एगो सेनापती के बिसवास
(मत्ती 8:5-13)
7
1 जखने ईसु अदमियेन के ई साभे बचनवा सुनाए लले हले, ता ऊ कफरनहूम नगरवा में येले। 2 वेहें परी एगो सो सेनिक के सेनापती हले ओकर एगो सेवकवा हले, ओकरा ऊ अपन नियर माने हले, आर ऊ सेवकवा बिमरिया चलतीस मरे नियर भे गेल हले। 3 सेनापती ईसु के बाता सुइनके कोन्हो यहूदी नेतवेन के उन्खर जुगुर पठिलके कि आएके सेवकवा के जाना बचाए लते। 4 उसभीन ईसु जुगुर गले आर बड़ी दया मांएगके केहे लागले, “ ऊ अकर लाएग हे कि तोंह उन्खर खतीर इरंग करहीं, 5 काहेकि ऊ हमनी के अदमियेन से परेम राखे हे। ऊ हमनी खतीर एगो सभाघारा बनीले हे।” 6 ता ईसु उसभीन के जोरे जाए लागले, जखने ईसु ओकर घारा आंटे पर हले, तखने ऊ सेनापती अपन संगेन के उन्खर जुगुर ई केहे खतीर पठिलके, “ हे परभु, तोंह दुखा नाञ उठावो, काहेकि हाम अकर लाएग नाञ हियो कि तोंह हमर घारा येबो, 7 येहे चलतीस हाम अपने के ई लाएग नाञ बुझलियो कि तोहर जुगुर येबो,लकिन खली तोंह एगो बचनवा केह दबो ता हमर सेवकवा बेस होए जीते। 8 हाम जाने हियो कि तोंह ई कामा केर सको हो काहेकि हमु ककरो हुकुम पर चलेवला अदमियां हकिये; आर हमर सेनिकवेन पर हमरो हक हे। जदि हाम एग गोटा से कहे हिये, “जो”, ता ऊ जा हे; आर दोसर से कहे हिये, “आ”, ताब ऊ आवे हे। जदि हाम अपन सेवकवा से कहे हिये, ‘ई कामा कर’, ता ऊ उटा करे हे। 9 ई सुइनके ईसु बड़ी चोंएक गले आर ऊ घुइर के पीछु आवेवला भिड़िया से कहलके, “हाम तोहनी से कहे हियो कि इसराएलवो में इरंग बिसवास नाञ पेलियो।” 10 आर पठवल अदमियेन घारा जाएके दखलके कि ऊ सेवकवा बेस भे गेल हे।बेवा के बेटवा के जिंदा करेक
11 कुछु दिना के बादे ईसु नाईन नामा के एगो नगरवा में गले। उन्खर चेलवेन आर ढेरी भिड़ियेन उन्खर जोरे जाएब करे हले। 12 जखने ऊ नगरवा के फटकवा के दुहरिया जुगुर आंटले, तेसे दखे कि दुहरिया से गांवा के अदमियेन एगो लहसवा ले के बाहार निकलेब करे हले; मोरलाहा अदमियां अपन मइया के एकेग बेटवा हले; ओकर मइया बेवा हले; आर नगरवा के ढेरी गोटेन ओकर जोरे हले। 13 ऊ बेवा मइया के देख के परभु के दया लागे लागले, आर ओकर से कहलके, “नाञ कांद।” 14 ताब ईसु ऊठीना जाएके टटरिया छुलके, आर उठावे वलेन रुइक गले। ताब ईसु मुरदारा से कहलके, “ए छोंड़ा, हाम तोर से कहे हियो, तों उठ!” 15 ताब ऊ मोरलाहा अदमियां उइठ के बेठ गले, आर बोले लागले। आर ईसु ऊ छोंड़ा के ओकर मइया के सोंएप दलके। 16 वहां परी अदमियेन के मना में बड़ी भेय होवे लागले आर उसभीन परमेसवर के गुन गान केरके केहे लागले, “हमनी के मांझाम एगो महान परमेसवर दने से बोलेवला आएल हो आर परमेसवर अपन अदमियेन के मदत करे खतीर आए गेल हो। ” 17 ऊ दिना ईसु जे जे चमक्कार करले हले ऊ साभे बातेन यहूदीया इलकवेन में आर अगल-बगल के साभे जघावेन में फेल गले।
