Íꞌdóŋá 44

Kópõ ꞌbã ãvĩjó rĩ

¹ Yụ̃sụ́fụ̃ fẽ ãzítáŋá ãtíꞌbó ãmbógóru ĩꞌdidrị́ jó agá rĩní, “Ítõ ꞌbá ꞌdĩ ꞌba drị́ gụ̃tị́yã rĩ kí íná ĩꞌbã kí icólé ꞌdụlé rá rĩ sĩ tré-tré, ãzíla íꞌbã ꞌbá ãlu-ãlu ꞌbã séndẽ vúlé ĩꞌdidrị́ gụ̃tị́yã rĩ agá ũgũgõ. ² Íꞌbã kópõ má drị́ aya rú rĩ ĩꞌbã ádrị́pị vúléŋá rĩ drị́ gụ̃tị́yã rĩ agá séndẽ ĩꞌdi trũ.” Ãtíꞌbô idé cécé ꞌbání lũlé ĩꞌdirĩ áni. ³ Ụꞌbụ́tịnị́nị́ úpẽ dó ꞌbá ꞌdĩ kí tị mụlé ĩꞌbadrị́ kãyĩnõ kî trũ. ⁴ Mụ kí lú drĩ wereŋáru angájó táwụ̃nị̃ ãmbógó ꞌdĩ agá rĩ sĩ, Yụ̃sụ́fụ̃ jọ ãtíꞌbó ĩꞌdidrị́ ãmbógóruní, “Ídro ꞌbá ꞌdĩ kí vú mbẽlẽ-mbẽlẽ. Ídrĩ kí arụ́ ꞌbo, ízị kí, ‘Ĩmi ũfẽ ị́jọ́ ũniamba rĩ ị́jọ́ ũnzí sĩ ãꞌdu ị́jọ́ sĩ? ⁵ Ĩmi ụ̃gụ̃ ãmbógó má drị̂ ꞌbã kópõ aya rú rĩ ãꞌdu ị́jọ́ sĩ? Ĩꞌdi jõ sĩ ị̃yị̂ mvụ, ĩꞌdi jõ sĩ ị́jọ́ ndrị. Ĩmi iza ị́jọ́ ãmbógó la ꞌbo!’”

⁶ Ãtíꞌbó ꞌdĩ la mụ kí arụ́lé ꞌbo, umvi ị́jọ́ ꞌdĩ kî. ⁷ Umvi kí ĩꞌdi, “Ãmbógó ị́jọ́ míní jọlé ꞌdĩ ꞌbã ífí íngoní? Ãna úyóru ị́jọ́ ãzí ãmaní idélé ꞌdĩ áni la yụ. ⁸ Índre drĩ ãma ají séndẽ ãmaní ịsụ́lé ãmadrị́ gụ̃tị́yã kí agá rĩ kí angájó ãngũ Kãnánĩ drị̂ gâlé ꞌdõlé vúlé ĩndĩ. Ãma icó dó aya jõku cínákí ãjẹ̃ rú rĩ ụ̃gụ̃lé ãmbógó mídrị̂ drị́ko gá íngoníru? ⁹ Ãmbógó, údrĩ ĩꞌdi ịsụ́ ãma ãzí ãlu la drị́, ála ĩꞌdi ꞌdị rá ãzíla ãma ị́mbị́ acelépi rĩ kí acá ãtiꞌbo má ãni larú.”

