Sulat'i Yahuda
Su Salam
1
Salam sa lekanu. Saki si Yahuda a ulipen nu Isa al-Masih a tebped sa pused'u Yakub.Su nia a sulat na san pakatumpa sa lekanu a pinamili nu Ama tanu a su Kadenana sa kapaginugut a ipegkalimu nin enggu 'bpananalus su salig'u sia makanggulalan kanu Isa al-Masih. 2 Mamelapay san sa lekanu su limu nu Kadenan, su lat a nanam'in enggu su kalilintad'in.
Su Kukuman kanu 'Bpamamandu sa di Pakatidtu
3 Manga lusud ku sa tian a papedtayan, 'gkalilinian ku man a benal sekanu pedsulat pantag kanu kalipuasan a natalima tanu. Ugaid'a nailay ku i mana nia nasisita a isulat ku sa lekanu saguna na su kasundul ku sa lekanu sa kapaninindeg'u kanu salig a inisalig'u Kadenan sa lekitanu a 'bpamaginugut asal'a di mabagu su entu. 4 Kagina aden san manga taw a dala gilek'in kanu Kadenan a nakasimbul sa lekanu sa da nu kasipati. Na nia nilan ibpamamandu na sabap kun kanu da idsan nin a limu nu Kadenan a natalima tanu na inisugut tanu i kanggula tanu sa kamustakilan a kiug'a ginawa. Na pakakias'ilan su kaisa-isa nin a pegkakataw sa lekitanu a su Mapulu tanu a su Isa al-Masih. Na su entu ba a manga taw na nauget den naadil i kasiksa kanilan a mana bun su nakadalem sia kanu kitab.
5 Na apia katawan nu den su nia na nia ku kalilinian na makapatadem ku pamun sa lekanu su kinapalipuas'u Mapulu kanu manga taw a Israil kanu kinapangungulipen kanilan nu manga taw a Egypt ugaid'a ulian nu entu na bininasa nin bun su langun nu dala pamaginugut. 6 Na ipagkalendem ku bun sa lekanu su manga malaikat a da nilan enggalebeka su galebekan a inisalig kanilan kanu nasakupan nilan ka makin nilan tinagak su entu. Tembu inidtug'in silan kanu kalut a nangilem-kilem i kalibuteng'in a sinangkalian sa dala makagaga lun mawa taman kanu kakukum'u Kadenan kanilan sa kanu gay a dala pagidsan nin i kabalapantag'in. 7 Na maitu bun ba su siudad a Sudum enggu Gumura taman den kanu embala-bala lun a siudad a midsisina bun mamikal i manga taw nin ka apia su pagidsan nilan na pigkakaluma nilan bun. Na siniksa silan nu Kadenan kanu dala kapegkapupus'in a 'bpangalaw-kalaw a apuy. Na upaman su manga entu a inipailay kanu manga taw.
8 Na maitu bun ba su manga taw a nan a sabap kanu taginepen nilan a pakapasibay kanilan na 'gkanggiabuan nilan su ginawa nilan, ipegkias'ilan su apia entain a pegkamal kanilan enggu 'bpanila-tilan nilan su manga barakat a inaden kanu kawang-kawangan. 9 Inunta na apia su 'gkaunutan nu manga malaikat a su Mikail na da nin panila-tilai su Saitan sa kanu kinadtapalawana nin lun pantag kanu bangkay nu Musa ka nia nin lun bu pidtalu na “Su Mapulu bu i mataw sa leka demaway!”
