ईसु के मदत करेवलीन जेनी-जोग
8
1 ओकर बादे ईसु नगरवा-नगरवा आर गांवा-गांवा में परमेसवर के राज के बेस समचरवा सुनीले-सुनीले चारो दने घुरते रहले, आर बारोह मुख्य चेलवेन उन्खर जोरे हले, 2 आर कुछु जेनियोन हले जिसभीन असुध आतमेन से आर बिमरियेन से छोड़ावल गेल हले ; आर उसभीन ई हके: मरियम जे मगदलीनीa कहा हल्थी,अकरे से सातगो भूतेन निकलल हले, 3 आर हेरोदेस के घारा के मुनसिया कूजा के कनइया योहन्ना, आर सूसन्ना, आर ढ़ेरमनी दोसर जेनियेन जिसभीन अपन कमइया से ईसु के सेवा करे हल्थिन।bबिचवा रोपेवला के उपमा
(मत्ती 13:1-9; मरकुस 4:1-9)
4 जखने नगरवेन-नगरवेन से अदमियेन ईसु जुगुर चलल आवे हले, आर ढेरमनी भिड़िया जमा भेल हले, ता ऊ एगो उपमा कहलके, 5 “एगो बिचवा रोपेवला बिचवा रोपेल निकले। रोपे घरी कुछु बिचवा डहरा के योंठिया में गिरले, आर खेंचाए गले आर सरगा के चिरइयेंन ठोठवा से लिल गले। 6 कुछु बिचवा पखला पर गिरले ऊ जुगुर तनीसुन मट्टिया हले, आर बीचवा नजुगले, पर पनिया नाञ मिलेक चलतीस सुइख गले। 7 आर कुछु बिचवा कंटवावला लिरबिरिवा के मांझा में गिरले, आर कंटवा गछेन जोरे-जोरे बाढ़ले आर ओकरा दाएब दलके। 8 आर कुछु बिचवा बेसका जघावा में गिरले, आर ऊइगके सो गुना फारा दलके।” आर ई केहके ईसु चचाएक कहलके, “ जे गोटेन ई सुनेल खोजे हीं, उसभीन सुन आर बुझ ।”
9 ईसु के चेलवेन उन्खर से पुछलके, “ई उपमा के कोन्ची मतलब हको ?” 10 ईसु कहलके, “ तोहनी के परमेसवर के राज के गड़लेहन बातेन के सोच-बुझ दियल गेल हो, लकिन आर गोटेन के उपमा से सुनावल जा हे काहेकि ई बचनवा पूरा होवे खतीर: “ उसभीन देखके नाञ दखे पारते, आर सुइनके बुझे नाञ पारते।”c
बीचवा रोपेवला के उपमा के संदेसवा
(मत्ती 13:18-23; मरकुस 4:13-20)
11 ई उपमा के मने ई हको:“बीचवा परमेसवर के बचनवा हको; 12 आर डहरा के योंठियाम परल बिचवा ओकर देके बोले हे, जे सभीन बचनवा सुने हे,आर सेतनवा आएके, उसभीन के मना से बचनवा चोराएके ले जा हे काहेकि उसभीन बिसवास केरके मुकती नाञ पायले। 13 आर पखला पर परल बिचवा ओकर देके बोले हे, जे सभीन सुने हे, आर खुसी से बचनवा अपनावे हे,लकिन जारा नाञ पकरे चलतीस उसभीन कुछु देर तकले बिसवास राखे हे, आर परीछवा के समइया में नाञ रेहे पारे हे। 14 आर कंटवावला लिरबिरिवा के माझां में परल बिचवा ओकर देके बोले हे, जे सुने हे आर आगु जाएके जिनगिया के फिकिरिया आर दोलतिया आर हंसी-खुसी में बाईझ जा हे आर उसभीन के फारा कहियो नाञ पाके हे। 15 आर बेसका जमीनवा पर परल बिचवा ओकर देके बोले हे, जेसभीन बेस आर भल मना से बचनवा सुइनके अपन मना में जोगाए के राखे हे, आर उसभीन इतमिनान से फारा लानते रहे हे।
ढिबरिया बतिया के उपमा
(मरकुस 4:21-25)
16 “कोन्हो गोटे ढिबरिया बाएरके पेलवा से नाञ झांपे हे, आर नाञ खटिया के ताराम धारे हे, लकिन तक्तवा पर धारे हे कि भीतरा आवेवलेन के इजंरा दखीते।d 17 काहेकि इरंग कुछु झांपल नाञ हे जे उघारल नाञ जीते , आर इरंग कुछु नुकाएल नाञ हे जे गोहाएर नाञ होते आर जानल नाञ जीते।e 18 येहे खतीर धयान से सुन, काहेकि जकर जुगुर हो ओकरा आर दियल जीतो, आर जकर जुगुर नाञ हो, ओकर से वोहो ले लियल जीतो जे ऊ अपन बुझे हे।”f
