Íꞌdóŋá 46

Yãkóꞌbõ mụ dó Mị̃sị́rị̃ gá

¹ Yãkóꞌbõ ko dó drị̃ mụlé Mị̃sị́rị̃ gá ãko ĩꞌdidrị̂ kí abe pírí. Ĩꞌdi mụ calé Bẹ̃rị̃sẹ́bã gá ꞌbo, idé uwiŋá Ãdróŋá átẹ́pị Ĩsákã drị̂ nî. ² Ị́nị́ ágágá Ãdróŋá jọ ị́jọ́ ĩꞌdiní urobí agâ sĩ umve ĩꞌdi, “Yãkóꞌbõ, Yãkóꞌbõ!” Yãkóꞌbõ ãꞌị̃, “Wõyí, ma ꞌdõ.” ³ Ãdróŋá jọ ĩꞌdiní, “Ma Ãdróŋá mî átẹ́pị drị̂ ꞌi. Mí idé ụ̃rị̃ sĩ mụjó ándrá Mị̃sị́rị̃ gâlé ku, ãꞌdusĩku ma fẽ mi acá sụ́rụ́ ãmbógó larú. ⁴ Mâ mụ Mị̃sị́rị̃ gá ándrâlé mi be, ma mî drị̃lẹ́ kí uja vúlé ꞌdõlé rá ãndândáru mi drã Yụ̃sụ́fụ̃ drị́ gá.” ⁵ Yãkóꞌbõ aꞌbe dó Bẹ̃rị̃sẹ́bã ꞌi, anzị ĩꞌdidrị̂ agụ kí dó ĩꞌdi, ꞌdụ kí anzị ĩꞌbadrị̂ kí ũkúka abe gãlĩgãlĩ Fãráwũ ꞌbã ãfẽlé kí agụjó rĩ sĩ. ⁶ ꞌDụ kí ĩꞌbã ãnãkpá kí ãko ĩꞌbã kí ịsụ́lé ãngũ Kãnánĩ gâlé rĩ kî trũ fijó Mị̃sị́rị̃ gá. ⁷ Fi Mị̃sị́rị̃ gâlé anzị ĩꞌdidrị̂ abe, anzị ĩꞌdidrị̂ ꞌbã izonziŋá kí ngọ́pịka ĩꞌdi umvelépi áyị́pị rĩ abe mụ dô sĩ drị̃lẹ́ ĩꞌdi kî trũ pírí. ⁸ ꞌDĩ kî dó rụ́ anzị Yãkóꞌbõ drị́ Ịsịrayị́lị̃ ꞌbã ũrirú mụlépi ĩꞌdi be Mị̃sị́rị̃ gá rĩ kî. Ngọ́tị́ŋá ĩꞌdidrị́ kãjãní rĩ ĩꞌdi Rụ́bẹ̃nị̃ ꞌi. ⁹ Anzị Rụ́bẹ̃nị̃ drị̂ kí rụ́ Hãnókĩ ꞌi, Pálũ ꞌi, Hẽzĩrónĩ ꞌi ãzíla Kãrị́mị̃ ꞌi.

¹⁰ Anzị Sị̃mọ́nị̃ drị̂ kí rụ́ Yẽmụ́ẹ́lĩ ꞌi, Yãmínĩ ꞌi, Ũhádĩ ꞌi, Yãkínĩ ꞌi, Zóhãrĩ ꞌi ãzíla Sáụ̃lụ̃ andre la ꞌbã adrujó Kãnánĩrú rĩ ꞌi. ¹¹ Anzị Lẹ́vị̃ drị̂ kí rụ́ Gị́rị́sọ̃nị̃ ꞌi, Kóhãtĩ ꞌi ãzíla Mẽrárĩ ꞌi. ¹² Anzị Yụ́dãsị̃ drị̂ kí rụ́ Érĩ ꞌi, Ũnánĩ ꞌi, Sélã ꞌi, Pẹ̃rẹ́zị̃ ꞌi ãzíla Zérã ꞌi, (wó Érĩ kí Ũnánĩ be ũdrã kí Kãnánĩ gâlé) anzị Pẹ̃rẹ́zị̃ drị̂ kí Hẽzĩrónĩ kí Hãmụ́lị̃ be.

¹³ Anzị Ĩsãkárĩ drị̂ kí rụ́ Tólã ꞌi, Púvã ꞌi, Yãsúbũ ꞌi ãzíla Sĩmĩrónĩ ꞌi. ¹⁴ Anzị Zãbụ̃lọ́nị̃ drị̂ kí rụ́ Sẹ̃rẹ́dị̃ ꞌi, Élõnĩ ꞌi ãzíla Yãlẹ́lị̃ ꞌi. ¹⁵ ꞌDĩ kí anzị Léyã ꞌbã tịlé Yãkóꞌbõní Mẽsõpõtámĩyã gá rĩ kî ĩzóŋá la Dị́nã ꞌi, kí pírí rĩ gá kãlị́ na drị̃ na.

¹⁶ Anzị Gádĩ drị̂ kí rụ́ Zĩfórĩ ꞌi, Hágĩ ꞌi, Sụ́nị̃ ꞌi, Hẽzĩbónĩ ꞌi, Érĩ ꞌi, Hãródĩ ꞌi ãzíla Ãrẹ́lị̃ ꞌi. ¹⁷ Anzị Ásẹ̃rị̃ drị̂ kí rụ́ Ĩmínã ꞌi, Ĩsívã ꞌi, Ĩsívĩ ꞌi, Bẽríã ꞌi kí ámvọ́pị̃ Sérã be. Anzị Bẽríã drị̂ kí Hébẽrĩ kí Mãlĩkélĩ be.

