Íꞌdóŋá 43

Yụ̃sụ́fụ̃ ꞌbã ádrị́pịka gõ kí Mị̃sị́rị̃ gá Bénzãmĩnĩ trũ

¹ Rílẽ ãngũ Kãnánĩ gá ꞌdãá rĩ acá ũnzí. ² ꞌBá Yãkóꞌbõ drị́ko gá rĩ kí mụ íná ándrá ajílé Mị̃sị́rị̃ gá rĩ nalé pírí ꞌbo, Yãkóꞌbõ jọ ĩꞌdi ꞌbã ngọ́pịka ꞌbaní, “Ĩmụ vúlé Mị̃sị́rị̃ gâlé ꞌbání íná ãzí kí ĩgbãlé.”

³ Yụ́dãsị̃ jọ ĩꞌdiní, “Ágọ́bị́ ꞌdã se ándrá ãma bị́lẹ́ ị̃ndụ́ ũkpómgborotorú ꞌí icó ãma ãꞌị̃lé ꞌî mẹ́lẹ́tị gá ku ãdrĩ mụ ãma ádrị́pị vúléŋá rĩ kóru rĩ gá. ⁴ Ídrĩ ãꞌị̃ ásị́ pírí sĩ ãmã ádrị́pị fẽjó mụjó ãma abe rá, ãma mụ íná ĩgbãlé rá. ⁵ Ídrĩ ãꞌị̃ ku yã áni, ãma icó mụlé ku, ãꞌdusĩku ágọ́bị́ ꞌdã jọ ándrá ãmaní ꞌí icó ãma ãꞌị̃lé ꞌî mẹ́lẹ́tị gá ku ãdrĩ mụ ãma ádrị́pị̂ kóru rĩ gá.”

⁶ Yãkóꞌbõ jọ, “Ĩlũ ágọ́bị́ ꞌdãnî ĩmĩ ádrị́pị ãzí cí mání sĩ ũcõgõ ịsụ́jó ásị́ gá íni ãꞌdu ị́jọ́ sĩ?” ⁷ Umvi kí, “Ágọ́bị̂ rĩ ãma ụzịlé ãzíla ꞌbá ãmadrị̂ kî trũ, ‘Ĩmĩ átẹ́pị drĩ kpere ídrirú yã? Ĩmĩ ádrị́pị ãzí cí yã?’ Ị́jọ́ ꞌdĩ sĩ, ãma ũlũ dó sĩ ĩꞌdiní kí rá. Ãma icó tâ dó nị̃lé la íngoníru ĩꞌdi ꞌbã jọ la, ‘Ĩmi ají mání ĩmĩ ádrị́pị vúléŋá ĩndĩ?’”

⁸ Yụ́dãsị̃ jọ átẹ́pị̃ní, “Ípẽ mgbâ tị má be ãma dó sĩ drị̃ ko mụlé cọtị. ꞌBá ãzí ãlu la ꞌbã drãrú sĩ ãbị́rị́ sĩ ku benĩ. ⁹ Ma ĩꞌdi tãmba ma ꞌi, mi amụ́ ĩꞌdi zịlé áma tị gá. Ádrĩ ĩꞌdi ají mí rụ́ ꞌdõlé ĩndĩ ku, ị́jọ́ la ũnzíríkãnã rĩ ꞌbã adru áma drị̃ gá ꞌdáni-ꞌdáni. ¹⁰ Ãdrĩ tá sáwã iza ꞌdĩ áni tẽjó la biri ku, ãma acị́ tánõ lé pâlé ị̃rị̃ ꞌdĩpí ꞌbo.”

¹¹ Ĩꞌbã átẹ́pị Yãkóꞌbõ jọ ĩꞌbaní, “Drĩ adru ꞌdĩ áni yãní, lé ĩꞌdụ ĩmi gụ̃tị́yã kí agá ãko ũnĩ-ambamba ãngũ ꞌdĩ drị̂ kí ãmbógóní ĩndĩ; ãko ꞌdĩ áni ꞌdĩ kî: ãdu ngụ̃lépi ndrị̃-ndrị̃ rĩ, ãnụ́ úsã trũ, ãko ngụ̃lépi ndrị̃-ndrị̃ rĩ kî trũ, ife ífí kî trũ ãzíla ife ífí umvelé ãlĩmóndĩrú rĩ abe pírí. ¹² Ĩꞌdụ vâ séndẽ kí pâlékó ị̃rị̃ sĩ ãꞌdusĩku lé ĩmi uja séndẽ ꞌbání ándrá ũꞌbãlé ĩmidrị́ gụ̃tị́yã kí agá ũgũgõ rĩ kí vúlé. ¹³ Ĩꞌdụ ĩmĩ ádrị́pị ꞌi ĩmụ dô trũ. ¹⁴ Ãdróŋá Ũkpó ꞌDị́pị ꞌbã fẽ ásị́ ị̃gbẹ̃ ágọ́bị́ ꞌdã ꞌbã ásị́ gá ĩꞌdinî sĩ Bénzãmĩnĩ ãfẽjó ĩmidrị́ ádrị́pị̃ ãzí lé ꞌdã be ĩndĩ. Wó drĩ dó adru ma mâ anzị kí ãvĩ pírí yã rĩ gá, ꞌbã adru dô.”