¹⁰ Jọ, “Má ãꞌị̃ ị́jọ́ ꞌdĩ rá; wó lú ꞌbá kópõ lê aꞌdụ́lépi nĩrĩ la acá mâ ãtíꞌbóru nĩ, ĩmi ị́mbị́ acelépi rĩ kí ngá mụ rá.” ¹¹ Ị́jọ́ ꞌdĩ sĩ, ayụ kí ĩꞌbã tẹ́rị́ kí mbẽlẽŋáru vụ̃rụ́, ꞌbá ãlu-ãlu nzị̃ ĩꞌdidrị́ gụ̃tị́yã rĩ ꞌbã tị. ¹² Ãtíꞌbó Yụ̃sụ́fụ̃ drị́ ꞌdĩ iꞌdó kópõ ndrụ̃lé jãjãrú iꞌdójó ꞌbá kãyú rĩ drị̂ sĩ ãsị̃jó ꞌbá vúléŋá rĩ drị̂ gá, ịsụ́ kópõ gụ̃tị́yã Bénzãmĩnĩ drị̂ agá. ¹³ ꞌBá ꞌdĩ asi kí bõngó kí ụrụꞌbá gá rĩ kí ũcõgõ trũ ásị́ gá, umbé kí ĩꞌbã tẹ́rị́ kí vúlé kãyĩnõ kí drị̃ gá ãzíla uja kíru vúlé táwụ̃nị̃ ãmbógó rĩ gâlé.

¹⁴ Yụ́dãsị̃ kí mụ acálé ádrị́pịka abe Yụ̃sụ́fụ̃ drị́ jó agá ꞌdãá ꞌbo, ịsụ́ ĩꞌdi drĩ ꞌdãá ũgũgõ. Ilú kí drị̃ vụ̃rụ́ ĩꞌdi drị̃lẹ́ gá, ¹⁵ Yụ̃sụ́fụ̃ jọ, “Ị́jọ́ ĩmĩ idélé íni rĩ ãꞌdu ị́jọ́? Ị̃nị̃ drĩ ꞌbá cécé mâ áni ꞌdĩ icó ũkpó Ãdróŋá drị̂ sĩ ị́jọ́ ĩmi idélé ũní rĩ kí nị̃lé cé ku yã?”

¹⁶ Yụ́dãsị̃ umvi, “Ãma dó míní ãꞌdu ị́jọ́ jọ, ãmbógó? Ãma dó ãgátã ga íngoníru? Ãma icó ãma trũlé íngoníru? Ãdróŋá iꞌda ị́jọ́ ũnzĩ ãmadrị̂ ꞌbo, ãma pírí dó mî ãtiꞌbo adru lú ꞌbá tá kópõ ịsụ́jó ĩꞌdidrị́ rĩ ꞌi ku.”

¹⁷ Yụ̃sụ́fụ̃ jọ, “Adru ꞌdĩ áni ku! Má icó ꞌdĩ ãꞌị̃lé ꞌdĩ áni ku! ꞌBá tá kópõ ịsụ́jó ĩꞌdidrị́ rĩ la lú adru mâ ãtíꞌbóru nĩ. Ĩmi ãzí acelépi rĩ icó gõlé ĩmĩ átẹ́pị rụ̂lé ásị́ ị̃gbẹ́ sĩ rá.”

Yụ́dãsị̃ ꞌbã mãmálá ꞌbãjó Bénzãmĩnĩ sĩ rĩ

¹⁸ Yụ́dãsị̃ mụ kpere Yụ̃sụ́fụ̃ rụ jọ, “Kíríkĩrĩ, mí ãꞌị̃ mání ị́jọ́ nzejó mí be fô, ãmbógó! Ími ásị́ ꞌbã ve mání ku, mi trútrũ Fãráwũ áni. ¹⁹ Ãmbógó, ízị ándrá ãma, ‘Ĩmĩ átẹ́pị cí yã jõku ĩmĩ ádrị́pị ãzí cí yã?’ ²⁰ Ãma umvi ándrá, ‘Ãmã átẹ́pị ĩdránígó ru cí ãzíla ãmã ádrị́pị vúléŋá la cí, ĩꞌdiní tịlé ịsụ́ ĩꞌdi dó ꞌbá ãmbá ru rĩ. Mgbâ ꞌbã ádrị́pị drã rá, ĩꞌdi dó lú ngọ́tị́ŋá ãndrẽ agá acelépi ídri rĩ ꞌi, átẹ́pị̃ lẽ ĩꞌdi ambamba!’ ²¹ Ãmbógó, íjọ ándrá ãmaní ãma ají ĩꞌdi ꞌdõlé ĩndĩ mínî sĩ amụ́jó ĩꞌdi ndrejó benĩ, ²² wó ãma umvi ándrá mgbâ icó átẹ́pị̃ aꞌbelé ku; drĩ ĩꞌdi aꞌbe rá yã áni, átẹ́pị̃ icó drãlé rá. ²³ ꞌDĩ vúlé gá íjọ ándrá, ‘Má icó ĩmi ãꞌị̃lé áma mẹ́lẹ́tị gá ku ĩdrĩ amụ́ ĩmi ádrị́pị vúléŋá rĩ kóru rĩ gá.’

