Su Da Taman nin a 'Bpangintelenan sa Zion
Sengal sa kabpawang sa Awrusalim asal'a makasimba.
132
Hu Kadenan a Mapulu, di ka lemipatani su Daudenggu su manga kamalasayan a tinigkelan nin.
2 Mibpasad sekanin sa leka
enggu midsapa sa leka a Kadenan a Barakat a Kadenan nu Yakub
3 sa nia nin inidsapa na “Di aku muli kanu walay ku
atawa ka mangintelen kanu pedtulugan ku;
4 di aku temulug
atawa ka di ku ibpepedeng su mata ku
5 taman a di ku kapatindegan sa walay a kadtangenan nin su Kadenan a Mapulu
a su Kadenan a Barakat a Kadenan nu Yakub.”
6 Na kanu lu kami sa dalepa a Iprata na nakineg'ami u endaw nakambetad su Kaun nu Kapasadan;
na lu nami natun kanu kadatalan nu dalepa a Yaar.
7 Na nia nami nadtalu na “Edtindeg kanu, ka lemu tanu kanu dalepa a pedsimban kanu Kadenan a Mapulu
ka simban tanu sekanin kanu kaadapan nu kulesi nin.”
8 Hu Kadenan a Mapulu, edtindeg ka, ka lu ka den kanu walay a kadtangenan nengka
a kaped'engka lu su Kaun nu Kapasadan a 'gkailay lu ba su kabarakat'engka.
9 Isugut'engka i su katidtu nengka na mapagula-ula nu 'bpamangurban sa leka.
Isugut'engka a makalalis sa kagalaw su manga taw nengka a matidtu.
10 Na sabap kanu panunugun nengka a su Daud
na di ka pedtaligkudani sekanin a pinamili nengka a datu.
11 Hu Kadenan a Mapulu, mibpasad ka sa kasaligan a pasad kanu Daud
a nanget a tumanen nengka
sa nia nengka pidtalu na “Isa kanu manga muliataw nengka
i isambi ku a endatu kanu pendatuan nengka.
12 Na amaika unutan nu manga muliataw nengka su kapasadan ku
enggu su manga kasuguan ku a ipamandu ku kanilan
na makatalus su kadatu nengka taman den kanu manga muliataw nilan taman sa taman.”
13 Kagina su Kadenan a Mapulu na pinamili nin su Zion;
pigkahanda nin su entu a mabaluy a kadtangenan nin
14 sa nia nin pidtalu na “Nia ba su kapangintelenan ku taman sa taman
ka nia ba su dalepa a pigkahanda ku a kadtangenan ku.
15 Na sangat a palihalan ku su Zion sa kanu langun na nasisita nin;
pakausugan ku su manga miskinan lu.
16 Su 'bpamangurban nin na isangan ku kanilan su kalipuasan
enggu su manga taw nin a matidtu na mamelalis sa kagalaw.
17 Na pandatun ku lu ba sa mabagel su datu a ebpun kanu tupu nu Daud,
na mabaluy a palitan su datu a pinamili ku a makatayaw kanu manga taw ku.
18 Na su manga kuntela nin na isangan ku kanilan su kayayan
ugaid'a sekanin, na semigay su sansangan nin.”