Su Inipayag
Bismillah Hir-Rahman Nir-Raheem
Assalamu Alaikum Warahmatullahi Ta'ala Wabarakatuh
Su nia a kitab na inisulat'i Yuhan a isa kanu sapulu enggu dua a pinamili nu Isa al-Masih. Na nia nakadalem kanu nia a kitab na su manga inipaalung'u Kadenan kani Yuhan a manggula sia kanu mangauli den a timpu. Inipaalung sa lekanin su ukit a kabangkit kanu dunia. Na madakel i mamakasabalang a manganggula kanu entu ba a timpu. Na amaika mauma den su entu na su 'bpamaginugut kanu Kadenan na katuntayan nilan sa mapia su entu enggu di silan kangagilekan. Ugaid'a su dikena menem 'bpamaginugut kanu Kadenan na di nilan katuntayan su entu enggu sangat a mangagaip silan taman sa kemegkel silan na gilek.
Inisulat su nia kanu timpu a kapapegkapasang kanu manga taw a 'bpamaginugut kanu Isa al-Masih. Nia kahanda sa kinasulat sa nia na asal'a 'gkabagel su manggiginawa enggu kaadenan na inam su manga taw a papegkapasangan atawa ka 'bpamungkaidanan sabap kanu salig'ilan kanu Isa al-Masih a nabaluy a Mapulu nilan.
Na pinasabutan bun kanu nia a kitab i sia makanggulalan kanu Mapulu a su Isa al-Masih na talawn nu Kadenan su kuntela nin a su Datu nu Giadsal enggu su manga ulayat'in. Na su manga taw a pedsalig kanu Kadenan a nabaluy a manga wata nin na balasan nin silan sa bagu a dunia a suti a sekanin i pendatu lun.