²⁴ “Ụ́ꞌdụ́ ãma gõjó ãmã átẹ́pị rụ̂lé rĩ sĩ, ãnze ĩꞌdiní ị́jọ́ mínî jọlé rĩ kî. ²⁵ ꞌDã ꞌbã vúlé gá jọ ãmaní lẽ ãgõ vúlêlé mụlé íná ĩgbãlé. ²⁶ Ãma umvi, ‘Ãma icó mụlé ku; îcó ãma ãꞌị̃lé ágọ́bị́ ꞌdã ꞌbã mẹ́lẹ́tị gá ku ãdrĩ mụ ãmã ádrị́pị vúléŋá rĩ kóru rĩ gá. Ãma lú mụ rá la ãmã ádrị́pị vúléŋá rĩ drĩ mụ ĩndĩ rĩ gá.’ ²⁷ Ãmã átẹ́pị jọ ãmaní, ‘Ị̃nị̃ ị́jọ́ ꞌdĩ lọ́lọ́ ũkú má drị́ Rãkẹ́lị̃ tị mání anzị ãgọbị kí lú ị̃rị̃. ²⁸ Ĩꞌbã ãzí ãlu rĩ aꞌbe úꞌdîꞌda ma ꞌbo. Ãzî sĩ ụ̃bọ̃gụ̃ na kí lé ꞌdĩ ĩꞌdi nĩ ãꞌdusĩku ĩꞌdiní áma aꞌbe gá kpere sáwã ꞌdĩ sĩ ándre ĩꞌdi ku.’ ²⁹ Ĩdrĩ vâ úꞌdîꞌda ꞌdĩ ꞌdụ wó ị́jọ́ ãzí drĩ mụru idélé ĩꞌdi ụrụꞌbá gá, ũcõgõ ĩmĩ lẽlé fẽlé mání rĩ icó áma ꞌdịlé rá, ma dó adrujó ũkpó kóru rĩ sĩ.

³⁰ “Ãmbógó, má icó gõlé mâ átẹ́pị rụ̂lé mgbâ kóru ku, mâ átẹ́pị ꞌbã ídri ãtị̃ ĩꞌdi mgbâ ꞌbã ídri sĩ. ³¹ Drĩ ndre la ãma amụ́ ĩꞌdi kóru, ũcõgõ ãmã lẽlé fẽlé ĩꞌdiní ꞌdĩ icó ĩꞌdi ꞌdịlé rá. ³² Ájọ ándrá mâ átẹ́pịní ma mgbâ tãmba rá, ájọ vâ ĩꞌdiní ádrĩ mgbâ ají ĩꞌdi rụ́ ꞌdõlé ku, ị́jọ́ ũnzĩ lã ꞌba ace áma drị̃ gá ꞌdáni-ꞌdáni. ³³ Ãmbógó, ị́jọ́ ꞌdĩ sĩ ma dó ace ꞌdâ mî ãtíꞌbóru mgbâ ꞌbã kẹ̃jị́ gá; ífẽ ꞌbã gõ vúlé ádrị́pịka kî trũ. ³⁴ Má icó mụlé mâ átẹ́pị rụ̂lé mgbâ drĩ adru má be ku íngoníru? Ị́jọ́ íngõ laru idé mâ átẹ́pị ụrụꞌbá gá ị́jọ́ ꞌdĩ sĩ nĩ yã rĩ má icó ĩꞌdi ndrelé ãzíla talé ku.”