अधरमी फेसलवा करेवला आर बेवा के उपमा
18
1 बगेर छोड़ले लगस्तार पराथना करेक जरोरी के सिखावे खतीर एग दिना ईसु अपन चेलवेन के ई उपमा सुनीलके: 2 “ कोन्हो गांवा में एगो फेसलवा करेवला रेहे हले, जे नाञ परमेसवर से डरे हले आर नाञ कोन्हो अदमियेन के फिकिर करे हले। 3 वेहे गांवा में एगो बेवा रेहे हले, जे ऊ फेसलवा करेवला जुगुर रोजे-रोजे जाएके केहे हले, ‘हमरा न्याएय केरके हमरा दुसमनेन से बचा।‘ 4 ऊ फेसलवा करेवला कुछु समइया ले नाञ मानलके लकिन बाद में ऊ अपन मनाम बिचार केरके कहलके, ‘हाम नाञ परमेसवर से डरे हिये आर नाञ अदमियेन के फिकिरिया करे हिये; 5 तय्यो ऊ बेवा अलीते रेहे हे, येहे खतीर हाम ओकरा न्याएय केर दबे, इरंग नाञ होवे कि हमरा ई जखने-तखने आएक हमरा अलीते रहते’।”6 परभु कहलके, “सुन, ई अधरमियां फेसलवा करेवला कोन्ची कहलके? 7 आर परमेसवर के अपन चुनल अदमियेन जे उन्खरा राएत दिन हंकीते रेहे हे उसभीन के जरुरे ठीक न्याएय मिलते आर ओकर में देरी नाञ करतो। 8 हाम तोहनी से कहे हियो, ऊ तुरते उसभीन के न्याएय करते। तय्यो जखने अदमियां के बेटवा येते, ता कोन्ची ऊ धरतिया में बिसवास पेते?”
फरीसिया आर मलगुजारी लियेवला के उपमा
9 ईसु उसभीन से जे अपन पर बिसवास राखे हले कि हमनी धरमी हकिये आर दोसर से घिन करे हले, ई उपमा कहलके : 10 "एग दिना दु गोटे पराथना करेल मेंदला गले; एगो फरीसिया आर एगो मलगुजारी लियेवला हले। 11 फरीसियें ठड़ा होएके अपन मना में इरंग पराथना करे लागले, ‘हे परमेसवर, हाम तोरा धेन्यवाद दे हियो कि हमरा दोसर अदमियेन नियर नाञ बनीली: जिरंग पाप करेवलेन, आर अन्याएय आर व्यभिचार करेवलेन, आर ई मलगुजारी लियेवला नियर । 12 हाम हफता में दु बार सहे हियो; हाम अपन कमइया के दसमा हिसवा दे हियो।’
13 “लकिन मलगुजारी लियेवला दूर ठड़ा होएके सरगा दने अंखिया उठवोल नाञ खोजलके, आर अपन छतिया पीट-पीट के कहलके, ‘हे परभु, हाम पापी हकियो, हमर पर दया कर !’ 14 हाम तोर से कहे हियो कि ऊ फरीसिया नाञ, लकिन ई मलगुजारी लियेवला परमेसवर नजरिया में निरदोस मानल गले आर अपन घारा गले; काहेकि जे कोन्हो गोटे अपनेक बड़ बनीते, ओकरा छोट करल जीतो; आर जे अपनेक छोट बनीते, ओकरा बड़ करल जीतो।”a
ईसु चेंगरियेन के असिरबाद दे हे
(मत्ती 19:13-15; मरकुस 10:13-16)
15 फिरो अदमियेन अपन चेंगरियोन के ईसु जुगुर लले येले कि उसभीन पर ईसु हांथा धारके असिरबाद दते; लकिन चेलवेन उसभीन के देखके डांटलके। 16 ईसु चेंगरियेन के अपन जुगुर चाएल दलके आर कहलके, “ चेंगरियेन के हमर जुगुर आवेल दिहीं, आर उसभीन के नाञ रोकियों: काहेकि परमेसवर के राज इरंगे अदमियेन के हको। 17 हाम तोहनी से दावा के साथ कहे हियो जे कोन्हो गोटे परमेसवर के राज चेंगरियेन नियर नाञ अपनेबी, ऊ ओकरा में कहियोन ढुके पारबी।”
अमिरवा अदमियां आर सदाए के जिनगिया
(मत्ती 19:16-30; मरकुस 10:17-31)