ईसु के मइया आर भइवेन
(मत्ती 12:46-50; मरकुस 3:31-35)
19 एग दिना ईसु के मइया आर उन्खर भेयवेन उन्खरा दखे खतीर येले। लकिन भिड़ियाक चलतीस उन्खर से भेंट नाञ करे पारलके। 20 वहां के अदमियेन उन्खर से कहलके, “तोहर मइया आर तोहर भेयवेन तोहर से भेंट करे खतीर बहार में ठड़ुवाएल हो।” 21 ईसु अकर जबबा में उसभीन से कहलके, “हमर मइया आर हमर भेयवेन इसभीन हके, जे परमेसवर के बचनवा सुने हे आर माने हे।”
अंधिया के सांत करेक
(मत्ती 8:23-27; मरकुस 4:35-41)
22 एग दिना ईसु अपन मुख्य चेलवेन से कहलके, “आ, झीलाक पार चल।” ईसु आर उन्खर चेलवेन नावा में चढ़ले आर नावा चलवे लागले। 23 जखने उसभीन नावा चलवे हले, ता ईसु सूइत गले। तखने झीला में अंधिया येले आर नावा में पनिया घुसे लागले आर उसभीन संकटवा में बाइझ गेल हले। 24 ताब चेलवेन ईसु के जगीलके आर कहलके, “मालीक ! मालीक ! हमनी डुबेब करे हियो।” तखने ईसु उइठ के अंधिया आर पनिया के धमकिलके आर अंधिया बेठ गले आर पूरे सांत भे गले। 25 ताब ईसु अपन चेलवेन से कहलके, “तोहनी के बिसवास कने गलो ?” उसभीन डेर के आर चोंएक के अपनेम पुछलके, “इ के हके जे अंधिया आर पनियो के हुकुम दे हे, आर अंधिया-पनिया सांत होए जा हे ?”
असुध आतमा पकरल अदमियां के बेस करेक
(मत्ती 8:28-34; मरकुस 5:1-20)
26 फिरो ईसु आर अपन चेलवेन गेरासावलेनg के इलकवा में आंटले, जे गलील झीला के अगुवा तर हले। 27 जखने ईसु योंठिया में नाम्भले ता ऊ जघावा में एगो अदमियां मिलले जकरा असुध आतमा पकरले हले। आर ऊ ढेरी दिना से पिंधनवा नाञ पिंधे हले आर घाराम नाञ रेहे हले, आर ऊ कबुरवेन में रेहे हले। 28 ऊ अदमियां के असुध आतमें ढेर दिना से सतावे हले। अदमियेन असुध आतमा पकरल अदमियां के सिकड़ास हांथा-गोड़ा में बांएध दे हले तय्यो पर ऊ सिकड़ा तोएर के सुनसपाटा जघावा दने भाएग जा हले। ईसु ऊ असुध आतमा पकरल अदमियां के देहा से असुध आतमा निकले खतीर हुकुम दले हले। 29 ऊ ईसु के देखके चचीले आर उन्खर गोड़ा पर गिरके कहलके, “ईसु, परम परधान परमेसवर के बेटवा, तोरा हमर से कोन्ची कामा हो? हाम तोरा गोड़ लागे हियो कि हमरा सजा नाञ दे।” 30 ईसु ओकरा से पुछलके, “तोर नामा कोन्ची हको ?” ऊ असुध आतमें कहलके, “एग दंगल”, काहेकि ढेर असुध आतमा ऊ अदमियां के देहा में घुइस गेल हले। 31 असुध आतमें ईसु से हांथा जोएर के कहलके, “हमनी के जे गढ़ावा जकरा नापल नाञ जाए हे, उने जाए खतीर हुकुम नाञ दे।” 32 वेहे पहरिया पर सुरा के एगो अड़वरिया चेरेब करे हले; असुध आतमा हांथा जोएर के ईसु से कहलके कि हमनी के ऊ सूरेन के देहा में जाएल दे।” ईसु असुध आतमेन के सूरेन के देहा में जाएल दलके। 33 ताब असुध आतमेन ऊ अदमियां से निकेलके सूरेन के देहा में चेल गेले आर सुरेन के अड़वरिया ढलुवां में दोरले-दोरले झीला में जाएके गिरले आर डुइब के मोएर गले।
