मुख्य चेलवेन के पठावेक
(मत्ती 10:5-15; मरकुस 6:7-13)
9
1 फिरो ईसु अपन बारोह चेलवेन के एगजोरे बोलीलके, आर उसभीन के साभे असुध आतमेन के निकालेक आर बिमरियेन के बेस करेक के सकतिया आर हक दलके। 2 आर ईसु उसभीन के परमेसवर के राज के बेस समचरवा परचार करे खतीर आर बिमरियेन से छुटकारा दिये खतीर पठिलके। 3 परभु अपन चेलवेन से कहलके,“जाए खतीर तोहनी कुछु नाञ लियों, नाञ लाठी लियों, नाञ झोला लियों, नाञ रोटी लियों, नाञ पेसा- कोड़ि लियों, नाञ एग से बेसी कमीजवा लियों। 4 तोहनी जे कोन्हो घारा में जीबी, वेहे घाराम रहियों; जल तकले बिदा नाञ लबी, तल तकले वेहें रहियों। 5 आर जे कोन्हो नगरवेन में तोहनी के नाञ अपनीतो, ऊ नगरवेन से निकले घरी अपन गोड़ा के धुरिया वहां परि झाएर दियों कि ई उसभीन खतीर चतावेक चिन्हवा हके कि परमेसवर उसभीन के सजा दते।”a 6 येहे खतीर चेलवेन वहांपरी से निकेलके गांवा-गांवा में बेस समचरवा सुनीले आर साभे दने अदमियेन के बिमरियेन से बेस करले चलते रहले।7 हेरोदेस अन्तिपास रजवा जे कुछु होएल हले, जकर बारे में सुइन के घबराए गले, काहेकि कुछु गोटे कहलके कि यूहन्ना मोरलाहा में से जिंदा भे गले, 8 आर कुछु गोटे केहे हले कि ऊ एलिय्याह हके, आर कुछु गोटे केहे हले कि ऊ परमेसवर दने से बोलेवलेन में से एगो हके जे पुरनका जुगा में जिये हले।b 9 लकिन हेरोदेस रजवें कहलके, “ यूहन्ना बपतिस्मा दियेवला के हाम मुड़िया कटवाए दले हलिए, अबरी ई के हके जकर बाता हाम इरंग सुने हिये ? ” आर हेरोदेस उन्खरा दखेक मन करलके।
पांच हजार अदमियेन के खियावेक
(मत्ती 14:13-21; मरकुस 6:30-44; यूहन्ना 6:1-14)
10 फिरो मुख्य चेलवेन आएके जे उसभीन करले हले ईसु से केह दलके; आर ईसु उसभीन के फरक केरके अपन जोरे बेतसेदा नामा के नगरवा लले गले। 11 ई जाएन के भिड़िया उसभीन के पीछु जाए लागले, ईसु भिड़ियेन से खुसी से मिलले, आर ऊ परमेसवर के राज के बारे में सुनावे लागले, आर जे सभीन बेस होवेल खोजे हले उसभीन के ईसु बेस करलके।
12 जखने बेरवा डूबे लागले ताब मुख्य चेलवेन आएके ईसु से कहलके, “ई भिड़िया के यगल- बगल गांवा-बस्तियेन में रेहेक आर खाए-पियेक जघावा खोजे खतीर बिदा केर दिहीं, काहेकि हमनी इने एगो सुनसपाटा जघावा में हीं।” 13 लकिन ईसु उसभीन से कहलके, “तोहनी इसभीन के खाएल दिहीं।” चेलवेन कहलके, “हमनी जुगुर पांचगो रोटिया आर दुगो मछवा छोएड़ आर कुछु नाञ हो; लकिन हां, की तोंह खोजे ही कि हमनी अपने जाएके ईसब भिड़िया खतीर खनवा किन्दके लानियो?” (उसभीन करीबन पांच हजार मरदवेन हले।) 14 ताब ईसु अपन चेलवेन से कहलके, “अदमियेन के पचास-पचासगो केरके बेठाए दिहीं।” 15 चेलवेन उरंगे करलके, आर अदमियेन के पचास-पचासगो केरके बेठाए दलके। 16 ताब ईसु पांचगो रोटिया आर दुगो मछवा लेके सरगा दने देखके धन्नेवाद करलके, आर तोएर-तोएर के चेलवेन के दे दलके कि अदमियेन के बांएट दिहीं। 17 ताब साभे भिड़ियेन खाएके मना भेर गले, आर चेलवेन बचल टुकड़वेन से बारोगो टोकरियेन भरलके।
