Íꞌdóŋá 45

Yụ̃sụ́fụ̃níru iꞌdajó ádrị́pịka ꞌbanî rĩ

¹ Yụ̃sụ́fụ̃ icó dó ị́jọ́ ĩꞌdi ásị́ gá rĩ talé ãtiꞌbo ĩꞌdidrị̂ kí drị̃ gâ sĩ ku, ị́jọ́ ꞌdĩ sĩ jọ ĩꞌbaní lẽ ꞌbã fũ kí jó agá ꞌdâ rĩ sĩ ãmvé. ꞌBá ãzí ndú la ãlu ĩꞌdi rụ́ ꞌdãá yụ sáwã ĩꞌdiní lũjó la ádrị́pịka ꞌbaní ꞌi ãꞌdi ꞌi yã rĩ sĩ. ² Rĩ awálé ụ́ꞌdụ́kọ́ sĩ rere fẽ vâ sĩ ꞌbá Mị̃sị́rị̃rú ꞌdĩ are kí ĩꞌdi ꞌbã áwáŋá rá, ãzíla ụ́ꞌdụ́kọ́ ꞌdĩ âgụ ĩꞌdi úpí Fãráwũ drị́ko gâlé. ³ Yụ̃sụ́fụ̃ jọ ádrị́pịka ꞌbaní, “Ma Yụ̃sụ́fụ̃ ꞌi. Mâ átẹ́pị ĩꞌdi drĩ ídrirú yã?” Wó ádrị́pịka icó kí ĩꞌdi umvilé ku ãꞌdusĩku ásị́ la mvu kí ụ̃rị̃ sĩ ambamba ĩꞌbaní arejó la ꞌdĩ ĩꞌbã ádrị́pị Yụ̃sụ́fụ̃ ꞌi rĩ sĩ. ⁴ Yụ̃sụ́fụ̃ jọ ĩꞌbaní, “Ĩmi asé ĩmi má rụ́ ꞌdõlé ãni rú.” Ị́jọ́ ꞌdĩ sĩ, asé kí dóru ãni rú ĩꞌdi rụ́ ꞌdõlé. Jọ ĩꞌbaní, “Ma ĩmi ádrị́pị Yụ̃sụ́fụ̃ ándrá ĩminí ị̃tụ̃ndãlé Mị̃sị́rị̃ gá rĩ ꞌi. ⁵ Lẽ ĩmi ásị́ ꞌbã umvú sĩ jọjó la ĩmi idé ándrá ị́jọ́ ꞌdĩ áma ụrụꞌbá gá ꞌdĩ áni rĩ sĩ. Ãndá ãndáru ĩꞌdi Ãdróŋá ꞌi áma tị ãpẽlépi drị̃ gá ꞌdõlé amụ́jó ꞌbá kí ídri upajó rĩ. ⁶ ꞌDĩ drĩ lú ílí ị̃rị̃ rílẽ aꞌdélépi ãngũ drị̃ gá ꞌdâ rĩ drị̂ ꞌi; ílí ace vúlêlé tõwú ꞌbá ꞌbaní ámvụ́ sõjó jõku ũri trajó ku rĩ ꞌi. ⁷ Ãdróŋá ãpẽ áma tị ĩmi drị̃lẹ́ gá ꞌdõlé ĩmi upajó gẹ̃rị̃ ụ̃sụ̃táŋáru ꞌdĩ áni rĩ sĩ ãzíla fẽjó la ĩmi ãzíla ĩmĩ drị̃lẹ́ ꞌbaní adrujó ídri benĩ. ⁸ Ị́jọ́ ꞌdĩ sĩ, mgbã rĩ sĩ adru ĩmi ꞌi áma tị ãpẽlépi ꞌdõlé rĩ ꞌi ku wó Ãdróŋá ꞌi. Fẽ má acá úpí Fãráwũ ꞌbã ꞌbá ãmbógó larú. Ma ãmbógóru ĩꞌdidrị́ ãngũ rĩ drị̃ gá ꞌdâ pírí; ma Mị̃sị́rị̃ drị̃ ce ma ꞌi.

⁹ “Úꞌdîꞌda ĩgõ mâ átẹ́pị rụ̂lé mbẽlẽrú, íjọ ĩꞌdiní ị́jọ́ ꞌdĩ mî ngọ́pị Yụ̃sụ́fụ̃ ꞌbã jọlé rĩ ꞌi: ‘Ãdróŋá ꞌbã ma Mị̃sị́rị̃ drị̃ celé; mí amụ́ má rụ́ ꞌdõlé sáwã izaŋâ kóru. ¹⁰ Mí icó uꞌálé ãngũ Gõsénĩ gá, mi adru áma andre gá ãni rú mi ꞌi, mî anzị kí, mî anzị ꞌbã anzị kí, kãbĩlõ mídrị̂ kí, ị̃ndrị́ kí, tị́ kí ãzíla ãko pírí mî trũ adrujó rĩ kí abe. ¹¹ Ídrĩ uꞌá ãngũ Gõsénĩ gá, ma ĩmi tãmba rá. Ílí rílẽ drị̂ ace kí drĩ tõwú ị̃dị́; álẽ mi ꞌi, ꞌbá mídrị̂ kí, ãzíla ãnãkpá mídrị̂ ꞌbã ũdrã kí ãbị́rị́ sĩ ku.’”

¹² Yụ̃sụ́fụ̃ mụ drị̃ gá jọ, “Ĩmi pírí Bénzãmĩnĩ trũ, ĩndre dó ꞌdã pịrị-pịrị Yụ̃sụ́fụ̃ ꞌi. ¹³ Ĩlũ mâ átẹ́pịní áma ũkpõ Mị̃sị́rị̃ gá ꞌdõlé íngõpí yã rĩ ãzíla ĩmi ũlũ ĩꞌdiní ãko pírí ĩminí ndrelé ꞌdĩ kî. Ĩmụ mbẽlẽrú ĩmi ají ĩꞌdi ꞌdõlé.”

