मलगुजारी लियेवला जक्कई
19
1 ईसु यरीहो नगरवा जाएके पार होवे हले। 2 वेहे नगरवा में जक्कई नामा के एगो अदमियां हले जे मलगुजारी लियेवलेन के सरदरा हले आर ओकर जुगुर ढेरी धाना-दोलतिया हले। 3 ऊ ईसु के दखेल खोजे हले कि ऊ किरंग अदमियां हके। लकिन भिड़ियाक चलतीस ऊ दखे नाञ पारलके काहेकि ऊ घुठ हले। 4 ताब ईसु के दखे खतीर ऊ आगु दोएर के एगो डुमरिया गाछा में चेहेड़ गले, काहेकि ईसु वेहे डहरा से जाए वला हले। 5 जखने ईसु ऊ जघावा जुगुर आंटले, तखने ऊ उपर गाछा दने हेरके कहलके, “हे जक्कई, तुरते हेठ नाम्भ, काहेकि आझ हमरा तोर घारा में रहेक जरोरी हो।” 6 ऊ तुरते नाएम्भके खुसी से ईसु के अपन घारा ले गले।7 ई देखके अदमियेन कुड़कुड़ाए के केहे लागले, “ईसु एगो पपिया अदमियां के घारा में पोहना बनेल चेल गले।”
8 लकिन जक्कई ठड़ा होएके परभु से कहलके, “ हे परभु, दख, हाम अपन आधा दोलतिया गरीबहेन के बांएट दे हियो, जदि हाम ककरो जोरे कुछु अन्याएय केरके लले हियो, ता ओकरा चाएर गुना दे दे हियो।” 9 तखने ईसु ओकर से कहलके, “आझ ई घारावलेन पापा के सजा से बेच गेल हो। येहे खतीर कि योहो एगो अबराहम के बेटवा हको। 10 काहेकि हाम अदमियां के बेटवा हरेलेहेन के खोजेल आर बचावेल आएल हियो।”a
दसगो टकवेन के उपमा
(मत्ती 25:14-30)
11 जखने अदमियेन ई बाता सुनेब करे हले, ता ईसु एगो उपमा कहलके, काहेकि ईसु यरुसलेम आंटे पर हले, आर अदमियेन सोंचे हले कि परमेसवर के राज तुरते सुरु होवेवला हे। 12 फिरो ईसु एगो उपमा कहलके, “एगो रजवा घारा के अदमियां दूर देसा चेल गले कि अपन खतीर राजपाट पाएके चेल येते। 13 येहे खतीर ऊ अपन सेवकवेन में से दसगो सेवकवा हंकीलके आर उसभीन के दस गो सोनवा के टकवाb दे दलके आर उसभीन से कहलके, ‘हमरा घुइर आवे तकले अकर से बेपारी करियों।’ 14 लकिन ओकर नगरवा में रेहेवलेन अदमियेन ओकर से दुसमनी राखे हले, आर ओकर पिछु दुतेन से हाला पठिलके कि ‘हमनी नाञ खोजे हियो कि हमनी पर तों राज करबी।’ 15 “जखने ऊ राज-पाट पायके घुइर येले, ता इरंग होले कि ऊ अपन सेवकवेन के जिसभीन के सोनवा के टकवा दले हले अपन जुगुर हंकिलके कि दखबे कि उसभीन बेपारी केरके कतना कमीले।’ 16 तखने पेहलके अदमियें कहलके, ‘हे मालीक, तोर टकवा से दस गो आर सोनवा के टकवा कमीलियो।’ 17 ऊ ओकर से कहलके, ‘धेन्य, हे बेसका सेवकवा! तों तनीसुन में बिसवास के लायग निकल्ली आब तों दसगो नगरवा पर हुकुम राख।’ 18 एग गोटे आर आएके कहलके, ‘हे मालीक, तोर सोनवा के टकवा से पांचगो आर सोनवा के टकवा कमीलियो।’ 19 ऊ ओकर से कहलके, ‘ तुहुं पांचगो नगरवा पर हुकुम राख।’ 20 तीसरका अदमियें आएके कहलके , ‘हे मालीक, सुन, तोर सोनवा के टकवा ई हको, जकरा हाम एगो गमछिया में बांएध के धाएर दले हलियो। 21 काहेकि हाम तोर से डरे हलियो, येहे खतीर कि तों एग कठोर अदमियां हकी : जे तों नाञ धारले हीं ओकरा तों उठाए लहीं, आर जे तों नाञ रोपले हीं ओकरा काएट लहीं।’ 22 मलिकवें ओकर से कहलके, ‘हे खरपका अदमियां, हाम तोरे मुंहा के बाता से तोरा दोसी माने हियो। तों हमरा जाने हली कि हाम टेढ़ अदमियां हकिये, आर जे हाम नाञ धारले हिये ओकरा हाम उठाए ले हिये, आर जे हाम नाञ रोपले हिये ओकरा हाम काएट ले हिये; 23 ता तों हमर सोनवा के टकवा सुधिया में काहेन लगाए दली कि जखने हाम ऊ जुगुर से एतललियेन ता ओकर सुध-मुइर जोएड़ के ले लतलियेन ? 