¹⁵ Ị́jọ́ ꞌdĩ sĩ, ꞌdụ kí ãko fẽtáŋáru ꞌdã kí séndẽ pâlékó ị̃rị̃ sĩ drị̃lẹ́ gá rĩ abe trũ mụjó Mị̃sị́rị̃ gâlé Bénzãmĩnĩ trũ. ꞌDãá iꞌda kíru Yụ̃sụ́fụ̃ drị̃lẹ́ gá. ¹⁶ Yụ̃sụ́fụ̃ la mụ Bénzãmĩnĩ ndrelé ĩꞌba abe ꞌbo, jọ ãtíꞌbó ĩꞌdidrị́ jọ agá ꞌdãá ãmbógóru rĩní, “Mí agụ ꞌbá ꞌdĩ kí má drị́ jọgâlé. Kî mụ íná sáwã ázíyá drị̂ nalé mâ trũ, ị́jọ́ ꞌdĩ sĩ lẽ ílị ãnãkpá ãzí ãlu, mí aꞌdí ĩꞌdi.” ¹⁷ Ãtíꞌbó ꞌdã idé cécé tá ꞌbání lũlé ĩꞌdinî rĩ áni, ꞌdụ kí agụlé Yụ̃sụ́fụ̃ drị́ jó agâlé.

¹⁸ ꞌBá ꞌdĩ rĩ kí idélé ụ̃rị̃ sĩ ꞌbání kí agụ agá jó agâlé, ũrã kí, “Âjí ãma ꞌdõlé la séndẽ ándrá ꞌbání ujalé ãmadrị́ gụ̃tị́yã kí agá ĩndĩ ụ́ꞌdụ́ drị̃drị̃ ꞌdã drị̂sĩ. Kí uꞌda ãma tị ce, ãma kãyĩnõ kí upa ãzíla kí ãma ꞌbã acálé ĩꞌdi ꞌbã ãtíꞌbóru.”

Ụ̃mụ̃ Yụ̃sụ́fụ̃ drị́ko gá rĩ

¹⁹ Yụ̃sụ́fụ̃ ꞌbã ádrị́pịka kí mụ calé ĩꞌdidrị́ko gâlé ꞌbo, jó tị gá ꞌdãá jọ kí ãtíꞌbó ãmbógóru rĩní, ²⁰ “Ãmbógó, ụ́ꞌdụ́ ãmã amụ́jó íná ĩgbãjó drị̃drị̃ Mị̃sị́rị̃ gá ꞌdâ rĩ vúlé gá, ^21-22 ãmụ bụ́rụ́jọ́ drõlé gẹ̃rị̃ gá ãmaní sĩ ụ́ꞌdụ́ kojó. Ãnzị̃ ãmã gụ̃tị́yã kí tị, wó ꞌbá ãlu-ãlu ịsụ́ ĩꞌdi ꞌbã séndẽ gụ̃tị́yã agá ꞌdãá ũgũgõ ãnị̃ séndẽ ꞌdĩ ꞌbã kíru ãmadrị́ gụ̃tị́yã agá ĩndĩ íngoníru yã rĩ ku, ãma ají kí ĩndĩ mí rụ́ ꞌdõlé ꞌdĩ. Ãma amụ́ vâ séndẽ ãzí kî trũ sĩ íná ĩgbãjó ĩndĩ.”

²³ Ãtíꞌbô jọ, “Ĩmi ásị́ ꞌbã mvu ku. Ĩmi idé ụ̃rị́ sĩ ku. Ãdróŋá ĩmidrị́ ĩmĩ átẹ́pị drị̂ ꞌbã séndẽ kí gụ̃tị́yã agâlé ĩminí nĩ. Má ịsụ́ ándrá séndẽ ĩmidrị́ ĩmĩ sĩ íná ĩgbãjó rĩ kí rá.” ꞌDĩ ꞌbã vúlé gá âjí Sị̃mọ́nị̃ ĩꞌba rụ́ ꞌdõlé.

