpanaguan sa palitan a bulawan. 13 Na lu kanu luk'in na aden nakatindeg a nia ku lun kalagidan na su Kaka nu Manusia. Na linemambung sa aden ambilut'in a bulawan sia sa laleb. 14 Na su buk'in na maputi a mana kaputi na gapas. Na su mata nin na manabia ka pan i apuy a pegkaleg. 15 Na su manga ay nin na mana galang a pedtinang a sinayaban sa apuy. Na su suala nin menem na mana dagus'a ig. 16 Na sia kanu kawanan a lima nin na pegkapet sa pitu timan a bitun. Na sia kanu ngali nin na linemiu su magalang a benal a sundang a dua embala i galangan nin enggu su beneng'in na pakaipeng a mana kalinawag'u maudtu a senang.
17 Na endaw i kinailay ku lun na mana su naawan aku na makatu taman sa nalunguk aku den lu kanu adapan nin ugaid'a inami aku nin kanu kawanan a lima nin sa nia nin pidtalu na “Da ka 'gkagilek! Saki su Punan-punan enggu su Kapupusan 18 a su bibiag taman sa taman! Minatay aku den ugaid'a saguna na ilay ka, ka bibiag aku taman sa taman! Saki den i pegkakataw kanu gunsi nu kapatay enggu su dalepa nu namamatay.
19 “Tembu isulat'engka su ngin i 'gkailay nengka, su 'gkanganggula saguna enggu su manganggula pan. 20 Na nia maena nu pitu timan a bitun a nailay nengka kanu kawanan a lima ku na su pitu kataw a manga malaikat a sinaligan kanu pitu timan a umpungan nu 'bpamaginugut. Su pitu timan menem a 'bpanaguan sa palitan a bulawan na su pitu timan a umpungan nu 'bpamaginugut.”