Íꞌdóŋá 47

Fãráwũ fẽ Gõsénĩ ꞌi Yãkóꞌbõní anzị ĩꞌdidrị̂ abe

¹ Yụ̃sụ́fụ̃ mụ dó Fãráwũ rụ̂lé jọ ĩꞌdiní, “Mâ átẹ́pị angájó Kãnánĩ gâlé rĩ sĩ acá kí mâ ádrị́pịka kî trũ ãnãkpá ũꞌbínírí rĩ kí ãzíla use rĩ kî trũ, ãko pírí ĩꞌba ãni rú rĩ kî trũ kî dó Gõsénĩ gâlé ꞌdã.”

² Ũpẽ ádrị́pịka kí tõwú iꞌda kí Fãráwũ nî.

³ Fãráwũ zị ádrị́pịka kí, “Ĩmi ãꞌdu ãzị́ nga yã?” Ádrị́pịka umvi kí, “Ãmbógó, ãma ꞌbá kãbĩlõ ucélépi la, ãmã áyị́pịka kî áni.” Jọ kí vâ, ⁴ “Ãma amụ́ uꞌálé Mị̃sị́rị̃ gá ꞌdõlé íni la ị̃rẹ́bị́ ca ãnãkpá ãmadrị̂ ꞌbaní ku, ãzíla rílẽ ꞌdĩ ãngũ Kãnánĩ gâlé ũnzí; ị́jọ́ ꞌdĩ sĩ ãꞌbã mãmálá ími drị̃lẹ́ gá ífẽ ãma uꞌá Gõsénĩ gá ꞌdâ.” ⁵ Fãráwũ jọ Yụ̃sụ́fụ̃ní, “Mî átẹ́pị ãzíla mî ádrị́pịka amụ́ kí mí rụ́, ⁶ mí amá ãngũ mî ndrelé múké kí sĩ rĩ ala gá rĩ, ífẽ ĩꞌbaní ãngũ ũnĩ-ambamba Mị̃sị́rị̃ gá ꞌdâ rĩ. Gõsénĩ la adru múké. Ídrĩ ãlị́gọ́ ãzí ịsụ́ kí agá ꞌdâ, íꞌbã ĩꞌdi ãnãkpá má drị̂ kí tãmbalé.” ⁷ Yụ̃sụ́fụ̃ ají átẹ́pị̃ Yãkóꞌbõ iꞌdalé Fãráwũ nî, Yãkóꞌbõ wi sụ̃sụ́ Fãráwũ nî.

⁸ Fãráwũ zị ĩꞌdi, “Ími ílí sị́ yã?” ⁹ Yãkóꞌbõ umvi, “Áma ílí ca dó túrú ãlu kãlị́ na rĩ kí vâ adrulé ũcõgõrú, adru kí trútrũ ándrá mâ átẹ́pịka ꞌbã rĩ áni ku.” ¹⁰ Yãkóꞌbõ wi dó sụ̃sụ́ Fãráwũ ní ị̃dị́ aꞌbe dó ĩꞌdi ĩndõ. ¹¹ Yụ̃sụ́fụ̃ fẽ átẹ́pị̃ ꞌbaní rilé ádrị́pịka abe ãngũ ũnĩ-ambamba Mị̃sị́rị̃ drị̂ gá ꞌdĩ Rãmãsésẽ gá Fãráwũ ꞌbã lũlé rĩ áni. ¹² Yụ̃sụ́fụ̃ fẽ dó ãkónã átẹ́pị̃ ꞌbaní ádrị́pịka abe ꞌbá pírí átẹ́pị̃ drị́ko gá rĩ ꞌbaní calépi rá rĩ sĩ.

Rílẽ

¹³ Rílẽ ꞌdã ꞌbãngá ũkpómgboroto, ãkónã ãngũ pírí kí agá ꞌdáyụ, Mị̃sị́rị̃ kí Kãnánĩ be ị̃rị̃ trá iza kíru ãbị́rị́ ị́jọ́ sĩ. ¹⁴ Yụ̃sụ́fụ̃ tra séndẽ icólé ịsụ́lé Mị̃sị́rị̃ gá Kãnánĩ be rĩ kí pírí sĩ íná ufujó, agụ kí lómúre Fãráwũ drị̂ gá.