24 आर जे अदमियेन बगल में ठड़ा हले; मलीकवें उसभीन से कहलके, ‘ऊ टकवा ओकर से ले लिहीं, आर जकर जुगुर दस गो सोनवाक टकवा हो ऊ ओकरा दे दिहीं।’ 25 उसभीन कहलके, ‘ हे मालीक, ओकर जुगुर दसगो सोनवा के टकवा पेहलेस हो।’ 26 हाम तोहनी से कहे हियो कि जकर जुगुर हे, ओकरा दियल जीतो; आर जकर जुगुर नाञ हो, ओकर से वोहो ले लियल जीतो जे ऊ अपन बुझे हो।c 27 लकिन हमर ऊ दुसमनेन के जिसभीन नाञ खोजे हले कि हाम उसभीन पर राज करिये, उसभीन के इने लाएन के हमर जुगुर उसभीन के मोराए दिहीं’।”
रजवा नियर ईसु के यरुसलेम के जाएक
(मत्ती 21:1-11; मरकुस 11:1-11; यूहन्ना 12:12-19)
28 अपन चेलवेन से ई बाता केहके ईसु उसभीन के आगु आगु यरुसलेम चलले।
29 जखने ईसु जेतून के पहरिया परी बेतफगे गांवा आर बेतनिया गांवा जुगुर आंटले, ता अपन चेलवेन में से दु गोटा के ई केहके पठिलके, 30 “आगुवला गांवा में जो, आर वहां जीते चोट एगो गधावा के बचवा बांधल मिलतो जकर पर कहियो कोय सवारी नाञ करले हतो, ओकरा खोएल के ले आनियों। 31 जदि कोय तोहनी से पुछतो कि अकरा कहील खोलेब करे हीं ता तोहनी ई केह दियों कि परभु के अकर जरूरत हे।”
32 जिसभीन के पठीले हले, उसभीन जाएके ईसु जिरंग कहले हले उरंगे पेलके। 33 जखने उसभीन गधावा बचवा के खोलेब करे हले, तेसे ओकर मलिकवें उसभीन से पुछलके, “ई बचवा के कहिल खोले हीं ?” 34 उसभीन कहलके, “परभु के अकर जरूरत हे।” 35 आर उसभीन गधावा बचवा के ईसु जुगुर लले येले, आर चेलवेन गधावा पर अपन कपड़वा बिछिलके आर ईसु के ओकर पर बेठाए दलके। 36 जखने परभु जाएब करे हले, तखने अदमियेन अपन कपड़वा डहरा में बिछीले जा हले।
37 जखने ईसु जेतुन पहरिया के ढलऊवां जुगुर आंटले, तखने वहां जीते चोट, चेलवेन के साभे झुंडा जे परभु के चमक्कार के कामा दखले हले, बड़ी खुस भेके बड़ी जोर से परमेसवर के गुन-गान करले उन्खर संगे जाए लागले: 38 “धेन्य हके ऊ रजवा जे परभु के नामा से आवे हे! सरगा में सांती आर ऊंच से ऊंच सरगा में महिमा होवे!”d 39 लकिन भिड़िया में से कुछु फरीसी अदमियेन उन्खर से केहे लागले, “हे गुरूजी, अपन चेलवेन के डांट।” 40 ईसु जबबा दलके, “जदि इसभीन चुप रहतो ता ई पखलेन चचाए उठतो।”
यरुसलेम खतीर ईसु के कांदेक
41 जखने ईसु यरूसलेम के भिरिया येले ता नगरवा के देखके ओकर पर कांदले। 42 आर बोललके, “ ओह! कतना बेस होतले जदि तुहुं ई बेस दिना के बुझे पारतलीन कि कोन बाता में तोर सांती हो, लकिन ईसभीन बातेन तोहनी के अखिया से छुपल हो। 43 काहेकि ऊ दिनेन तोर पर येतो कि तोर दुसमनेन पुरे संपेरके घेरावे घेरके तोरा छेक लतो आर चारो पटी से दबीतो; 44 ताब उसभीन तोरा आर तोर जोरे तोर बाल-बचेन के मटिया में मिलाए दतो। आर तोर में पखला पर पखला नाञ छोड़तो; काहेकि परमेसवर तोहनी के मुकती पावे के मोका दलको, लकिन ओकरा तोहनी नकाएर दली।”
परसवर के मेंदला से बेपरियेन के निकालेक
(मत्ती 21:12-17; मरकुस 11:15-19; यूहन्ना 2:13-22)
45 ताब ईसु मेंदला में जाएके समनवा बेचेवलेन के बहार निकाले लागले, 46 आर ऊ उसभीन से कहलके, “ पवितर कितबा में लिखल हे, ‘हमर घारा पराथना के घारा रहतो’, लकिन तोहनी अकरा ‘डकेतवेन का खोहा’ बनाए दले हीं।”e