¹⁴ Amvu ádrị́pị̃ Bénzãmĩnĩ ꞌi ãzíla iꞌdó awálé; Bénzãmĩnĩ ꞌbe vâru áwáŋá gá ĩndĩ ĩꞌbaníru amvu agá ꞌdâ. ¹⁵ ꞌDĩ ꞌbã vúlé gá ĩꞌdiní drĩ awá agá awá-awâ, amvu kíru ádrị́pịka kí abe ãlu kí mị́ndrẹ la dị̃ râ sĩ. ꞌDĩ ꞌbã ũngúkú gá, ádrị́pịka iꞌdó kí dó ị́jọ́ jọlé ĩꞌdi abe.

¹⁶ Ụ́ꞌdụ́kọ́ ꞌdĩ la mụ calé úpí Fãráwũ drị́ lị́cọ́ gá, Yụ̃sụ́fụ̃ ꞌbã ádrị́pịka amụ́ kí nĩ, úpí kí ãmbogo ĩꞌdidrị́ ãzí ꞌdĩ abe uꞌá kí ãyĩkõ sĩ. ¹⁷ Jọ Yụ̃sụ́fụ̃ní, “Íjọ mî ádrị́pịka ꞌbaní ĩꞌbã mụ̃zị́gọ̃ kí ũꞌbãjó kãyĩnõ kí drị̃ gá trũ gõjó ãngũ Kãnánĩ gá. ¹⁸ ꞌBa aꞌdụ́ kí átẹ́pị̃ ꞌi ãzíla ꞌbá ĩꞌbadrị̂ kî trũ ꞌbã ãgõ kí vúlé ꞌdõlé. Ma ĩꞌbaní amụ́ ãngũ ũnĩ-ambamba ãndânĩ Mị̃sị́rị̃ gá ꞌdâ la fẽlé, ma vâ ĩꞌbaní ãko kí fẽ tré ĩꞌbanî sĩ icójó uꞌájó ụ́ꞌdụ́ ãzo rú benĩ. ¹⁹ Ílũ vâ ĩꞌbaní gãlĩgãlĩ kí ꞌdụjó Mị̃sị́rị̃ gá ꞌdâ sĩ ũkúka kí ajíjó, anzị abe ãzíla ꞌba ají kí átẹ́pị̃ ĩꞌda abe ĩndĩ. ²⁰ ꞌBa idé kí ụ̃rị̃ sĩ ãko ĩꞌda drị̂ kí aꞌbejó vúlé rĩ sĩ ku; ãko ũnĩ-ambamba ãngũ Mị̃sị́rị̃ gá ꞌdâ ꞌdĩ kí adru ĩꞌba ãni.”

²¹ Anzị Yãkóꞌbõ drị́ ꞌdĩ idé kí cécé ꞌbání jọlé ĩꞌbanî rĩ áni. Yụ̃sụ́fụ̃ fẽ ĩꞌbaní gãlĩgãlĩ kí tá úpí Fãráwũ ꞌbã jọlé ĩꞌdiní rĩ áni, fẽ vâ ĩꞌbaní íná gẹ̃rị̃ drị̂ kí ĩndĩ. ²² Fẽ vâ ĩꞌbaní bõngó ujalé uja uja la kí ãlu-ãlu ĩndĩ, wó fẽ Bénzãmĩnĩ ní séndẽ túrú na ãzíla bõngó ujalé uja uja rĩ kí tõwú. ²³ Fẽ átẹ́pị̃ní kãyĩnõ ũniamba Mị̃sị́rị̃ gá rĩ kí mụdrị́ ãzíla kãyĩnõ mụdrị́ ínâ trũ ãzíla íná ãcị̃ ãni la kî trũ. ²⁴ Pẽ dó ádrị́pịka kí tị, ĩꞌbaní drị̃ ko agá jọ ĩꞌbaní, “Ĩmi ãwãjõ gẹ̃rị̃ gá ꞌdâ ku.”

²⁵ Aꞌbe kí Mị̃sị́rị̃ ꞌi gõ kí vúlé lị́cọ́ gá átẹ́pị̃ Yãkóꞌbõ rụ́ ãngũ Kãnánĩ gâlé. ²⁶ Jọ kí ĩꞌdiní, “Yụ̃sụ́fụ̃ drĩ kpere ídrirú! Ĩꞌdi úꞌdîꞌda ãmbógó Mị̃sị́rị̃ drị̃lẹ́ gá rĩ ꞌi.” Yãkóꞌbõ ꞌbã ásị́ mvu rá ãzíla ãꞌị̃ ị́jọ́ ĩꞌba kí jọlé rĩ ku. ²⁷ Kí mụ ị́jọ́ Yụ̃sụ́fụ̃ ꞌbã jọ́lé ĩꞌdiní ꞌdĩ kí ũlũlé pírí ꞌbo, ãzíla ĩꞌdi mụ gãlĩgãlĩ Yụ̃sụ́fụ̃ ꞌbã ãfẽlé sĩ ĩꞌdi ꞌdụjó agụjó Mị̃sị́rị̃ gá rĩ kí ndrelé ꞌbo, ásị́ la ãgõ ĩꞌdi rụ́ ꞌdõlé. ²⁸ Jọ, “Mâ ngọ́pị Yụ̃sụ́fụ̃ drĩ kpere ídrirú! Ị́jọ́ lú mání jọlé rĩ, ãwãꞌdĩfô! Lẽ ámụ ĩꞌdi ndrelé ádrã drĩ ku rú.”