ईसु के बिरोध यहूदा के चाएल
(मत्ती 26:1-5; मरकुस 14:1,2; यूहन्ना 11:45:-53)
22
1 अखमीरीa रोटिया के परबा जे फसह कहा हे,b भिरिये हले। 2 ऊ समइया में मुख्य यजकवेन आर यहूदी धरमगुरुवेन, ईसु के मारेक उपइया खोजेब करे हले, लकिन उसभीन अदमियेन से डरे हले।3 ताब यहूदा इस्करियोती पर सेतनवा ढुकले, जे मुख्य चेलवेन में से एग हले। 4 ऊ मुख्य यजकवेन आर पेहेरदरवेन के सरदरा जुगुर जाएके उपइया खोजे लागले कि ईसु के किरंग उसभीन के हांथा में पकरीबे। 5 ओकर उपइया उसभीन के बेस लागले आर उसभीन यहूदा इस्करियोती के टकवा दियेक बचनवा दलके। 6 इस्करियोती उसभीन के बाता माएन ललके; आर ऊ इरंग मोका के फेराक में लाएग गले कि जखने ईसु के जोरे भिड़िया नाञ रहते तखने उसभीन के हांथा में ईसु के पकरवाए दबे।
परभु-भोज
(मत्ती 26:17-30; मरकुस 14:12-26; यूहन्ना 13:21-30; 1कुरिन्थियों 11:23-25)
7 तखने अखमीरी रोटिया के परबा के दिना येले; ऊ परबा में भेड़वा के बचवा के फसह के खान-पियान खतीर बली दे हे। 8 ईसु पतरस आर यूहन्ना के ई केहके पठिलके: “जो, आर हमनी खतीर फसह के खान- पियान तेयार कर ता हमनी खान-पियान करबे।” 9 उसभीन ईसु से पुछलके, “तोंह कहां खोजे हीं कि ई हमनी तेयार करियो?” 10 ईसु उसभीन से कहलके, “सुन, नगरवा में जखने तोहनी ढुकबी ता एगो अदमियां पनिया के गगरिया उठावल तोरा मिलतो; जे घारा में ऊ जीतो ऊ घाराम तोहनी चेल जियों; 11 आर ऊ घारा के मलिकवा से कहियों: ‘गुरुजी कहे हो कि कने हो पोहुनवा घारा जकरा में हाम अपन चेलवेन जोरे फसह के खान-पियान करबो।” 12 ऊ तोहनी के एगो सजवल बड़ घारा दखीतो, तोहनी वेहें तेयार करियों। 13 जिरंग ईसु कहले हले, पतरस आर यूहन्ना वहां जाएके उरंगे पेलके आर फसह के खान-पियान तेयार करलके।
14 जखने समइया आए गले, ता ईसु अपन मुख्य चेलवेन जोरे खान-पियान करेल बेठले। 15 आर ईसु उसभीन से कहलके, “हाम खोजे हलियो कि हाम दुखा भोगे से पेहले तोहनी जोरे फसह के खान-पियान खइयो। 16 काहेकि हाम तोहनी से कहे हियो कि जल तकले ऊ परमेसवर के राज में पुरा नाञ भेतो तल तकले हाम फसह फिरो कहियो नाञ खेबो।” 17 तखने ईसु अंगुरवा के रासा के पियलवा लेके धेन्यवाद केरके कहलके, “इटा ले, आर अपने में बांएट ले।” 18 काहेकि हाम तोहनी से कहे हियो कि जल तकले परमेसवर के राज नाञ येतो तल तकले हाम अंगुरवा के रासा आब से कहियोन पिबो।” 19 फिरो ईसु रोटिया ललके, आर धन्नेवाद केरके टोनलके, आर चेलवेन के ई केह के दलके, “ई हमर देहा हको जे तोहनी खतीर दियल जा हो: हमर खेहाल खतीर ई करते रहियों।” 20 इरंग ईसु खनवा के बादे पियलवो ई कहते दलके, “ई पियलवा हमर खुनिया में जे तोहनी खतीर बोहवल जा हो नोका एकरार हको।c 21 लकिन सुनी, हमरा पकरावेवला के हांथा हमर जोरे खान-पियान करेब करे हो।d 22 हाम, अदमियां के बेटवा के परमेसवर जिरंग ठहरीले हे उरंगे मोरेक चाही; लकिन कतना खराप दुखा ऊ अदमियां पर येतो जे हमरा पकरीतो!” 23 तखने चेलवेन अपनेम पुछे लागले कि हमनीम के हके, जे ई कामा करते।
महान के हके?
