Su Kinapaginugut'i Saul kanu Isa al-Masih
9
Saleta mambu na da bun pinda na kabpamagigis 'bpangimatay ni Saul kanu 'bpamaginugut kanu Mapulu a su Isa al-Masih. Linemu si Saul kanu mapulu sa langun nu 'bpamangurban 2 ka nangeni sa sulat a 'bpananggiten nin lu kanu manga walay a pedsambayangan nu manga Yahudi sa Damaskus. Na nia nakadalem kanu sulat na aden kawagib'in sa kasigkem'in kanu apia entain i kasabutan nin a 'bpagunut kanu panduan nu Isa al-Masih magidsan i babay-mama ka bilanggun nin lu sa Awrusalim.3 Na guna su pakasiken den si Saul sa Damaskus na nakatekaw demun sekanin nasumpit'a sigay a ganat sa sulega. 4 Daka nakadudsum sekanin kanu lupa. Na nakineg'in i suala a pedtawag sa lekanin sa “Saul, Saul, nginan ka 'bpamungkaidanan aku nengka?” 5 Na nia inisumpat'i Saul na “Hu Mapulu, entain ka ba?” Na nia menem inisumpat'u suala na “Saki si Isa a 'bpamungkaidanan nengka. 6 Na edtindeg ka, ka talus ka den lu kanu entu a siudad. Aden edtalu sa leka lu u ngin i dait a enggulan nengka.” 7 Na su manga mama a kaped'i Saul na namakadtindeg silan a di pamakadtalu ka matag silan pakakineg sa suala na dala 'gkailay nilan a taw. 8 Daka midtindeg si Saul, ugaid'a guna den sekanin embamata na di den pakailay, na tinundan bu sekanin nu manga tagapeda nin 'bpawang lu sa Damaskus. 9 Na nakatelu gay na di sekanin pakailay taman sa dala makakan enggu makainem.
10 Na aden isa a mama a 'bpaginugut lu sa Damaskus a bedtuan sa Ananias. Naalung'u ginawa nin su Mapulu a pedtawag sa lekanin sa “Ananias.” Na sinemumpat mambu sekanin sa “Hu Mapulu nia aku bun.” 11 Na nia pidtalu nu Mapulu sa lekanin na “Edtatakena ka, ka lu ka kanu lalan a bedtuan sa Lalan a Matidtu. Pangilay ka su walay ni Yahuda ka idsa nengka lun su mama a taw sa Tarsus a bedtuan sa Saul. Na 'bpangeni-ngeni sekanin saguna. 12 Na inipaalung ku sa lekanin i pendapenetan nengka sekanin asal'a makailay 'bpaluman.” 13 Ugaid'a nia inisumpat'i Ananias na “Hu Mapulu, madakel den i nakinegan ku kanu nia a mama pantag kanu kapebpakapasang'in kanu 'bpamaginugut lu sa Awrusalim. 14 Na nakineg ku bun i sinemia sekanin a aden kawagib'in ebpun kanu manga mapulu nu 'bpamangurban sa kasigkem'in kanu apia entain a pedsimba sia makanggulalan kanu ingala nengka.” 15 Ugaid'a nia inisumpat'u Mapulu na “Lu ka, ka pinamili ku sekanin a makapayag kanu ngala ku lu kanu manga taw a dikena-Yahudi enggu kanu manga sultan nilan taman den kanu manga taw a Israil. 16 Na ipailay ku sa lekanin i temala sekanin sa madakel a kamalasayan sabap kanu kaunut'in sa laki.”
17 Na daka linemu den si Ananias kanu walay ni Yahuda ka dinapenetan nin si Saul sa nia nin pidtalu na “Saul a lusud ku sa tian, su Mapulu a su Isa a mibpapayag sa leka lu kanu lalan sa kinasangul'engka sia na sinugu aku nin sia sa leka asal'a makailay ka 'bpaluman enggu kalangkapan ka nu Suti a Ruh.” 18 Na midsambuta demun i kinalubpug'u mana ingil'a seda ebpun kanu mata ni Saul, na daka nakailay sekanin 'bpaluman. Na guna su maitu na midtindeg sekanin taman sa napasalawat. 19 Entu pan ka kineman sekanin taman sa nabagel.
Su Kinapangusiat'i Saul lu sa Damaskus pantag kanu Isa al-Masih
Na namakapila gay na kaped bu nu 'bpamaginugut si Saul lu sa Damaskus 20 taman sa inipangusiat'in lu kanu manga walay a pedsambayangan nu manga Yahudi i Tunggal'u Kadenan su Isa al-Masih. 21 Na langun nu nakakineg sa lekanin na sangat a nangagaip i ginawa nilan taman sa nia nilan 'gkadtalu na “Dikena ba sekanin su mama a namungkaid kanu langun nu pedsimba sia makanggulalan kanu ingala nu Isa lu sa Awrusalim? Tembu ba sinemia sekanin ka pedsigkemen nin su 'bpamaginugut ka enggu nin makaadap kanu manga mapulu nu 'bpamangurban.”
