Íꞌdóŋá 49

Yãkóꞌbõ wi sụ̃sụ́ anzị ꞌbanî

¹ Yãkóꞌbõ umve ngọ́pịka kí pírí jó ĩꞌbaní, “Ĩtra ĩmi áma andre gá ꞌdâ ma ĩminí ị́jọ́ drụ́zị́ mâ ĩmi aꞌbejóru idélépi ĩmi ụrụꞌbá gá rĩ kí iꞌdalé. ² Ĩmi atrá ĩmi anzịŋá má drị́ ꞌdĩ, ĩmi are íjọ́ ĩmĩ átẹ́pị Ịsịrayị́lị̃ ꞌbã jọlé rĩ ꞌi. ³ Rụ́bẹ̃nị̃ mi mâ ngọ́tị́ kãjãní rĩ, áma ũkpõ kãrị̃lẹ̃ drị̂ iꞌdalépi rĩ mí alị ꞌbá ãzí ꞌdĩ kí ũkpõ sĩ ãzíla ãrútáŋá sĩ rá. ⁴ Mî umvújó ị̃yị̂ áni mî pá tujó ãngũ ãlu gá ku rĩ sĩ, mí icó ndẽlé ũnĩ sĩ ku mî ándrá tụjó mí ụ́kụ́pị drị̃ izajó rĩ sĩ. Mí iza ĩꞌdi ị̃tụ́ ꞌdã sĩ rá mi kojó mî átẹ́pị drị́ gbọ́lọ́ sị́ gá rĩ sĩ. ⁵ Sị̃mọ́nị̃ kí ádrị́pị̃ Lẹ́vị̃ be ménéŋá ĩꞌbadrị̂ kí ãko ãgọ̃bị̃ ãni.

⁶ “Lẽ áfi ị́jọ́ amáŋá ĩꞌbadrị̂ agá ku, lẽ má icí tị traŋá ĩꞌba ãni ị́jọ́ itúŋá ũní rĩ gá ku, ãꞌdusĩku ũmbã ĩꞌbadrị̂ sĩ ụꞌdị́ kí ꞌbá rá, ụlị́ kí vâ tị́ ꞌbã ị́sụ́ pá gá use rĩ kí sĩ avájó. ⁷ Ũmbã ĩꞌbadrị̂ âlụ́ rá, ãꞌdusĩku ĩꞌdi adrujó ũkáru rĩ sĩ ãzíla ãwókó ĩꞌbadrị̂ âlụ́ rá ĩꞌdi ꞌbã adrujó ásị́ ị̃gbẹ̃ kóru rĩ sĩ. Ị́jọ́ ꞌdĩ sĩ, ma kí iré ãngũ Ịsịrayị́lị̃ drị̂ gá ãzíla ma kí iré ãngũ Yãkóꞌbõ drị̂ agá.

⁸ “Yụ́dãsị̃, mî ádrị́pịka kírú ími ịcụ́-ịcụ̂; ími drị́ la adru mî mẹ́rọ́ꞌbá kí imbe gá; mî ádrị́pịka kírú drị̃ su vụ̃rụ́ ími rujó. ⁹ Yụ́dãsị̃! Mi kẹ̃mị̃mvá. Mi ãgõ ĩzá ciŋá gâlé kẹ̃mị̃ áni mi ãngũ va sĩ ími lajó vụ̃rụ́, kẹ̃mị̃ andre rĩ áni ãꞌdi la ími aló nĩ yã?

¹⁰ “Gbéréke ũpĩ ãrĩ ꞌbá ãzí pa ími drị́ gá ku, túré ũpĩ drị̂ ími pálé gá rĩ trũ, kpere úpí gbéréke ꞌdị́pị la acá agá ãrútáŋá sụ́rụ́ pírí ꞌba drị́ rĩ ꞌbã adru agá ĩꞌdi ãni. ¹¹ Ĩꞌdi kãyĩnõ ĩꞌdidrị̂ kí ũgĩ zãbíbũ ife gá, ĩꞌdi mváŋá la gĩ zãbíbũ ife ũnĩ-ambamba rĩ gá; zãbíbũ sụ́ sĩ ĩꞌdi bõngó ũjĩ, ãꞌdusĩku ĩꞌdi ꞌbã kajó kũlũ rĩ sĩ.

¹² “Ãkónã ꞌbã adrujó kpẽtékpẽté rĩ sĩ mịfị́ lã la adru ikarú ife sụ́ sĩ ãzíla sị́ lã la mve imve lẹ́sụ́ sĩ. ¹³ Zãbụ̃lọ́nị̃ larú rĩ mĩrĩ tị gá ĩꞌdi ị̃yị́ tị íꞌbó ꞌbaní pâ tujó rĩ. Lõkókõrí ĩꞌdidrị̂ laru isé kpere Sị̃dọ́nị̃ gâlé ru. ¹⁴ Ĩsãkárĩ ĩꞌdi kãyĩnõ ũkpó ru tẹ́rị́ ꞌdụlépi la ĩꞌdiru la kãbĩlõ jó drĩdríŋĩ gá, ¹⁵ ndre ãngũ avị́jó rĩ ãlá ru ãzíla ũniambarú ĩꞌdiru ũngúkú ꞌbã tẹ́rị́ ãnzị ujíjó acájó ãtíꞌbóru iyólé iyô ãzị́ ngajó.

