Su Kinadtalu-talu ni Istiban
7
Daka inidsan nu mapulu sa langun nu 'bpamangurban si Istiban sa “Ngintu, benal su langun nu nia ba a ipedsendit'ilan sa leka?”2 Nia inisumpat'i Istiban na “Manga lusud ku sa tian enggu manga lukes ku, pakikineg'u su nia. Su Kadenan a sangat a pebpugin na mibpapayag sekanin lu kanu katupuan tanu a su Nabi Ibrahim kanu lu pan sekanin sa Misuputamiaa kanu da pan sekanin makagkaleben lu sa Haran. 3 Na nia pidtalu nu Kadenan sa lekanin na ‘Ganati ka su dalepa nengka enggu su manga pagali nengka, ka lu ka kanu dalepa a ipailay ku sa leka.’b 4 Guna su maitu na ginanatan nin su dalepa a Misuputamia ka minalat lu kanu dalepa a Haran. Na guna su minatay su ama nin na pinaalat menem sekanin nu Kadenan kanu nia ba a kalupan a pegkalebenan nu saguna. 5 Ugaid'a apia ka maitu na dala pamun tandui nu Kadenan sa apia sapalad a lupa su Nabi Ibrahim ugaid'a inibpasad'u Kadenan i inggay nin sa lekanin taman kanu manga tupu nin su nia a kalupan sa apia da pan wata nu Nabi Ibrahim kanu entu ba a timpu.
6 “Na nia pan pidtalu nu Kadenan kanu Ibrahim na ‘Su manga muliataw nengka na 'gkaleben kanu dalepa a dikena kanilan. Na maulipen silan lu enggu pakapasangan silan kanu entu a dalepa kanu dalem'u pat gatus lagun. 7 Ugaid'a siksan ku su entu a bangsa a mangungulipen kanilan entu pan ka mawa silan kanu dalepa a entu ka simban aku nilan kanu nia ba a dalepa.’c
8 “Daka inisugu nu Kadenan kanu Ibrahim i mapapaletakd sekanin enggu su manga wata nin taman kanu manga muliataw nin sa tanda nu kapasadan nin sa lekanin. Na guna mambata su Iskak na nakawalu gay pamun na pinaletak den nu ama nin a su Ibrahim. Na maitu bun ba su pinggula nu Iskak kanu wata nin a su Yakub enggu pinggula bun nu Yakub su entu kanu sapulu enggu dua a manga wata nin a nabaluy a nabpunan tanu a manga Yahudi.
9 “Na su nia a manga wata nu Yakub na pinangalikudan nilan su ali nilan a su Yusup taman sa pibpasa nilan kanu manga padagang a 'bpelu sa Egypt. Na pinangungulipen sekanin lu ugaid'a pedtapiden sekanin nu Kadenan 10 taman sa ibpelipuas'in kanu langun nu kamalasayan enggu tinulunan bun sekanin nu Kadenan sa kategelan a nakasuat kanu Piraun. Tembu binaluy sekanin nu Piraun a gubilnadul kanu lusud'u Egypt taman sa pinatiakapan nin lun su langun nu kaaden nin.
11 “Kanu entu ba a timpu na aden nakatingguma a masela a kinanggutem kanu lusud'u Egypt taman den kanu dalepa a Kanaan. Na pedtala sa mapasang su langun na taw taman sa da den 'gkakan nu manga lukes tanu ba a nia. 12 Na guna makineg'u Yakub i aden kauyagan lu sa Egypt na pinalu nin su manga wata nin. Entu ba i paganayan a kinalu nilan. 13 Na su ikadua a kinalu nilan sa Egypt na inipakilala den nu Yusup su ginawa nin kanu manga suled'in. Na nakilala bun mambu nu Piraun su pamilia nu Yusup. 14 Daka inipalapit'u Yusup su ama nin a su Yakub enggu su langun nu manga suled'in. Na pitupulu enggu lima kataw silan langun. 15 Na linemu den mambu sa Egypt su silan a manga kalukesan tanu taman sa lu den ba silan langun namamatay. 16 Na su manga bangkay nilan na init bun embalingan kanu danden a dalepa nilan a Sikim ka lu ba silan inikubul kanu pinamasa nu Nabi Ibrahim lu kanu manga wata nu Hamur.
17 “Ugaid'a gay bun pegkasupeg su katuman nu Kadenan kanu pasad'ine kanu Nabi Ibrahim na 'gkatakep-'gkatakep bun mambu i kadakel'u manga pagidsan tanu a Israil sa Egypt. 18 Daka aden menem nakasambi endatu kanu dalepa a Egypt a di nin pegkilalan su Yusup. 19 Na pinagakalan nin su manga lukes tanu taman sa pinakapasangan nin silan. Na inipeges'in i kapaidtug kanu manga wata nilan a bagu pimbata asal'a matay.