10 Ugaid'a su nia a manga taw na 'bpanila-tilan nilan su apia dala sabut'ilan lun. Mana silan binatang a dala itungan nin a nia nilan 'bpagunutan na u ngin i sia kanu ginawa nilan. Ugaid'a entu bun ba mambu i makabinasa kanilan. 11 Na duan-duan nilan den! Kagina nia nilan inilingan na su pinggula ni Kabil.b Nalinian nilan a benal miling su pinggula ni Balaam a kalimbanan asal bu na makapantiali.c Maitu bun ba, inilingan nilan bun si Kura a sinemungkang tembu siksan silan a mana bun su kinasiksa kani Kura.d 12 Na uman silan 'bpagamung pegkan kanu kapendidilimudan nu na mana silan budseng sa lekanu, naawan den silan na kaya enggu gilek, nia nilan bu 'bpagitungen na ginawa nilan. Nia nilan kalagidan na gabun a pakasedseg'u sambel a dala 'gkadtatanggit'in a ulan atawa ka mana silan kayu a di 'bpagunga apia timpu na kabpagunga na kayu. Mana silan kayu a binadtud taman sa minatay den a benal. 13 Mana bun su bagel sa lagat a pedtubpa sa maledsik kanu dedsan na maitu bun ba su uyag-uyag'ilan a napenu na pakayaya a galebek. Nia nilan kalagidan na manga bitun a tadin. Na inidtatalama den man nu Kadenan kanilan su kalut a nangilem-kilem i kalibuteng'in taman sa lu den ba silan taman sa taman.
14 Na su Nabi Inuk a ikapitu a tupu iganat kanu Adam na naalung'in bun su makapantag kanu entu a manga taw sa nia nin kadtalu na “Ilay nu, makauma su Mapulu a kaped'in su ngibu-ngibuan a malaikat'in 15 ka enggu nin makukum su langun na taw. Na sugaten nin den sa kawagib su langun nu baladusa a taw a dala gilek'in kanu Kadenan kanu langun nu galebekan nilan a di pakasuat kanu Kadenan enggu su langun nu mapasang a kangadtalu nilan a sakutu sa lekanin.”
16 Na su nia a manga taw na mategel embuku enggu mategel manendit. Nia nilan bu 'bpagunutan na su mawag a kiug'a ginawa nilan. Na ibpemamasela nilan man gaid i ginawa nilan enggu matatig kun sa 'bpamedtan nilan su ped'ilan asal'a makua nilan bu su kiug'a ginawa nilan.
Su Kapebpagingat enggu su manga Papata
17 Ugaid'a sekanu a manga lusud ku sa tian a papedtayan, na nia nu 'gkakalendem na su pidtalu nu manga sinugu nu Mapulu tanu a su Isa al-Masih a manganggula 18 a “Sia den kanu mangauli den a gay na mamembuat su manga taw a mategel edsudi a nia nilan bu unutan na su kamustakilan a kiug'a ginawa nilan.” 19 Su nia ba a manga taw i papebpipitas sa lekanu. Nia nilan bu 'bpagitungen na su kamamanusiay bu ka dala kanilan su Suti a Ruh.
20 Ugaid'a sekanu a manga lusud ku sa tian a papedtayan, na makin nu pakabagel su salig'u sia kanu manga panduan a ebpun kanu Kadenan. Pangeni-ngeni kanu sia kanu tabang'u Suti a Ruh. 21 Palalayun kanu sia kanu limu nu Kadenan gagalu na kabpagingapa nu kanu uyag-uyag a da taman nin a ibpagenggay sa lekanu nu Mapulu tanu a su Isa al-Masih sabap kanu lat a nanam'in. 22 Lati nu sa nanam su manga taw a pendua-dua pamun kanu kapedsalig'in kanu Kadenan. 23 Tabangi nu su ped'u sa kalipuas'ilan kanu apuy sa naraka. Apia su ped a manga taw a pembaladusa na lati nu bun silan sa nanam ugaid'a pangingat kanu sa kanggula nu sa entu sa di kanu makalalagit. Na apia su balegkas'ilan a nabudsengan nu galebek'ilan a kabaladusan na ikias'u.
Su Pugi enggu su Kadsukul-sukul kanu Kadenan
24 Na pugin tanu su kaisa-isa nin bu a Kadenan a makatiakap sa lekitanu sa di tanu kambaladusa enggu makapasupeg sa lekitanu kanu sigay nin sa dala tila nin enggu aden kagalaw nin. 25 Sekanin bu su Kadenan a 'bpelipuas sa lekitanu sia makanggulalan kanu Mapulu tanu a su Isa al-Masih. Sa lekanin a Kadenan su pugi, kabarakat, kadatu enggu bagel iganat sa ganatan sampay saguna taman sa taman. Amin.
Wassalam