24 मुख्य चेलवेन में ई बाता के बोला-बोली होवे लागले कि हमनी में साभे से बड़ के हके।e 25 ईसु चेलवेन से कहलके, “गेर यहूदियेन के रजवेन यहूदियेनन पर हक जमावे हे, आर जे उसभीन पर हुकुम जमावे हे ऊ भल करेवला कहला हे।” 26 लकिन तोहनी इरंग नाञ होइयों; आर जे तोहनी में साभे से बड़ हीं, ऊ साभे से छोट नियर बन आर जे परधान हे, ऊ सेवकवा नियर बन।f 27 काहेकि बड़ के हके: ऊ जे खनवा जुगुर बेठल हे, चेहें ऊ जे सेवा करे हे ? की ऊ नाञ जे खनवा जुगुर बेठल हे ? लकिन हाम तोहनीक माझांम सेवकवा नियर हियो।g
28 तोहनी ऊ हकी, जे हमर परीछवेन में लगस्तार हमर जोरे रहली; 29 आर जिरंग हमर बप्पा हमर खतीर एगो राज दले हे, उरंगे हमु तोहनी खतीर एगो राज दे हियो, 30 कि तोहनी हमर राज में हमर जोरे खेबी-पीबी, आर गदिया में बेठके इसराएल के बारोहो गोतिवेन के फेसलवा करबी।h
पतरस ईसु के नकाएर दियेक के बारे में ईसु केहे हे
(मत्ती 26:31-35; मरकुस 14:27-31; यूहन्ना 13:36-38)
31 समोन, ए समोन, सुन, सेतनवें परमेसवर से तोहनी साभे गोटेन के मांएग लले हो कि तोहनी के परखतो, 32 लकिन हाम तोहनी खतीर पराथना करलियो कि तोहनी के बिसवास चेल नाञ जाए; आर जखने तों घुइर येबी, ता तों अपन भेयवेन के सोझ करियों ” 33 पतरस ईसु से कहलके, “हे परभु, तोर जोरे जेलवा जाए खतीर, आर तोर खतीर मोरेल भी हाम तेयार हियो।” 34 ईसु कहलके, “हे पतरस, हाम तोर से कहे हियो कि जल तकले तों हमरा तीन दफी नाञ नकारबी कि तों हमरा नाञ जाने हीं, तल तकले आझ मुरगवा नाञ बांगतो।”
35 फिरो ईसु चेलवेन से कहलके, “जखने हाम तोहनी के बगेर बटोलिया, आर बगेर मोटरी, आर बगेर चटिया के पठिले हलियो, ता तोहनी के कुछु चीजा घटल हलो?”i उसभीन कहलके, “कोन्हो चीजा नाञ घटल हलो।” 36 ईसु उसभीन से कहलके, “लकिन आब जकर जुगुर बटोलिया हो ऊ लिहीं आर उरंगे मोटरियो; आर जकर जुगुर तलवरिया नाञ हो ऊ अपन पिन्धनवा बेच के एगो किन्द लिहीं। 37 काहेकि हाम तोहनी से कहे हियो कि ई जे पवितर कितबा हमर बारे में लिखल हो: ‘ऊ गुनहगरवेन जोरे गिनल गलो’j ऊ बचनवा हमर में पूरा होवेक जरोरी हो; काहेकि हमर बारे में लिखल वचनवेन पूरा होवे पर हो।” 38 उसभीन कहलके, “हे परभु, दख, यहां दुगो तलवरिया हो।”ईसु उसभीन से कहलके, “ढेर हो।”
जेतून पहरिया पर ईसु के पराथना
(मत्ती 26:36-46; मरकुस 14:32-42)
39 फिरो ईसु उने से उइठ के रोजे नियर जेतून पहरिया पर गले, आर चेलवेन उन्खर पीछु होए के चलले। 40 जेतुन पहरिया जाएके ईसु चेलवेन से कहलके, “पराथना कर कि तोहनी पापा में गिरेक परीछा में नाञ परबी।” 41 आर ईसु उसभीन से कुछु दूर फरक जाएके घुठनियां पर होय के पराथना करे लागले, 42 “हे बप्पा परमेसवर, तोंह चाही ता ई बड़का दुखा-पीरा हमर जुगुर से दूर केर दोहो, तय्यो हमर इछा नाञ लकिन तोहर इछा पूरा होवो।” 43 तखनियें एगो सरगदूता वहांपरी परकट भेले आर ईसु के सकतिया दिये लागले। 44 परभु बड़ी दुखा-पीरा से धयान से पराथना करे लागले; आर उन्खर घामा खुनिया के बड़ बड़ बूंदा नियर भूंवा में गिरेब करे हले। 45 ताब ईसु पराथना से उठले आर अपन चेलवेन जुगुर जाएके दखलके कि उसब दुखा से थकेक चलतीस सुतल हले। 46 आर ऊ उसभीन से कहलके, “तोहनी कहील सुते हीं? उठ, आर पराथना कर कि पापा में गिरेक परीछा में नाञ परियों।”
ईसु के पकरावेक
(मत्ती 26:47-56; मरकुस 14:43-50; यूहन्ना 18:3-12)
