Íꞌdóŋá 48

Yãkóꞌbõ wi sụ̃sụ́ Ịfụrayị́mụ̃ ꞌbaní Mãnásẽ be

¹ Ụ́ꞌdụ́ ãlu ụ́ꞌdụ́kọ́ acá Yụ̃sụ́fụ̃ní, “Mî átẹ́pị ãyánĩ la ũnzí.” Yụ̃sụ́fụ̃ mụ ị́jọ́ ꞌdĩ sĩ ĩꞌdi ndrelé ꞌdụ ngọ́pịka ị̃rị̃ Mãnásẽ kí Ịfụrayị́mụ̃ be ĩndĩ. ² Yãkóꞌbõ la mụ arelé la ngọ́pị̃ Yụ̃sụ́fụ̃ acá ꞌbo, imbá ru rijó ị̃ndụ́ sĩ gbọ́lọ́ sị́ gá.

³ Yãkóꞌbõ jọ ngọ́pị̃ Yụ̃sụ́fụ̃ní, “Ãdróŋá Ũkpó ꞌdị́pị iꞌda ándráru mání Lụ́zị̃ gá ꞌdĩ ãngũ Kãnánĩ gá, ꞌdãá wi mání sụ̃sụ́, ⁴ jọ mání, ‘Ma fẽ míní kpẹ̃lé ũꞌbíkãnáru mi acá ꞌbá amụtị trũ wẽwẽ rú la ma ãngũ ꞌdĩ fẽ míní mî drị̃lẹ́ abe jã ꞌdâ.’ ⁵ Ị́jọ́ ꞌdĩ sĩ, mî ngọ́pịka tịlé ị̃rị̃ Mị̃sị́rị̃ gá ꞌdâ ịsụ́ má amụ́ drĩ míní ꞌdâ ku rĩ kí mâ anzị rú; Ịfụrayị́mụ̃ kí Mãnásẽ be kí má ãni. Cécé Rụ́bẹ̃nị̃ kí Sị̃mọ́nị̃ be adrujó má ãni rĩ áni.

⁶ “Anzịŋá tịlé míní kí vúlé gá rĩ kí dó adru má ãni. Ãngũ ĩꞌbã kí mụlé ịsụ́lé ĩꞌbanî rĩ ála kí la ádrị́pịka kí agá ádrị́pịrú ími kẹ̃jị́ gá rụ́ ĩꞌbadrị̂ sĩ. ⁷ Ma ị́jọ́ ꞌdĩ idé íni la mí ãndrẽ Rãkẹ́lị̃ ꞌbã ị́jọ́ sĩ, mâ ãgõjó angájó Mẽsõpõtámĩyã gá rĩ sĩ mí ãndrẽ drã gẹ̃rị̃ gá ꞌdĩ Ẽfĩrátĩ gá má ị̃sị̃ ĩꞌdi ũcõgõ la mání ãmbógóru ambamba.” ⁸ Yãkóꞌbõ la mụ anzị Yụ̃sụ́fụ̃ drị̂ kí ndrelé ꞌbo, zị kí, “Anzị ꞌdĩ kí dó íngo kî yã?” ⁹ Yụ̃sụ́fụ̃ umvi, “ꞌDi kí anzị Ãdróŋá ꞌbã fẽlé mání Mị̃sị́rị̃ gá ꞌdâ rĩ kî.” Yãkóꞌbõ jọ, “Mí ají kí má rụ́ ꞌdõlé ma sĩ ĩꞌbaní sụ̃sụ́ wi.” ¹⁰ Ãmbã sĩ Yãkóꞌbõ ꞌbã mịfị́ ndre kí dó ãngũ múké-múké ku. Yụ̃sụ́fụ̃ ají dó anzị kí ĩꞌdi rụ́ ꞌdõlé rá, Yãkóꞌbõ amvu kí ndru kí kpõlókõ wi dó sụ̃sụ́ ĩꞌbanî. ¹¹ ꞌDã ꞌbã ũngúkú gá Yãkóꞌbõ jọ Yụ̃sụ́fụ̃ní, “Áꞌbã ándrá áma ásị́ gá ma ími ndre ị̃dị́ rá la ku, wó Ãdróŋá fẽ dó vâ ándre mî anzị kí ĩndĩ.” ¹² Yụ̃sụ́fụ̃ ꞌdụ anzị ꞌdĩ kí ĩꞌbã áyị́pị ị̃lị́ gá rĩ sĩ rá su drị̃ vụ̃rụ́ ị̃nzị̃táŋáru ĩꞌdi drị̃lẹ́ gá.