¹⁸ ꞌDĩ kí anzị Zị̃lị́pã ándrá Lãbánĩ ꞌbã fẽlé Léyã be rĩ ꞌbã tịlé Yãkóꞌbõní rĩ kî. Anzị kí pírí rĩ gá mụdrị́ drị̃ la ázíyá. ¹⁹ Anzị Yãkóꞌbõ ꞌbã ũkú Rẽbékã drị̂ kí Yụ̃sụ́fụ̃ kí Bénzãmĩnĩ be. ²⁰ Mị̃sị́rị̃ gâlé Ãsĩnátã Põtĩfárõ ãmbógó uwiŋá idélépi Hẹ̃lị̃pọ́lị̃ gá rĩ ꞌbã ị̃zẹ́pị tị Yụ̃sụ́fụ̃ní Mãnásẽ kí Ịfụrayị́mụ̃ be. ²¹ Anzị Bénzãmĩnĩ drị̂ kí rụ́ Bélã ꞌi, Bẽkérĩ ꞌi, Ãsĩbélĩ ꞌi, Gérã ꞌi, Nãmánĩ ꞌi, Éhĩ ꞌi, Rọ́sị̃ ꞌi, Mũpímũ ꞌi, Hũpímũ ꞌi ãzíla Ãrídĩ ꞌi. ²² Anzị Rãkẹ́lị̃ ꞌbã tịlé Yãkóꞌbõní rĩ kí pírí mụdrị́ drị̃ la sụ.

²³ Ngọ́tị́ŋá Dánĩ drị̂ rụ́ Hũsímõ ꞌi. ²⁴ Anzị Nãfũtálĩ drị̂ kí rụ́ Yãzélĩ ꞌi, Gụ́nị̃ ꞌi, Yẹ̃zị́ẹ́rị̃ ꞌi ãzíla Sĩlémũ ꞌi, ²⁵ Bílã ãtíꞌbó Lãbánĩní fẽlé ị̃zẹ́pị̃ Rãkẹ́lị̃ní rĩ, tị Yãkóꞌbõní anzị kí pírí rĩ gá ázị̂rị̃. ²⁶ Anzị mụlépi Mị̃sị́rị̃ gá ãfũlépi Yãkóꞌbõ ꞌbã ụrụꞌbá gá rĩ kí pírí kãlị́ ázíyá drị̃ la ázíyá. Úlã gẹ̃rị̃ sĩ ãnzị́pịka ꞌbã ũkúka kí ku. ²⁷ Yụ̃sụ́fụ̃ tị vâ anzị kí Mị̃sị́rị̃ gâlé ị̃rị̃; ꞌbá Yãkóꞌbõ drị́ko gá Mị̃sị́rị̃ gâlé rĩ kí pírí kãlị́ ázị̂rị̃.

²⁸ Yãkóꞌbõ pẽ ngọ́pị̃ Yụ́dãsị̃ tị Yụ̃sụ́fụ̃ rụ́ drị̃ gâlé mụ gẹ̃rị̃ mụjó Gõsénĩ gá rĩ zịjó. Kî dó mụ calé Gõsénĩ gâlé pírí ꞌbo, ²⁹ Yụ̃sụ́fụ̃ itú gãlĩgãlĩ ĩꞌdidrị̂ kí bábá mụ dó drị̃ ụfụlé átẹ́pị̃ be. Yụ̃sụ́fụ̃ la mụru iꞌdalé ĩꞌdi drị̃lẹ́ gá ꞌbo, amvu dó átẹ́pị̃ gbũrúkã gá awá dó mị́ndrẹ sĩ sáwã ãzorú. ³⁰ Yãkóꞌbõ jọ dó ngọ́pị̃ Yụ̃sụ́fụ̃ní, “Ma dó bábá drãjó ãꞌdusĩku ándre dó mi drĩ ídri rĩ gá ꞌbo.” ³¹ Yụ̃sụ́fụ̃ jọ ádrị́pịka ꞌbaní ꞌbá átẹ́pị̃ drị́ko gá rĩ abe, “Ma mụ jọlé la Fãráwũ ní mâ ádrị́pịka kí ꞌbá mâ átẹ́pị drị́ko gá rĩ abe, ãko pírí ĩꞌbadrị̂ kî trũ iyá kí má rụ́ ꞌdõlé ꞌbo angájó Kãnánĩ gâlé. ³² ꞌBá má drị́ ꞌda kí ꞌbá ãnãkpá tãmbalépi la, ají kí ãnãkpá ĩꞌbadrị̂ kí ãzíla ãko pírí ĩꞌbadrị̂ kí ĩndĩ. ³³ Fãráwũ drĩ ĩmi umve jó agâlé, drĩ zị la ãzị́ ĩmidrị̂ ãꞌdu yã? ³⁴ Ĩmi umvi ĩꞌdiní, ‘Ãma ꞌbá ãnãkpá tãmbalépi la ándrá ãmã átẹ́pịka ꞌba drị̂ áni iꞌdójó ãnzị̃rị̃ŋã sĩ.’ Ĩdrĩ jọ la íni ĩꞌdi ãꞌị̃ ĩminí uꞌájó ãngũ Gõsénĩ gá rá, ãꞌdusĩku ꞌbá Mị̃sị́rị̃ gá rĩ ꞌbã kí ꞌbá ãnãkpá tãmbalépi rĩ kí lẽjó ku rĩ sĩ.”