47 ईसु ई बाता केहेब करे हले तेसी एगो भिड़िया येले, आर मुख्य चेलवेन में से एगो चेलवा जकर नामा यहूदा हले उसभीन के आगु-आगु आएब करे हले। ऊ ईसु जुगुर येले कि उन्खरा चुमा लते। 48 ईसु ओकर से कहलके, “ए यहूदा, की तों चुइमके अदमियां के बेटवा के पकरावे हीं।” 49 जखने उन्खर संगेन दखलके कि कुछु होवेवला हे, तेसी उसभीन कहलके, “हे परभु, की हमनी तलवरिया चलेयो ?” 50 आर चेलवेन में से एग गोटे तलवरिया चलाएके महा यजकवा के सेवकवा के देहना काना काएट के उड़ाए दलके। 51 तुरते ईसु कहलके, “इरंग नाञ करियों।” आर ईसु ओकर काना छूइके बेस केर दलके। 52 ताब ईसु मुख्य यजकवेन आर मेंदला के पहरदरवेन के सरदरेन आर यहूदी धरम के नेतवेन जे उन्खरा पकरेल याएल हले, उसभीन से कहलके, “की तोहनी हमरा ललखंड़िया बुइझके तलवरिया आर लठिया लले निकलल हीं? 53 जखने हाम मेंदला में रोजे दिना तोहनी जुगुर हलियो, तखने तोहनी हमरा नाञ पकरली;k लकिन येहे तोहनी के समइया हको, आर अंधेरिया के सकतिया हो।”
पतरस ईसु के नकारेक
(मत्ती 26:57,58, 69-75; मरकुस 14:53,54, 66-72; यूहन्ना 18:12-18, 25-27)
54 फिरो उसभीन उन्खरा पकेर के ले गले, आर महा यजकवा के घारा में लानलके। आर पतरस दूरे दूर उन्खर पीछु पीछु जा हले; 55 आर जखने कुछु गोटे अंगनवा में धंधवा जोएर के बेठल हले, तखने पतरसवो उसभीन के माझांम बेठ गले। 56 तखने एगो जेनियें ओकरा अगिया जुगुर बेठल दखलके, तेसे ऊ जेनियें ताएक के कहलके, “योहोत ओकरे जोरे हलो।” 57 लकिन पतरस ई बाता केहके नकाएर दलके, “ए बहीन, हाम ओकरा नाञ जाने हियो।” 58 कुछु देरी के बादे एग गोटे आर ओकरा देखके कहलके, “तुहुंत उसभीन में से हकी।” पतरस कहलके, “ए भेयवा, हाम उसभीन में से नाञ हकियो।” 59 कुछु घंटा के बादे फिरो एगोटे केहे लागले, “सच्चे में योहोत उसभीन के जोरे हलो, काहेकि ई गलील जिला के रहेवला हको।” 60 ताब पतरस कहलके, “ए भेयवा, हाम नाञ जाने हियो कि तों कोन्ची कहे हीं ।” पतरस ई कहेब करे हले तेसी मुरगवें बांएग दलके। 61 ताब परभु घुईर के पतरस दने दखलके, आर पतरस के ऊ बाता खेहाल भेले जे परभु कहले हले: “आझ मुरगवा बांगेस पेहले, तों तीन दफी हमरा नकारबी” 62 आर पतरस बहार निकेल के कपेस-कपेस के कांदले।
ईसु के बेजती करेक
(मत्ती 26:67,68; मरकुस 14:65)
63 ऊ अदमियेन जे ईसु के पकरले हले, उसभीन उन्खरा मजाक उड़ाए के मारे लागले; 64 आर उन्खर अंखिया झांएपके उन्खर से पुछलके, “ परमेसवर दने से बोल कि तोरा के मारलको!” 65 आर उसभीन ढेर तरी के बाता उन्खर बिरोध कहलके आर बेजतियो करलके।
महासभा जुगुर ईसु
(मत्ती 26:59-66; मरकुस 14:55-64; यूहन्ना 18:19-24)
66 जखने बिहान भेले तखने यहूदी धरम के नेतवेन आर मुख्य यजकवेन आर यहूदी धरमगुरुवेन एगजुट भेले, आर ईसु के अपन महासभा में लाएनके पुछलके, 67 “जदि तों ‘मसीह’ हकी, ता हमनी से केह दे!” ईसु उसभीन से कहलके, “जदि हाम तोहनी से कहबो , ता तोहनी बिसवास नाञ करबी, 68 आर जदि हाम तोहनी से पुछबो, ता तोहनी जबबा नाञ दबी।” 69 लकिन आब से हाम अदमियां के बेटवा बड़ सकतीसाली परमेसवर के दहिना कर बेठल रहबो।” 70 ई बाता पर साभे गोटेन कहलके, “ता की तों ‘परमेसवर के बेटवा’ हकी?” ईसु उसभीन से कहलके, “तोहनी अपने कहे हीं, काहेकि हाम हकियो।” 71 ताब उसभीन कहलके, “ आब हमनी गवहिया के कहील खोजबे? काहेकि हमनी अपने अकर मुंहा से सुइन ललिये।”