¹³ Yụ̃sụ́fụ̃ ꞌbã Ịfụrayị́mụ̃ Yãkóꞌbõ ꞌbã drị́ ị̃jị́ gá Mãnásẽ Yãkóꞌbõ ꞌbã drị́ ãndá gá. ¹⁴ Wó Yãkóꞌbõ aca ru drị́ kí ꞌbã drị́ ãndá rĩ Ịfụrayị́mụ̃ drị̃ gá ĩꞌdi táni adrujó ngọ́tị́ŋáru tí, ꞌbã drị́ ị̃jị́ rĩ Mãnásẽ drị̃ gá ngọ́tị́ kãyú rĩ.

¹⁵ Wi sụ̃sụ́ Yụ̃sụ́fụ̃ní ngọ́pịka abe jọ, “Ãdróŋá mâ áyị́pị ãzíla mâ átẹ́pị Ĩsákã ꞌbã kí ị̃nzị̃lé rĩ ꞌbã wi sụ̃sụ́ anzị ꞌdĩ ꞌbaní Ãdróŋá áma ajílépi kpere ãndrũ rĩ ꞌbã mba vâ kí tã. ¹⁶ Mãlãyíkã Ãdróŋá drị́ áma apálépi ị́jọ́ ũcõgõrú rĩ kí agá rĩ ꞌbã ko kí ãzã! Áma rụ́ ãzíla mâ átẹ́pị Ĩsákã ꞌi má áyị́pị Ịbụrahị́mụ̃ ꞌbã rụ́ ꞌbã ãvĩrú sĩ ku.”

¹⁷ Yụ̃sụ́fụ̃ la dó mụ ndrelé la ꞌî átẹ́pị ꞌbã drị́ ãndá rĩ Ịfụrayị́mụ̃ drị̃ gá uꞌá cãndí sĩ ꞌdụ drị́ la Ịfụrayị́mụ̃ drị̃ gá rĩ sĩ uja dó ꞌbãlé la Mãnásẽ drị̃ gá, ¹⁸ uja jọlé la, “Má átẹ́pị adru ꞌdĩ ꞌbã áni ku ngọ́tị́ŋá kãyú rĩ ĩꞌdi Mãnásẽ ꞌi.” ¹⁹ Átẹ́pị̃ gã úmgbé jọ, “Mâ ngọ́pị ánị̃ ị́jọ́ ꞌdĩ rá, drị̃lẹ́ Mãnásẽ drị̂ kí acá ũꞌbíru wó ĩꞌdi adru sụ́rụ́ ãmbógó la. ꞌBo ádrị́pị̃ wereŋá Ịfụrayị́mụ̃ ꞌbã drị̃lẹ́ kí adru wẽwẽ rú ĩꞌdidrị̂ ãndânĩ. Ãzíla drị̃lẹ́ ĩꞌdidrị̂ kí adru sụ́rụ́ ãmbógó la.”

²⁰ Wi ĩꞌbaní sụ̃sụ́ jọ, “ꞌBá Ịsịrayị́lị̃ gá rĩ kírú ĩꞌdirú umve sĩ sụ̃sụ́ ãlá rĩ ịsụ́jó. Kírú jọ la Ãdróŋá ꞌbã ꞌbã mi cécé Ịfụrayị́mụ̃ ãzíla Mãnásẽ áni.” Ị́jọ́ ꞌdĩ sĩ, Yãkóꞌbõ ꞌbã dó Ịfụrayị́mụ̃ ꞌi Mãnásẽ drị̃lẹ́ gá. ²¹ Yãkóꞌbõ jọ Yụ̃sụ́fụ̃ní, “Ma úgólé drãlé drã-drã, wó Ãdróŋá ꞌbã mba ími tã ꞌbã uja vâ mi vúlé ãngũ mî áyị́pị ꞌba drị́ Kãnánĩ gá rĩ gá. ²² Ãzíla míní áfẽ ãngũ ꞌbã wókõ mâ apálé ꞌbá Ãmọ́rị̃rú rĩ ꞌba drị́ ménéŋá sĩ ụ́sụ má drị̂ sĩ rĩ mî adrujó mî ádrị́pịka kí drị̃lẹ́ gá rĩ sĩ.”