²⁴ Ãtíꞌbó ꞌdĩ agụ ꞌbá ꞌdĩ kí jó agâlé, fẽ ĩꞌbaní ị̃yị́ pá ũjĩjó ãzíla fẽ íná ĩꞌbadrị́ kãyĩnõ rĩ ꞌbanî. ²⁵ Anzé kí ĩꞌbã fẽtáŋá kí bábá fẽlé Yụ̃sụ́fụ̃ drị́ sáwã ĩꞌdiní acájó sáwã ázíyá sĩ rĩ sĩ ãꞌdusĩku ûlũ ĩꞌbaní kí íná sáwã ázíyá drị̂ na ĩꞌdi trũ. ²⁶ Yụ̃sụ́fụ̃ la mụ acálé lị́cọ́ gá ꞌbo, ꞌdụ kí ĩꞌbã fẽtáŋá kî trũ mụjó ĩꞌdi rụ́ jó agâlé, ãvụ̃ kí vụ̃rụ́ ĩꞌdi drị̃lẹ́ gá. ²⁷ Yụ̃sụ́fụ̃ zị kí ụrụꞌbá íngoní yã rĩ nị̃jó ãzíla jọ, “Ĩlũ ándrá mání ị́jọ́ ĩmĩ átẹ́pị drị̃ gá rá ĩꞌdi íngoní? Ĩꞌdi drị̃ kpere ídrirú ãzíla ãlá ru yã?”

²⁸ Umvi kí, “ꞌẼ, ãmã átẹ́pị drĩ ídrirú ãzíla ãlá ru.” Ãvụ̃ kí vụ̃rụ́ ĩꞌdi drị̃lẹ́ gá.

²⁹ Yụ̃sụ́fụ̃ la mụ ádrị́pị̃ Bénzãmĩnĩ ndrelé ꞌbo, zị, “ꞌDĩ ĩmĩ ádrị́pị vúléŋá ándrá ĩminí jọlé mání rĩ ꞌi yã? Mgbâ Ãdróŋá ꞌbã wi míní sụ̃sụ́.” ³⁰ Yụ̃sụ́fụ̃ ko lú drị̃ ndị ãꞌdusĩku ásị́ lâ lẽ kpẹ̃lé ádrị́pị̃ ꞌbã ị́jọ́ sĩ. Lẽ drãlé drã-drã, ị́jọ́ ꞌdĩ sĩ mụ ĩꞌdidrị́ ãngũ ụ́ꞌdụ́ kojó rĩ gá ãzíla awá mị́ndrẹ sĩ. ³¹ Ĩꞌdi mụru mẹ́lẹ́tị mị́ndrẹrú rĩ ũjĩlé ꞌbo, ãfũ amụ́lé ãmvé ĩꞌba rụ́ ꞌdõlé, imbá ru ásị́ ũkpó ru, jọ ãtíꞌbô ꞌbã fẽ kí dó ínâ nalé. ³² Úfẽ Yụ̃sụ́fụ̃ní íná mésã ãlu sị́ gá ãzíla ádrị́pịka ꞌbaní ãzí rĩ sị́ gá. ꞌBá Mị̃sị́rị̃ gá ínâ nalépi ꞌdãá ĩndĩ rĩ ꞌbaní úfẽ ínâ nalé ndú ãꞌdusĩku ꞌbá ꞌdĩ lẽ kí angájó ídu ínâ nalé ꞌbá Ĩbũrãníyã rú la kî trũ ãngũ ãlu gá ku. ³³ Yụ̃sụ́fụ̃ ꞌbã ádrị́pịka kí úfẽ rĩ kí mésã ĩꞌbadrị̂ tị gá ja kí tị ĩꞌdi rụ̂léru, rĩ kí ĩꞌbã ílí vúsĩ iꞌdójó kãjãní rĩ sĩ kpere vúléŋá rĩ gá. Rĩ kíru undrélé mịfị́ gá mịfị́ gá ꞌbání kí fẽjó urijó ꞌdĩ áni rĩ sĩ. ³⁴ Úri ĩꞌbaní íná ãfẽlé angájó Yụ̃sụ́fụ̃ drị́ mésã rĩ drị̃ gâlé, úfẽ Bénzãmĩnĩ ní íná ãmbógóru ádrị́pịka ãzí ꞌdĩ ꞌbaní ãndânĩ pâlékó tõwú sĩ. Na kí ãkónã ãzíla mvụ kí ãyĩkõ sĩ Yụ̃sụ́fụ̃ abe ãngũ ãlu gá.