34 गोरखियेन इसब देख के भागले, आर जे ईसु करले हले ऊ गांवा में जाएके केह दलके, 35 आर वहां के अदमियेन जे कुछु होएल हले झीला जुगुर दखेल येले। उसभीन ऊ अदमियां जकर से असुध आतमा निकलल हले पिंधनवा पिन्धल ईसु मसीह के गोड़ा तर बेठल दखलके। ओकर बिमरिया बेस होए गले आर ओकर मत्तिया घुइर याएल हले । आर ईसब देखके वहां के अदमियेन डेर गले। 36 आर दखेवलेन दोसर अदमियेन से कहलके कि ऊ असुध आतमा से सतिलाहा अदमियां किरंग बेस होले। 37 गरासेन जघावा के यगल-बगल के साभे अदमियेन ईसु से गोड़ लागके कहलके कि हमनी जुगुर से चेल जो; काहेकि उसभीन बड़ी डेर गेल हले। येहे खतीर ईसु नावा में चेढ़के चेल गले। 38 जोन अदमियां से असुध आतमेन निकलल हले ऊ ईसु से हांथा जोएर के केहे लागले, “हमरो तोहर संगे रेहेल दे”; लकिन ईसु ओकरा बिदा केरके कहलके, 39 “अपन घारा चेल जो, आर अदमियेन से कह कि परमेसवर तोर खतीर किरंग बड़ बड़ कामा करले हो।” ऊ जाएके साभे नगरवा में परचारन करे लागले कि ईसु हमर खतीर किरंग बड़ बड़ कामा करलके।
ईसु के चमक्कार के कामा
(मत्ती 9:18-26; मरकुस 5:21-43)
40 जखने ईसु गरासेन देसा से येले तखने ढेरी गोटेन उन्खर से हंसी खुसी से मिलले, काहेकि उसभीन एगजुट होएके उन्खर असरा दखे हले। 41 तेसे याइरोस नामा के एगो अदमियां जे यहूदी सभाघारा के मुखिया हले, ईसु जुगुर येले आर ईसु के गोड़ा पर गिर के गोड़ लागे लागले कि “हमर घारा चल्हो”, 42 काहेकि ओकर बारोह बरस के एकेग बेटिया हले, आर ऊ मोरे पर हले।”
जखने ईसु जा हले, तखने भिड़ियेन ईसु पर धंसल आवे हले। 43 एगो जेनिया के बारो बरस से खुनिया बोहे के बिमरिया हले, आर जे अपन साभे कमइया बेदेन के पिछु बेस होवे खतीर खरचा केर दले हले, तय्यो कोएन ई बिमरिया के बेस करे पारे हले। 44 ऊ पीछु से आएके ईसु के पिंधनवा के अंचरा छुलके, आर तुरते ओकर खुनिया बोहेक बंद होए गले, 45 ई चलतीस ईसु कहलके, “हमरा के छुलके? जखने साभे गोटे मुकरे लागले, ताब पतरस कहलके, “हे मालीक, तोहरा भिड़ियें दबाएब करे हो, आर तोहर पर गिरेब करे हो।” 46 लकिन ईसु कहलके, “कोय हमरा छुलके, काहेकि हाम जाएन गलियो कि हमर देहा से सकतिया निकलल हो।” 47 ताब जेनियें दखलके कि हाम नुकाए नाञ पारबे, ताब ऊ कांपले येले आर ईसु के गोड़ा पर गिरके साभे गोटेन जुगुर ऊ कहलके कि ऊ कहील उन्खरा छुले हले आर किरंग तुरते बेस भे गले। 48 ईसु ओकर से कहलके, “बेटी, तोर बिसवास तोरा बेस केर दलको, खुसी से चेल जो।”
49 ईसु ई बाता कहेब करे हले कि यहूदी सभाघारा के सरदरा के घारा से कोन्हो गोटे आएके सरदरा से कहलके, “तोर बेटिया नाञ रहलो, आब गुरुवा के दुखा नाञ दिहीं।” 50 ईसु ई सुइन के याईरोस के जबबा दलके, “नाञ डर; खली बिसवास राख, ता तोर बेटिया बेच जीतो।” 51 ईसु याईरोस के घारा आएके पतरस,यूहन्ना, याकूब, आर छोंड़ी के मइया-बप्पा के छोएड़ के आर ककरो अपन जोरे भीतर आवेल नाञ दलके। 52 वेहे समइया में साभे गोटेन कान्दे-कलपे हले, लकिन ईसु कहलके, “ नाञ कान्द; ऊ मरल नाञ हो, लकिन सुतल हो।” 53 उसभीन ई जाएन के कि छोंड़ी मोएर गेल हे, ईसु के हंसी उड़ावे लागले। 54 लकिन ईसु छोंड़ी के हांथा पकेर के, आर हंकाएक कहलके, “ बेटी, उठ!” 55 ताब ओकर जीबा आए गले आर ऊ तुरते उइठके बेठ गले। फिरो ईसु उसभीन से कहलके कि ओकरा कुछु खाएल दिहीं। 56 छोंड़ी के मइया-बप्पा चोंएक गले, लकिन ईसु उसभीन के चताए के कहलके कि इ जे कुछु यहां परी होलो ककरो से नाञ कहियों।