पतरस ईसु के ‘मसीह’ मानेक
(मत्ती 16:13-20; मरकुस 8:27-30)
18 एग दिना ईसु अस्करे पराथना करेब करे हले, आर चेलवेन ईसु के जोरे हले, तखने ईसु चेलवेन से पुछलके, “हमरा अदमियेन कोन्ची केहे हो कि हाम के हकियो?” 19 चेलवेन जबबा दलके, “यूहन्ना बपतिस्मा दियेवला, कोन्हो गोटे एलिय्याह, आर कोन्हो गोटे ई केहे हो कि ऊ परमेसवर दने से बोलेवलेन में से एगो हके जे पुरनका जुगा में जिये हले।”c 20 ईसु उसभीन से पुछलके, “लकिन तोहनी हमरा कोन्ची कहे हीं?” पतरस कहलके, “तोंह परमेसवर के मसीह हकी।”d 21 तखने ईसु उसभीन के चताएके कहलके कि ई बाता ककरो से नाञ कहियों।
अपन मोरेक बारे में ईसु केहे हे
(मत्ती 16:21-23; मरकुस 8:31-33)
22 फिरो ईसु कहलके, “ हाम अदमियां के बेटवा खतीर जरोरी हे कि हाम ढेर दुखा उठीबो, आर यहूदी नेतवेन आर मुख्य यजकवेन आर यहूदी धरम गुरुवेन हमरा नकाएर दतो आर मोराए दतो; आर हाम तीसरका दिना में जिन्दा होएके उइठ जीबो।”
ईसु के चेला बनेके मतलब
(मत्ती 16:24-28; मरकुस 8:34-9:1)
23 ईसु साभे गोटेन से कहलके, “जदी कोय हमर चेला बनेल खोजे हीं, ता अपने के नकाएर के आर रोजे अपन कुरुस उठाए के दुखा सेह के हमर पिछु चल।e 24 काहेकि जे कोय अपन जिनगिया बचावेल खोजे हीं, ऊ अपन सदाय के जिनगिया हराए दते, लकिन जे कोय हमर चलतीस अपन जिनगिया हराए दे हे, ऊ अपन सदाय के जिनगिया बचाए लते।f 25 जदि एग अदमियां साभे धरतिया के पाए लते आर ऊ अपन सदाय के जिनगिया हराए दते, ता ओकरा कोन्ची फेदा होते ? 26 जे कोय हमर से आर हमर बातेन से लजीबी, हाम अदमियां के बेटवा जखने हमर महिमा के जोरे, आर हमर बप्पा के आर पवितर सरगदुतेन के महिमा जोरे येबो तखने हमु ऊ अदमियां से लजीबो। 27 हाम तोहनी से सच्चे कहे हियो, कि जे यहां ठड़ा हीं उसभीन में इरंगो कुछु गोटेन हे जे जल तकले परमेसवर के राज नाञ दखते तल तकले नाञ मोरते।
ईसु के रूपा बदेल जाएक
(मत्ती 17:1-8; मरकुस 9:2-8)