¹⁵ Séndẽ ꞌbá Mị̃sị́rị̃ gá ãzíla ꞌbá Kãnánĩ gá rĩ ꞌba drị̂ kí mụ ukólé kpírĩ kpírĩ, amụ́ kí Yụ̃sụ́fụ̃ rụ́, áwáŋâ trũ ãkónã ị́jọ́ sĩ jọ kí, “Séndẽ ãmadrị̂ ukó kí rá, ãma ũdrã rá ãjó yã? Ífẽ ãmaní ãkónã.” ¹⁶ Yụ̃sụ́fụ̃ umvi ĩꞌbaní, “Wó múké, úꞌdîꞌda séndẽ ĩmidrị̂ ukó kí rá ĩmi ãfẽ mání ãnãkpá ĩmidrị̂ kî. Ma ĩminí íná fẽ ãrígó la gá rá.” ¹⁷ Fẽ kí dó ãnãkpá ĩꞌbadrị̂ kí Yụ̃sụ́fụ̃ drị́ sĩ ãkónã ufujó; fãrásĩ, kãbĩlõ, ị̃ndrị́, tị́ ãzíla kãyĩnõ kî trũ. Wó ãko ꞌdã agụ kí ílí ꞌdã pírí. ¹⁸ Ílí ꞌdã lã mụ ukólé ꞌbo, amụ́ kí vâ ĩꞌdi rụ́ ꞌdõlé jọ kí, “Séndẽ ãmadrị̂ ukó kí rá ãzíla ãmã ãnãkpá kî dó pírí má ãni. Wó ãko ãzí dóru acelépi la ãluŋá la ꞌdáyụ. Lú ãma ụrụꞌbá ãzíla ãngũ. ¹⁹ Ãma dó ũdrã mịfị́ trũ tẽrẽ ími drị̃ gâ sĩ íngoníru? Mí ĩgbã ãma ãzíla ãngũ ãmadrị̂ kí ãma sĩ íná ịsụ́, ãma dó acá ãtíꞌbó Fãráwũ ãni. Ífẽ ãmaní ãná ãma sĩ ãma pa ídri ãzíla ãngũ ꞌbã ace ru ị̃sálị ándrúru ku.” ²⁰ Yụ̃sụ́fụ̃ ĩgbã dó ãngũ Mị̃sị́rị̃ gá rĩ ị̃tụ̃ndrã kí ámvụ́ ĩꞌbadrị̂ kí pírí rílẽ ꞌdã ꞌbã adrujó ũnzí rĩ sĩ. Ãngũ ĩꞌbadrị̂ dó sĩ pírí Fãráwũ ãni.

²¹ ꞌBá acá kí pírí ãtíꞌbó Fãráwũ ãni larú, iꞌdójó Mị̃sị́rị̃ ꞌbã wókõ pírí sĩ. ²² Ãngũ ĩꞌdi ꞌbã ĩgbãlé ku rĩ ꞌbãngá lú ꞌbá uwiŋá idélépi rĩ ꞌba drị̂ ꞌi ãꞌdusĩku ĩꞌbã kí ãkónã ịsụ́jó wókõ Fãráwũ rụ́ sĩ rĩ sĩ icó kí ãngũ ĩꞌbadrị̂ kí ị̃tụ̃ndãlé ku. ²³ Yụ̃sụ́fụ̃ jọ ꞌbá ꞌbaní, “Úꞌdîꞌda má ĩgbã dó ãndrũ ĩmi ãngũ ĩmidrị̂ trũ pírí Fãráwũ ní ꞌbo, ũri kî dó ꞌdĩ, ị̃kpẹ̃ dó ámvụ́ kî. ²⁴ Wó ũri drĩ kî ka rá lãŋá la gá wókõ la ãlu tõwú agá rĩ lẽ úfẽ ĩꞌdi Fãráwũ drị́, wó sụ tõwú agá rĩ dó ĩmi ãni íná ru ãzíla ũrirú ꞌbá mí drị́ko gá rĩ kí abe.” ²⁵ Jọ kí dó ĩꞌdiní, “Ípa ãna ídri ꞌbo, ími ásị́ ꞌbã adru ãmaní ị̃gbẹ́ru ãma adru Fãráwũ pálé gá ãtíꞌbóru rá fô.” ²⁶ Yụ̃sụ́fụ̃ ꞌbã dó ị́jọ́ ꞌdĩ ãzị́táŋáru ãngũ Mị̃sị́rị̃ gá kpere ãndrũ, ãko ãlu tõwú agá rĩ Fãráwũ ãni, pẽ lú ꞌbá uwiŋá idélépi rĩ ꞌbã ãngũ adru Fãráwũ ãni ku la nĩ. ²⁷ ꞌBá Ịsịrayị́lị̃ drị̂ rĩ kí Mị̃sị́rị̃ gá ãngũ Gõsénĩ ꞌi rĩ gá, Ịsụ́ kí málĩ, tị́ kí vâ wẽwẽ rú. ²⁸ Yãkóꞌbõ uꞌá Mị̃sị́rị̃ gá ílí mụdrị́ drị̃ ázị̂rị̃, ílí ĩꞌdidrị́ ĩꞌdi ꞌbã adrujó ídrirú rĩ túrú ãlu kãlị́ sụ drị̃ la ázị̂rị̃. ²⁹ Ílí ĩꞌdiní drãjórĩ la mụ acálé ãni rú, umve ngọ́pị̃ Yụ̃sụ́fụ̃ ꞌi jọ ĩꞌdiní, “Ími ásị́ drĩ adru mâ áni ị̃gbẹ́ru, íꞌbã ími drị́ áma ị̃lị́ gá ꞌdâ ína ũyõrú, mí ãꞌị̃ rá mi ị́jọ́ mâ jọlé ꞌdĩ idé rá ãndá ãndáru, mí ị̃sị̃ ma Mị̃sị́rị̃ gá ꞌdâ ku, má azị míní ꞌdĩ, ³⁰ ádrĩ dó mị bĩ rá cécé mâ átẹ́pị ꞌba drị̂ áni, mí agụ ma Mị̃sị́rị̃ gá ꞌdâ rĩ sĩ ị̃sị̃lé ĩꞌba rụ̂lé.” Umvi ĩꞌdiní, “Ma ị́jọ́ mî jọlé ꞌdĩ idé rá.” ³¹ Yãkóꞌbõ jọ, “Ína dó úyóru.” Yụ̃sụ́fụ̃ na dó ũyõ rá, Yãkóꞌbõ ãvụ̃ dó gbọ́lọ́ sị̂lé fẽ dó ãwãꞌdĩfô ị̃nzị̃táŋâ trũ.