22 Ugaid'a makin bun 'bpangiseg su kabpangusiat'i Saul taman sa da den 'gkadtalu nu manga Yahudi lu sa Damaskus sa kabpangimbenal'in sa su Isa na saben-sabenal a su Masih.
23 Naipus su manga gay na namagumpung su ped a manga Yahudi sa kaimatay nilan kani Saul 24 ugaid'a katawan ni Saul su kahanda nilan a entu. Na magabi sa malamag na pedsipatan nilan bu su manga bengawan nu siudad asal'a kaimatayan nilan sekanin. 25 Tembu kinua sekanin sa magabi nu manga taw a nakapapaginugut'in kanu Isa al-Masih ka pinapageda nilan sa bukag ka initudtun nilan kanu bala nu alad a watu a nakalibet kanu siudad.
26 Na guna embalingan si Saul lu sa Awrusalim na miug sekanin mamung kanu 'bpamaginugut lu ugaid'a 'gkangagilekan silan sa lekanin kagina nia nilan kataw na 'bpagigiling bu sekanin a 'bpaginugut. 27 Daka inunutan sekanin ni Barnabas lu kanu manga sinugu nu Isa al-Masih ka pidsinantal'in kanilan u panun i kinabpapayag enggu kinambitiala nu Mapulu kani Saul lu kanu lalan sa Damaskus. Pidsinantal bun ni Barnabas su kinapangusiat'i Saul sa da den gilek'in lu sa Damaskus pantag kanu Isa. 28 Na guna su maitu na pakandaya-daya den sekanin kaped'u 'bpamaginugut lu sa Awrusalim taman sa ibpangusiat'in sa da den gilek'in su pantag kanu Mapulu. 29 Na ipedsinantala nin su manga Yahudi a nia nilan kadtalu na Grik ugaid'a kiugan nilan mimatay si Saul. 30 Guna kasabuti nu 'bpamaginugut su pantag kanu entu na inisigkil'ilan si Saul lu sa Kaisaria entu pan ka pinatalus'ilan lu sa Tarsus.
31 Ulian nu entu na nalilintad den su lumpukan nu 'bpamaginugut kanu lusud'u Yudia enggu Galili taman den sa Samaria. Na pegkabagel su salig'ilan enggu pegkadakel-pegkadakel bun silan sabap kanu palihala nu Suti a Ruh taman sa 'bpaguyag-uyag silan sa aden gilek'in kanu Mapulu.
Su Kinalu ni Pitru sa Lida enggu Yupa
32 Daka kinakap'i Pitru su langun na dalepa a entu. Na linemu bun sekanin sa Lida lu kanu 'bpamaginugut. 33 Na aden nailay nin lu a mama a bedtuan sa Anias a di pakambangun kanu dalem'u nakawalu lagun kagina minatay su lawas'in. 34 Daka nia pidtalu ni Pitru sa lekanin na “Anias, pinagkapia ka den nu Isa al-Masih. Embangun ka, ka timu ka i igan nengka.” Na mimbangun mambu sekanin mamagayas. 35 Na nailay sekanin nu 'bpamegkaleben lu sa Lida enggu Sarun tembu naginugut silan kanu Mapulu a su Isa al-Masih.
36 Na aden 'bpaginugut lu sa Yupa a bedtuan sa Tabita a bedtuan bun sa Durkas. Su nia a babay na tatap 'bpananabangan kanu miskinan enggu sangat a malimu. 37 Na kanu entu a manga gay na da sekanin pangengelag taman sa minatay. Na guna nilan mapasad lemigu na pinaiga nilan lu kanu bilik sa pulu. 38 Na nakineg'u 'bpamaginugut lu sa Yupa i si Pitru na lu sa Lida. Sabap sa masupeg su Lida sa Yupa na sinemugu silan sa dua kataw a mama sa pangenin nilan kani Pitru i lemu mangagan sa Yupa. 39 Daka minunut mambu si Pitru kanilan. Guna sekanin makauma na pinatalus'ilan lu kanu bilik sa pulu. Na inubay sekanin nu manga balu a 'bpamanguliang enggu ipebpagilay nilan su manga lambung enggu ped a balegkas a inumbal'i Durkas kanu bibiag pan sekanin. 40 Ugaid'a pinaliu silan langun ni Pitru ka midtinggaleb sekanin ka nangeni-ngeni. Na sinangulan nin su bangkay ka nia nin pidtalu na “Tabita, embangun ka.” Na mimbamata mambu su babay, na guna nin mailay si Pitru na mimbangun. 41 Daka kinawa ni Pitru su lima nin ka pinadtindeg'in. Entu pan ka tinawag'in su 'bpamaginugut enggu su manga balu ka iniadap'in kanilan. 42 Na nakapayapat su entu a nanggula kanu lusud'u Yupa, tembu madakel i naginugut kanu Mapulu a su Isa al-Masih. 43 Midtangen pan si Pitru lu sa Yupa sa namakapila gay lu kanu mama a bedtuan sa Simiun a 'bpangagag sa upis'a binatang.