20 “Kanu entu ba a timpu na pimbata su Nabi Musa, na saben-sabenal a nasuatan sekanin nu Kadenan. Inipagena sekanin nu manga lukes'in kanu dalem'u namakatelu ulan lu kanu walay nilan. 21 Ugaid'a ulian nu entu na nategel'ilan i ginawa nilan sa kaawa nilan lun kanu walay nilan. Saleta mambu na natun sekanin nu wata nu Piraun a babay taman sa inuyag'in enggu pinagkasela nin sa mana nin bun wata. 22 Na inipamandu sa lekanin su langun na nasabutan nu manga taw a Egypt. Na migkategel a benal sekanin magidsan i kadtalu-talu enggu galebek.
23 “Guna su nakapatpulu lagun den su Musa na napagitung'in i kakapen nin pan su manga pagidsan nin a taw a Israil. 24 Na nailay nu Musa i isa kanilan i papegkapasangan nu isa a taw a Egypt. Na tinabangan nin su pagidsan nin, inisuli nin taman sa minatay nin su mama a papegkapasang lun. 25 Na nia kataw nu Musa na 'gkasabutan nu manga pagidsan nin i sinugu sekanin nu Kadenan a lemipuas kanilan ugaid'a dikena besen.
26 “Na kanu temundug a gay na kinakap'in silan 'bpaluman. Daka nailay nin su dua kataw a pagidsan nin a taw a Israil a 'gkalimbul. Na nangilay sekanin sa ukit a makapapagayun nin silan sa nia nin pidtalu na ‘Manga lusud ku sa tian, nginan ka 'gkalimbul kanu inunta na sakalugu kanu bu?’ 27 Ugaid'a su mama a entu a minetay kanu kaped'in na inisumag'in su Musa ka nia nin pidtalu na ‘Entain i minenggay sa leka sa kawagib sa kakamalan kami nengka? 28 Ngintu, kiugan aku nengka bun mimatay a mana su kinaimatay nengka kagay kanu mama a taw sia sa Egypt?’f 29 Na guna makineg'u Musa su entu na minawa sekanin ka lu mindilapug sa dalepa a Midian taman sa nakagkaluma sekanin lu enggu nakambata sa dua kataw a mama.
30 “Guna maipus su nakapatpulu lagun na mibpapayag kanu Musa su malaikat'u Kadenan lu kanu manaut a kayu a pegkalaw-kalaw lu kanu tawan-tawan a masiken bun kanu Palaw nu Sinai. 31 Guna mailay nu Musa su entu na sangat a nagaip sekanin. Daka sinupegan nin, na nakineg'in su suala nu Kadenan sa 32 ‘Saki su Kadenan a pedsimban nu manga lukes'engka a mana su Ibrahim, su Iskak enggu su Yakub.’ Na kinegkel'a gilek su Nabi Musa taman sa da nin den matika milay. 33 Nia pan pidtalu nu Kadenan na ‘Iawa nengka su ampis'u ay nengka ka suti a lupa su pedtindegan nengka a nan. 34 'Gkadsusuliman ku a benal su kapapegkapasang kanu manga taw ku lu sa Egypt enggu 'gkakineg ku bun su kapendegeng'ilan tembu ba mimbaba aku ka enggu ku silan makapambaya-baya. Na sia ka, ka sugun ku seka lu sa Egypt.’ ”h
35 Na nia pan pidtalu ni Istiban na “Su Musa ba a nia na inikias'u manga taw a Israil sa nia nilan pidtalu lun na ‘Entain i minenggay sa leka sa kawagib sa kakamalan kami nengka?’ Ugaid'a saben-sabenal a sekanin su sinugu a makapangulu enggu mapambaya-baya kanilan. Sinugu sekanin nu Kadenan a sia nakanggulalan kanu malaikat'in a mibpapayag sa lekanin lu kanu manaut a kayu a pegkalaw-kalaw. 36 Na sekanin man i nangunanan kanu kinaawa nu manga pagidsan nin lu sa Egypt. Minggula sekanin sa kabarakatan enggu kangagaipan lu sa Egypt enggu lu kanu Maliga a Lagat taman den lu kanu tawan-tawan a dalepa kanu dalem'u nakapatpulu lagun. 37 Su Musa ba a nia i midtalu kanu manga taw a Israil sa ‘Su Kadenan na pasuguan kanu nin sa nabi a san bun makabpun kanu tupu nu a mana bun pagidsan ku.’i 38 Su Nabi Musa bun ba a nia i nangunanan kanu manga taw a Israil lu kanu tawan-tawan a dalepa. Sekanin bun su kaped'u malaikat a nakambitiala sa lekanin lu kanu Palaw nu Sinai sa kanu kinatalima nin kanu kadtalu nu Kadenan a pakaenggay sa uyag-uyag asal'a makasampay sa lekitanu.
39 “Ugaid'a da sekanin paginuguti nu manga lukes tanu. Inikias'ilan su Musa ka nia nilan kiugan na embalingan sa Egypt. 40 Na nia nilan pidtalu kani Harun na ‘Umbali kami nengka sa manga magkadenan a mangunanan sa lekitanu, ka di tanu katawan u ngin den i nanggula nu Musa a nia a napaliu sa lekitanu ebpun sa Egypt.’j 41 Na kanu entu demun ba a kutika na minumbal silan sa mana pipis a sapi a balahala ka pigkurbanan nilan su entu. Daka inidsela-sela nilan su naumbal'ilan a entu a balahala. 42 Na sabap sa entu na tinaligkudan silan nu Kadenan. Pinadtaday nin silan a semimba kanu langun nu 'gkangailay nilan kanu langit a mana bun su nakasulat kanu kitab'u manga nabi a
‘Manga taw a Israil!