18 कोन्हो सरदरा ईसु से पुछलके, “हे बेस गुरु, सदाए के जिनगिया के हकदार होवे खतीर हाम कोन्ची करिये ?” 19 ईसु ओकर से कहलके, “ तों हमरा बेस गुरु कहील कहे हीं ? कोय बेस नाञ, खली परमेसवर बेस हे। 20 तों परमेसवर के हुकुम जाने हीं : ‘ व्यभिचार नाञ करियों, कोकरो जान से नाञ मारियों, चोरी नाञ करियों, झूठ गवहिया नाञ दियों आर अपन बप्पा-मइया के इजत करियों।”b 21 सरदरें कहलके, “हाम ई साभे के सयान घरी से मानले आएब करे हियो।” 22 ई सुइन के ईसु सरदरा से कहलके, “अभियो तोर में एगो घटी हो, तों अपन साभे कुछु बेच के गरीबहेन के बांएट दिहीं, आर आएके हमर पिछु चल; तखने तोर खतीर सरगा में दोलतिया धारल जीतो, ।” 23 सरदरा ई सुइन के बड़ी दुख भे गले, काहेकि ऊ बड़ी अमीर अदमियां हले।
24 ईसु ओकरा देख के कहलके, “अमिरवेन के परमेसवर के राज में ढुकेक कतना सकेत होवे हे ! 25 परमेसवर के राज में अमिरवा के ढूकेक से ऊंटा सुयवा के छेदा से निकेल जाएक हल्लुक हे। 26 ई बाता के सुनेवलेन कहलके, “ता फिरो ककर मुकती होवे पारते ?” 27 ईसु कहलके, “जे अदमियेन से नाञ होवे पारे, ऊ परमेसवर से होवे हे।” 28 पतरस कहलके, “दख, हाम घारा-दुरा छोएड़ के तोहर पिछु चले लागल हियो।” 29 ईसु उसभीन से कहलके, “हाम दावा के साथ कहे हियो जदि कोय अपन घारा-दुरा, चेहें कनइया, चेहें मइया-बप्पा, चेहें भेयवा-बहिनिया, चेहें चेंगेर-बुतरु के परमेसवर के राज खतीर छोएड़ दते, 30 ता ऊ ई जुगा में ढेरी गुना बेसी आर आवेवला जुगा में सदाएके जिनगिया पेते।”
अपन मोरेक बारेम ईसु के तीसरका बोलेक
(मत्ती 20:17-19; मरकुस 10:32-34)
31 फिरो ईसु मुख्य चेलवेन के ले जाएके उसभीन से कहलके, “दख, हमनी यरुसलेम जाएब करे हीं, आर जतना बाता अदमियां के बेटवा के बारे में परमेसवर दने से बोलेवलेन से लिखल गेल हो, ऊ साभे पूरा होतो। 32 काहेकि ओकरा गेर यहूदी के हांथा में सोंपल जीतो, आर उसभीन ओकरा हंसी उड़ीतो; आर ओकरा बेजती करतो आर ओकर पर थूकतो, 33 आर ओकरा चभुकवा से मारतो, आर ओकरा मोराए दतो आर ऊ तीसरका दिना जिन्दा भे जीतो।” 34 लकिन मुख्य चेलवेन के ई बातेन में से कुछु नाञ बुझे पारलके; आर ई बातेन उसभीन से नुकाएल रहले, आर जे बाता ईसु बोलले हले ऊ बातेन चेलवेन नाञ जानलके।
ईसु अन्धरा भीखमंगवा के अंखिया दे हे
(मत्ती 20:29-34; मरकुस 10:46-52)
35 जखने ईसु यरीहो सहरवा के भिरिया आंटले, ता एगो अन्धरा डहरा के ओंठिया में बेठ के भिखिया मांगेब करे हले। 36 ऊ भिड़िया के बुलेके अवजिया सुइन के पुछे लागले, “ई कोन्ची होएब करे हो ?” 37 उसभीन ओकरा कहलके, “ नासरेतवलाc ईसु जाएब करे हो।” 38 तखने ऊ हंकाएके कहलके, “हे ईसु, दाऊद के बेटवा, हमर पर दया कर!” 39 जे आगु-आगु जाएब करे हले, ऊ ओकरा धमकावे लागले कि चुप रह; लकिन ऊ आरो चचाए लागले, “हे दाऊद के बेटवा, हमर पर दया कर !” 40 तखने ईसु ठड़ा होएके हुकुम दलके कि ओकरा हमर जुगुर लले आ आर जखने ऊ ईसु जुगुर गले ता ईसु ओकर से पुछलके, 41 “तों कोन्ची खोजे हीं कि हाम तोर खतीर करियो ?” ऊ कहलके, “ हे परभु, हाम दखेल खोजे हिये।” 42 ईसु ओकर से कहलके, “दखे लाग; तोर बिसवास तोरा बेस केर दलको।” 43 तखने ऊ तुरते दखे लागले आर ऊ परमेसवर के गुन-गान करले ईसु के पिछु चले लागले; आर साभे गोटे ई देख के परमेसवर के गुन गावे लागले।