28 ई बाता के केहे के करीबन आठ दिना के बादे, ईसु पतरस, यूहन्ना, आर याकूब के जोरे पहरिया पर पराथना करेल गले। 29 जखने ईसु पराथना करेब करे हले, तखने उन्खर मूंहा के रूपा बदेल गले आर ओकर पिंधनवा सादा होएके चमके लागले। 30 आर दख, परमेसवर दने से बोलेवलेन मोसस आर एलिय्याह ईसु जोरे बाता करेब करे हले। 31 मोसस आर एलिय्याह दुनु महीमा के जोरे दखार दले हले, आर ईसु के मोरे के बारे में बाता करेब करे हले, जे यरूसलेम में होवेवला हले। 32 लकिन पतरस आर ओकर संगेन के नींदा लाएग गेल हले आर सुइत गेल हले; जखने उसभीन जाएग गले, तेसे ईसु के महिमा आर ऊ दुयो मरदवेन ईसु के जोरे ठड़ा दखलके, 33 जखने मोसस आर एलिय्याह जाए लागले ता पतरस ईसु से कहलके, “हे मालीक, हमनी के येहें परी रेहेक बेस रहतो : हमनी तीनगो ढोकइया बनीबो-एगो तोर खतीर, एगो मोसस खतीर, आर एगो एलिय्याह खतीर।” पतरस जाने नाञ हले कि कोन्ची कहेब करे हे। 34 ऊ इसब केहेब करे हले कि एग बदरिया आएके उसभीन के घेर ललके, आर जखने उसभीन ऊ बदरिया से घेराए लागले ताब उसभीन डराए गले। 35 ताब ऊ बदरिया से एगो अवजिया निकल्ले,\fr \ft g “ इ हमर बेटवा हको, आर ई हमर चुनल हको, इन्खर सुन।”h 36 ई अवजिया होते चोट ईसु के अस्करे ठड़ा दखलके; आर चेलवेन ई घटनवा के बारे में चुप रहले, आर उसभीन जे कुछु दखले हले अकर बारे में ऊ दिनेन में ककरो से नाञ कहलके।
भूता पकरल छोंड़ा के बेस करेक
(मत्ती 17:14-18; मरकुस 9:14-27)
37 दोसरका दिना जखने पहरिया पर से नाम्भले तेसी एगो बड़ी भिड़िया आएके ईसु से मिले लागले। 38 आर भिड़िया से एगो अदमियां चचाएके कहलके, “ हे गुरूजी, हाम तोहरा गोड़ लागे हियो कि हमर बेटवा पर दया कर; काहेकि ई हमर एकेग बेटवा हे। 39 आर दखियें एगो असुध आतमा अकरा पकेर ले हे आर एगबेग ऊ चचाए लागे हे; आर भूतें ओकरा इरंग मोचेर देहे कि ओकर मूंहा में फेना आए जा हे; आर ओकरा घिसियाए के आर चोट-घाट लगाए दे हे आर ओकरा नाञ छोड़े हे आर ढेरी सतीते रेहे हे। 40 हाम तोहर चेलवेन से हांथा जोएर के कहले हलियो कि ओकरा बेस केर दिहीं, लकिन उसभीन नाञ बेस करे पारलको ।” 41 ईसु जबबा दलके, “ ए बिसवास नाञ करेवलेन आर ढिढ़ अदमियेन, हाम कहिया तकले तोहनी जोरे रहबो आर तोहनी के सहबो ? अपन बेटवा के यहांपरी लान।” 42 जखने ऊ छोंड़ा आएब करे हले, तखने भूतें ओकरा पटेक के मोचरे लागले, लकिन ईसु ऊ भूता के धमकिलके, आर छोंड़ा के बेस केरके ओकर बप्पा के दे दलके। 43 ताब साभे गोटेन परमेसवर के ढेर सकतिया के देखके ठक लागे लागले।
अपन मोरेक बारेम ईसु फिरो कहेक
(मत्ती 17:22,23; मरकुस 9:30-32)
साभे अदमियेन ईसु के कामा देखके चोंएक जा हले, लकिन ईसु अपन चेलवेन से कहलके, 44 “आब जे हाम तोहनी से कहे हियो से धयान से सुन, काहेकि हाम अदमियां के बेटवा के अदमियेन के हांथा में पकराए दियल जाएवला हो। ” 45 लकिन उन्खर चेलवेन उन्खर बाता बुझे नाञ पारे हले; आर ऊ बाता चेलवेन से झांपल रहले; आर उसभीन ई बाता के बारेम ईसु से पूछेम डरे हले।
साभे से बड़ के ?