यूहन्ना बपतिस्मा दियेवला के चेलवेन आर ईसु
(मत्ती 11:2-19)
18 ईसु के ई साभे कामा के बारे में यूहन्ना बप्पतिसमा दियेवला के चेलवेन यूहन्ना से कहलके। 19 ता यूहन्ना अपन चेलवेन में से दु गोटा के बोलाए के ईसु जुगुर ई पुछे खतीर पठिलके, “ की आवेवला मसीह तुहीं हकी, ने हमनी कोन्हो दोसर गोटा के असरा दखीये ?” 20 यूहन्ना के चेलवेन परभु ईसु जुगुर आएके कहलके, “यूहन्ना बप्पतिसमा दियेवलें हमनी के तोहर जुगुर ई पुछे खतीर पठिले हो कि आवेवला मसीह तुहीं हको ने हमनी कोन्हो दोसर गोटा के असरा दखीये।” 21 तखनियें ईसु ढेरी गोटेन के बिमरियेन आर दुखा-पीरेन आर भुतेन से छुटकारा दलके; आर ढेरी मनी अंधरेन के अंखिया दलके; 22 आर ईसु यूहन्ना के चेलवेन से कहलके, “जे कुछु तोहनी यहांपरी दखली आर सुनली, जाएके यूहन्ना के केह दिहीं, कि अंधेरेन दखे हे, नेंगरेन चले-बुले हे, कोढ़ियेन सुध करल जा हे, बेहरेन सुने हे, मुरदरेन के जिन्दा करल जा हे, आर गरीबहेन के बेस समचरवा सुनावल जा हे।a 23 धेन्य हे ऊ अदमियां जकरा हमर पर बिसवास करे में कोय दिक्कत नाञ हे।
24 जखने यूहन्ने अपन चेलवेन के ईसु जुगुर पठिले हले तखने ईसु यूहन्ना के बारे में केहे लागले, “तोंहनी सुनसपाटा जघावा में की दखेल गेल हली ? की हावा से हिलेवला लुकइया? 25 ता तोहनी कोन्ची दखेल गेल हली ? गुलगुल पिंधनवा पिन्धल अदमियां के? दख, जे गुलगुल पिंधनवा पिन्धल आर सुख से आर मोज में रेहे हे, उसभीन राजमहलवेन में रेहे हे। 26 ता फिरो, तोहनी कोन्ची दखेल गेल हली ? की कोन्हो परमेसवर दने से बोलेवला के ? हां, हाम तोहनी से कहे हियो, परमेसवर दने से बोलेवलो से बड़ के। 27 ई वेहे हको, जकर बारेम पवितर कितबा में लिखल हो: ‘दख, हाम अपन दूता के तोहर आगु-आगु पठावे हियो, जे तोहर आगु तोहर डहरा सोझ करतो।’b 28 हाम तोहनी से कहे हियो कि जे जेनियेन से जलमल हो, उसभीन में से यूहन्ना से बड़ कोय नाञ हो: लकिन परमेसवर के राज में छोट से छोट, ऊ यूहन्नो से बड़ हे।” 29 आर ई सुइनके साभे अदमियेन आर साभे मलगुजरिया लियेवलोन बुइझ गले कि परमेसवर धरमी हे काहेकि उसभीन यूहन्ना से बपतिस्मा लले हले। 30 लकिन फरीसी अदमियेन आर बड़का यहूदी धरमगुरुवेन परमेसवर के डहरा के नकाएर दलके, काहेकि उसभीन यूहन्ना से बपतिस्मा लियेस मुकेर गले।c
31 फिरो ईसु कहलके, “हाम ई पीढ़िया के अदमियेन के उपमा ककर से दियो कि उसभीन ककर नियर हो? 32 उसभीन ऊ बचवेन के नियर हो जे बजरा में बेठ के अपनेम हंकाए के केहे हे, ‘हमनी तोर खतीर बांसुरिया बजिलियो, आर तों नाञ नाचली; हमनी दुखावला गीता गेलियो, आर तों नाञ कान्दली।’ 33 काहेकि यूहन्ना बपतिस्मा दियेवला नाञ रोटिया खेते येले आर नाञ अंगुरवा के रासा पीते येले, आर तोहनी कहे हीं, ‘ओकर में असुध आतमा हो।’ 34 हाम अदमियां के बेटवा खेते पीते याएल हियो, आर तोहनी कहे हीं, ‘दख, पेटमधवा आर पियंकड़वा, मलगुजरिया लियेवलेन आर पपियेन के संगा।’ 35 लकिन जे परमेसवर के ग्यान के पीछु चले हे,उसभीन के जिनगिया से ग्यान सच्चे ठहरल जा हे।