Kanu dalem'u nakapatpulu lagun a lu kanu pan sa tawan-tawan a dalepa na ngintu, saki ba su pigkurbanan nu lu?
Na dikena man saki i pigkurbanan nu sa manga binatang lu,
43 ka nia nu pidsasapuat na su walay nu pegkakadenanen nu a Mulik
enggu su balahala a makalagid sa bitun nu Ripan a pegkakadenanen nu.
Na entu ba su manga balahala a pinangumbal'u asal'a masimba nu.
Kagina ka maitu na paawan ku sekanu lu kanu dalepa a mawatan pan sa Babilunia.’k”
44 Na pidtalu pamun ni Istiban i “Su manga katupuan tanu na lu kanilan su Balung-balung a Tuleda a 'Bpangadapan kanu Kadenan kanu timpu a lu pan silan kanu tawan-tawan a dalepa. Na su kinaumbal kanu entu na sia luyud kanu ngin i palas a inipailay nu Kadenan kanu Musa. 45 Guna maipus su namakapila lagun na pidtatanggit sia nu manga katupuan tanu su entu a Balung-balung a Tuleda a nia nilan naunutan na su Yusua. Na kanu entu ba a timpu na nakapaawa nilan su manga tribu kanu nia ba a kalupan sa kanu tabang'u Kadenan. Na sia pamun su entu a Balung-balung a Tuleda taman kanu timpu nu Daud.
46 “Na nasuatan nu Kadenan su Daud. Na pinangeni nu Daud kanu Kadenan i sugutan nin sekanin sa kapatindeg'in lun sa walay a kagkalebenan nin a Kadenan a pedsimban nu Yakub. 47 Ugaid'a su Ragya Sulaimanl pan i nakapatindeg kanu entu a walay.”
48 Na nia pan pidtalu ni Istiban na “Pidsan ka maitu na su Kadenan a Mapulu sa Langun na di man 'gkaleben sa walay a inumbal bu nu manusia a mana bun su pidtalu nu isa a nabi sia kanu kitab a
49 ‘Nia pidtalu nu Kadenan na
“Su kulesi ku na su sulega enggu su 'bpaguntulan ku kanu ay ku na su dunia.
Ngintu, 'bpagumbalan aku nengka sa walay a dait a kapangintelenan ku?
50 Dikena ba saki bun i namaluy kanu langun nu nia ba?” ’m”
51 Nia pan pidtalu ni Istiban kanu 'bpamangukum na “Sekanu a mangategas i ulu nin. Na su atay nu na mana su atay nu manga munapik kagina di nu 'bpamakikinegen su kadtalu nu Kadenan. Mana kanu bun su manga kaapuan nu a tatap pedsungkang kanu Suti a Ruh. 52 Na entain kanu manga nabi i dala pamungkaidani nu manga lukes'u? Pinangimatayan nilan su langun nu manga nabi a minayag kanu kapegkauma nu Ikelas a Sinugu a tinipu nu taman sa inimatayan nu pan. 53 Sekanu su nakatalima sa kasuguan nu Kadenan a inipapait'in kanu manga malaikat'in ugaid'a da nu bun paginuguti!”
Su Kinapamalantay kani Istiban sa Watu
54 Na guna nilan makineg i entu na nalipunget a benal silan taman sa pinagkigeta nilan su manga ngipen nilan sa lipunget'ilan sa lekanin. 55 Ugaid'a si Istiban mambu a linangkapan nu Suti a Ruh na tinemingada sekanin lu sa langit na nailay nin su sigay nu Kadenan enggu su Isa al-Masih a pedtindeg lu tampal kanu kawanan nu Kadenan. 56 Na nia pidtalu ni Istiban na “Ilay nu, 'gkailay ku su sulega a mimbukat na nailay ku su Kaka nu Manusia a pedtindeg lu tampal kanu kawanan nu Kadenan.”
57 Ugaid'a linemalis silan sa matanug a benal taman sa dinapengan nilan su manga tangila nilan, entu pan ka sinigkem'ilan mamagayas si Istiban 58 ka ginuyud'ilan lu kanu liu nu siudad ka enggu nilan mapamalantay sa watu. Na linuwas muna nu manga taw a midtitigus sa kalebutan sungkang kani Istiban su balegkas'ilan asal'a di silan masikut, na lu nilan inibetad kanu ubay nu mama a bedtuan sa Saul.
59 Na gay nilan 'bpamalantay kani Istiban na 'bpangeni-ngeni mambu sekanin sa “Hu Isa a Mapulu ku, talima ka den su ngiawa ku.” 60 Daka midtinggaleb si Istiban ka inilalis'in edtalu i “Mapulu ku, di ka silan semikesa kanu nia a kadusan nilan.” Na guna nin mapasad i entu edtalu na napandus su napas'in.