(मत्ती 18:1-5; मरकुस 9:33-37)
46 फिरो चेलवेन अपने में बोला-बोली करे लागले कि हमनी में बड़ के हके।i 47 लकिन ईसु उसभीन के मना के बाता जाएन गले , आर ईसु एगो चेंगरिया के लेके अपन जुगुर ठड़ा करलके, 48 ताब ऊ अपन चेलवेन से कहलके, “ जे कोय इरंग छोट चेंगेर के हमर नामा से अपनावे हे ऊ हमरा अपनावे हे; आर जे कोय हमरा अपनावे हे , ऊ हमरा पठावेवला के अपनावे हे, काहेकि जे तोहनी में साभे से छोट से छोट हीं, वेहे साभे से बड़ हीं।”j
(मरकुस 9:38-40)
49 ताब यूहन्ने ईसु से कहकले, “हे मालीक हमनी एगो अदमियां के तोर नामा से भूतेन निकालेत दखलियो, आर हमनी ओकरा इरंग करे से टोकलियो, काहेकि ऊ हमनी संगे होएके तोहर पीछु नाञ चले हो।” 50 ईसु उसभीन से कहलके, “ ओकरा ईसब करे से नाञ टोकियों; काहेकि जे तोहनीके बिरोध में नाञ हो, ऊ तोहनी दने हो। ”
समरियेन दने से ईसु के बिरोध
51 जखने ईसु के सरगा उठाएके ले जाएक दिना पूरा होवे पर हले, तखने ऊ यरूसलेम जाए खतीर ठानलके। 52 आर ऊ अपन आगु अदमियेन के पठिलके। उसभीन समरियेन के एगो गांवा में गले कि उन्खर खतीर जघावा जोगाड़ केरके राखते। 53 लकिन सामरियेनk उन्खरा नाञ अपनिलके, काहेकि ऊ यरूसलेम जा हले। 54 ई देखके उन्खर चेलवेन याकूब आर यूहन्ने कहलके, “हे मालिक, की तोंह इरंग खोजे हीं कि हमनी हुकुम दियो कि सरगा से अगिया गिरके उसभीन के लिल जीते?”l 55 लकिन ईसु घुइरके उसभीन के डांटलके आर कहलके, “तोहनी नाञ जाने हीं कि तोहनी किरंग आतमा के हकी। काहेकि हाम अदमियां के बेटवा अदमियेन के नास करे खतीर नाञ आएल हियो, लकिन बचावे खतीर आएल हियो। 56 आर उसभीन कोन्हो दोसर गांवा में चेल गले।
परमेसवर के राज के लाएग के हके?
(मत्ती 8:19-22)
57 जखने उसभीन डहरा में जा हले, ता कोय ईसु से कहलके, “तोंह जने-जने जीभो, हमु तोहर पीछु चलबो।” 58 ईसु ओकर से कहलके, “नेड़हवेन के खोहा आर सरगाक चिंरइयेन के खोंधावा हे, लकिन अदमियां के बेटवा के मुड़ा धारेक जघवो नाञ हे।” 59 जखने ईसु दोसर से कहलके कि, हमर पीछु चल, तखने ऊ बोललके, “ हे गुरूजी, “ हमर बप्पा मोराए-हराए जीतो, तखने हाम तोहर चेलवा बेन जीबो।” 60 ईसु ओकर से कहलके, “जिसभीन के आतमा मोरल हे, उसभीन के अपन मुरदरेन के अपने गड़ेल दिहीं, लकिन तों जाएके परमेसवर के राज के बेस समचरवा सुना।” 61 एग गोटे आर कहलके, “ हे गुरूजी, हाम तोहर पीछु चलबो, लकिन पेहले हमरा घारा जाएल दे कि अपन घारावलेन से बिदा लेके येबो।”m 62 ईसु ओकर से कहलके, “ जे अदमियां अपन हांथा हारा पर धाएरके पीछु दखे हे, ऊ परमेसवर के राज के लाएग नाञ हे।”