पपाही जेनिया के माफी
36 एग दिना एगो फरीसी अदमियें ईसु के अपन जोरे खान-पियान करे खतीर नेता दलके आर ईसु मसीह ओकर घारा में जाएके खायल बेठले। 37 ताब ऊ नगरवा के एगो पापिन जेनियें ई जान ललके कि ईसु ऊ फरीसी अदमिया के घारा में खान-पियान करेल बेठल हे, संगमरमर के बोंयवा में इतरवा लानले हल्थी, 38 आर ऊ जेनिया ईसु के गोड़ा जुगुर पीछु ठड़ा होएके, कान्दते कान्दते अपन लोरा से उन्खर गोड़ा भिंजाएके आर अपन केसा से ईसु के गोड़ा पोंछे लागले, आर उन्खर गोड़ा के चुइमके इतरवा से गोड़ा होंसतलके।d 39 इसब देखके जे फरीसियें ईसु के नेतले हले, ऊ अपन मनाम सोंचे लागले, “जदि ई अदमियां परमेसवर दने से बोलेवला रहतलेन, ता जाएन जीतलेन कि ई जेनियें जे ओकरा छूइब करे हे, ऊ के हके आर किरंग जेनिया हके, काहेकि ऊ पपाही जेनी हके।” 40 ईसु ऊ फरीसी अदमियां के जबबा दलके, “हे सीमोन, हाम तोर से कुछु केहेल खोजे हियो।” सीमोन कहलके, “हे गुरु कह।” 41 “एगो महजनवा के दुगो करजदरवा हले, एग गोटा जुगुर पांच सो चंदिया के टकवा आर एग गोटा जुगुर पचासगो चंदिया के टकवा के करजवा हले। 42 लकिन दुनु गोटे करजवा नाञ दिये पारलके येहे खतीर ऊ दुयो के करजवा महजनवें माफ केर दलके, “हमरा बता, ऊ दुयो में से महजनवा से जादे परेम के करते ?” 43 ताब सीमोन जबबा दलके, “हमर खयाल से ऊ, जकर जादे करजवा माफ करलके।” ईसु सीमोन से कहलके, “तों ठीक कहली।” 44 आर ईसु ऊ जेनिया दने घूइरके सीमोन से कहलके, “ की तों ई जेनिया के दखे हीं, हाम तोर घारा येलियो, लकिन तों हमर गोड़ा धोवे खतीर पनियों नाञ दली, लकिन ई जेनियें अपन लोरा से हमर गोड़ा भिंजाएके अपन केसा से हमर गोड़ा पोछलके। 45 तों हमरा चुमा देके नाञ अपनेली, लकिन जखने से हाम यहां आएल हियो तखने से ई जेनियें हमर गोड़ा के चुमेल नाञ छोड़ले हे। 46 तों हमर मुड़िया में तेला नाञ लगीली, लकिन ई जेनियें हमर गोड़ा में इतरवा लगीलके। 47 येहे खतीर हाम तोहनी से कहे हियो कि ई जेनिया के पापा जे जादे हले, माफ भे गले, येहे खतीर ई जेनियें हमर से जादे परेम राखलके; लकिन जकर तनीसुन माफ भेले, ऊ तनीसुन परेम राखे हे।” 48 ई केहे के बादे ईसु ऊ जेनिया से कहलके, “तोर पापा माफ भेलो।” 49 ताब जे अदमियेन उन्खर जोरे खाएल बेठल हले, उसभीन अपन-अपन मना में सोंचे लागले,“ई के हके जे पपो के माफ केर दे हे? 50 आर ईसु ऊ जेनिया से कहलके, “तोर बिसवास तोरा बचाए ललको, खुसी से चेल जो।