¹⁶ “Dánĩ larú ị́jọ́ lị ꞌbá ĩꞌdidrị̂ ꞌbaní cécé sụ́rụ́ ãlu Ịsịrayị́lị̃ gá rĩ drị̂ áni. ¹⁷ Dánĩ larú ị̃nị̃ru colépi gẹ̃rị̃ tị gá rĩrú, ị́rị́gọ́ gẹ̃rị̃ agá, kãyĩnõ ꞌbã ĩníŋá agalépi rĩ ꞌbá kãyĩnõ drị̃ gá rĩ ꞌbã aꞌdé sĩ ụ̃lị̃-ụ̃lịrú rĩ. ¹⁸ Ma patáŋá tẽ mí drị́ Ãdróŋá. ¹⁹ ꞌBá ãrátáŋá gá ũꞌbí rĩ kí mâ ngọ́pị Gádĩ tị ce ĩꞌdi rajó, wó ĩꞌdirú kí tị ce kí ndẽjó rá.

²⁰ “Ásẹ̃rị̃ ꞌbã ãngũ la ãkónã úsãrú la ka, ĩꞌdirú ãkónã ãjị́ ambamba rĩ fẽ ũpi ꞌbaní nalé rá. ²¹ Nãfũtálĩ ĩꞌdi lẽza trũlé rá mvaka tịlépi ũnĩ-ambamba rĩ. ²² Yụ̃sụ́fụ̃ ĩꞌdi zãbíbũ kalépi kũlũ ífí kalépi kũlũ kídí tị gá, kénĩ la rã ife ãzí kí drị̃ gâ sĩ.

²³ “ꞌBá kíru tra ĩꞌdi celé kí ĩꞌdi cã ꞌé ãgọ̃bị̃ ãrĩ sĩ. ²⁴ Wó ụ́sụ ĩꞌdidrị̂ tu pá ũkpó ru wó drị́ ĩfã la úꞌbã ũkpó ru Ãdróŋá Ũkpó ꞌDị́pị Yãkóꞌbõ drị̂ ꞌbã drị́ sĩ, ãꞌdusĩku ĩꞌdi ꞌbá Ịsịrayị́lị̃ drị̂ ꞌbã kí ucélépi vâ tãmbalépi rĩ. ²⁵ Ãdróŋá mî átẹ́pị ꞌba drị̂, ími ãzã kolépi rĩ, ũkpó ꞌdị́pị míní sụ̃sụ́ wilépi rĩ ꞌbã wi míní sụ̃sụ́ uzogó ị̃tụ́ ãlá ꞌbụ̃ gá rĩ drị̂ trũ ꞌbã wi míní sụ̃sụ́ ãko ụ̃nọ́kụ́ ị̃ndụ́ gá mgbi rĩ ꞌba drị̂ ãzíla ꞌbã wi míní sụ̃sụ́ ĩbã sụ́ ãzíla mvájó drị̂ kî trũ.

²⁶ “Lẽ sụ̃sụ́ mí átẹ́pịka ꞌba drị́ rĩ ꞌbã adru cécé ꞌbê áni ꞌbã ndẽ ꞌbé údu rĩ kí rá sụ̃sụ́ wilé ꞌdĩ ꞌbã tra kíru pírí Yụ̃sụ́fụ̃ drị̃ gá, mí androko ꞌbã indré cécé mî ádrị́pị kí agá ꞌdâ mî adrujó úpímváru rĩ sĩ. ²⁷ Bénzãmĩnĩ ĩꞌdi ꞌbãngá ụ̃bọ̃gụ̃ ụ̃ꞌbụ́tị míní ĩꞌdi ĩzá ucí ĩndró sĩ ĩꞌdi ĩzá ucílé rĩ kí awa.”

²⁸ ꞌDĩ kí sụ́rụ́ mụdrị́ drị̃ ị̃rị̃ Ịsịrayị́lị̃ drị̂ kí ị́jọ́ ꞌdĩ dó átẹ́pị̃ ꞌbã azịjó ãzíla sụ̃sụ́ wijó ĩꞌbanî rĩ, ngọ́tị́ŋá ãlu ãluní úfẽ sụ̃sụ́ icólépi ĩꞌdi sĩ rĩ. ²⁹ Yãkóꞌbõ azị ĩꞌbaní, “Ma dó ãni rú mụjó mâ átẹ́pị ꞌba rụ́ mâ áyị́pị be ĩmi ị̃sị̃ ma ꞌbá má rĩ abe ꞌbụ́ ámvụ́ Ẽfĩrónĩ ꞌbá Hị́tị̃rú rĩ drị̂ agá, ³⁰ ꞌdĩ ꞌbụ́ ámvụ́ Mãkĩpélã drị̂ agá ãni rú Mãmírẽ Kãnánĩ gá rĩ gá ándrá Ịbụrahị́mụ̃ ꞌbã ĩgbãlé Ẽfĩrónĩ Hị́tị̃rú rĩ drị́ ámvụ́ trũ ãngũ sĩ ꞌbá ị̃sị̃jó rĩrú rĩ ꞌi, ³¹ ãngũ ándrá Ịbụrahị́mụ̃ kí ị̃sị̃jó Sárã be rĩ, Ĩsákã kí ũkû Rẽbékã be ãzíla mâ sĩ Léyã ị̃sị̃jó rĩ. ³² Ámvụ́ ꞌi ꞌbụ́ ala gá rĩ abe îgbã kí angájó ꞌbá Hị́tị̃rú rĩ ꞌba drị́.” ³³ Yãkóꞌbõ lã mụ ị́jọ́ ĩꞌdidrị̂ kí delé azịlé ꞌbo, laru vúlé gbọ́lọ́ sị́ gâlé, ãvẹ̃vị̃ la ukó dó rá.