50
1 Yụ̃sụ́fụ̃ ꞌbe dóru átẹ́pị̃ drị̃ gâlé áwáŋâ trũ kpõlókõ la ndruŋâ trũ. 2 Yụ̃sụ́fụ̃ jọ ꞌbá írúwá idélépi rĩ ꞌbaní átẹ́pị̃ ụrụꞌbá iníjó írúwá sĩ ꞌbã ŋma sĩ ku, 3 ụrụꞌbá la iníjó írúwá sĩ rĩ ꞌdụ ụ́ꞌdụ́ kãlị́ sụ, ãzíla ꞌbá Mị̃sị́rị̃ gá rĩ awá kí ĩꞌdi ụ́ꞌdụ́ kãlị́ ázị̂rị̃ sụ́rụ́ ndụlụ. 4 Ụ́ꞌdụ́ áwáŋá drị̂ la mụ ukólé ꞌbo, Yụ̃sụ́fụ̃ lũ ꞌbá ĩyõ Fãráwũ drị̂ ꞌbaní ꞌbã jọ kí Fãráwũ ní ị́jọ́ ꞌî kẹ̃jị́ gá. 5 Jọ ĩꞌbaní, “Ĩjọ Fãráwũ ní má átẹ́pị ándrá dó lẽjó drãjó rĩ sĩ ꞌbã ándrá ma ũyõ nalé, lẽ ídrãjõ ꞌbo ámụ ꞌî ị̃sị̃lé ãngũ Kãnánĩ gá rĩ gá, mí ají ámụ dó mâ átẹ́pị ị̃sị̃lé, ádrĩ dó ĩꞌdi ị̃sị̃ ꞌbo, ma ãgõ gbõŋáŋáru.”
6 Fãráwũ jọ Yụ̃sụ́fụ̃ní, “Ímụ mî átẹ́pị ị̃sị̃lé nî ándrá ũyõ najó mî idé la rĩ áni.” 7 Yụ̃sụ́fụ̃ mụ átẹ́pị̃ ị̃sị̃lé. ꞌBá ĩyõ Fãráwũ drị̂ ꞌde kí ĩꞌdi vú gâ sĩ, ꞌbá ãmbogo pírí Mị̃sị́rị̃ gá rĩ kí abe. 8 ꞌBá Yụ̃sụ́fụ̃ drị́ko gá rĩ kí, ádrị́pịka kí, ꞌbá pírí átẹ́pị̃ drị́ko gá rĩ mụ kí pírí, ꞌbá acelépi rĩ kí anzịŋá kí ãnãkpá abe.
9 ꞌBá ũꞌbí mụ kí nĩ, ꞌbá cẹ̃lépi gãlĩgãlĩ ũmbã drị̂ trũ, ꞌbá cẹ̃lépi kãyĩnõ sĩ rĩ kî trũ. 10 ꞌBá kí mụ calé ãngũ ãná cojó Ãtádị̃ gá, ãni rú ị̃yị́ Yõrĩdánĩ gá, rĩ kí dó awálé ụ́ꞌdụ́kọ́ ụrụ gâ sĩ ãzákírílí ru ꞌdãá Yụ̃sụ́fụ̃ uꞌá kí átẹ́pị̃ awájó ụ́ꞌdụ́ ázị̂rị̃. 11 ꞌBá Kãnánĩrú uꞌálépi ꞌdãá rĩ kí mụ áwáŋá ndrelé ãngũ ãná cojó Ãtádị̃ gá ꞌdãá jọ kí, “ꞌBá Mị̃sị́rị̃rú rĩ kí mũmúrẽ ãmbógó la idé” (ꞌdã dó ị́jọ́ ãngũ Yõrĩdánĩ andre gá ꞌdã umvejó Ãbẽlĩ-Mĩzĩrãímũ ꞌi ꞌdĩ).
12 Yãkóꞌbõ ngọ́pịka idé kí cécé ĩꞌdi ꞌbã azịlé rĩ ꞌbã áni. 13 Agụ kí ĩꞌdi mụlé ị̃sị̃lé ụ̃jị́gọ́ ámvụ́ Mãkĩpélã agá ãni rú Mãmírẽ gá, Ịbụrahị́mụ̃ ꞌbã ándrá ĩgbãlé Ẽfĩrónĩ Hị́tị̃rú rĩ drị́ ámvụ́ trũ ãngũ sĩ ꞌbá ị̃sị̃jó rĩrú rĩ gá.
14 Yụ̃sụ́fụ̃ ujaru vúlé Mị̃sị́rị̃ gá ꞌdõlé ádrị́pịka kí abe ãzíla ꞌbá mụlépi átẹ́pị̃ ꞌbã ị̃sị̃ŋá gá rĩ kî trũ. 15 Yụ̃sụ́fụ̃ ꞌbã ádrị́pịka kí dó mụ ndrelé la ĩꞌbã átẹ́pị drã rá, jọ kí, “Ãzî sĩ Yụ̃sụ́fụ̃ la mụ acálé ãma abe ũnzí ị́jọ́ ándrá ãmã idélé ĩꞌdi ꞌbã ụrụꞌbá gá ũnzí rĩ kî sĩ.” 16 Ị̃drị̃ kí ụ́ꞌdụ́kọ́ Yụ̃sụ́fụ̃ní jọ kí, “Ãmã átẹ́pị azị ándrá ãmaní ị́jọ́ ꞌdĩ kí ịsụ́ drã drĩ ku rú. 17 ꞌDĩ ị́jọ́ ĩmĩ mụlé jọlé Yụ̃sụ́fụ̃ nî rĩ: ‘Má aꞌị́ mi mî ádrị́pịka kî trũjó rá ũnzĩkãnã ándrá ĩꞌbã kí idélé mí rụ́ rĩ kî sĩ.’” ꞌBárĩ úꞌdîꞌda ãma ãtiꞌbo Ãdróŋá mî átẹ́pị drị̂, ãma aꞌị́ mi ũnzĩkãnã ãmadrị̂ kî trũjó rá fô. Ụ́ꞌdụ́kọ́ ꞌdĩ la mụ calé ĩꞌdi rụ̂lé ꞌbo, Yụ̃sụ́fụ̃ awá mị́ndrẹ sĩ.
18 Ádrị́pịka amụ́ kí ụ̃tị̃ kí ãja vụ̃rụ́ ĩꞌdi drị̃lẹ́ gá jọ kí, “Ãma ãtiꞌbo mí ãni.” 19 Wó Yụ̃sụ́fụ̃ jọ ĩꞌbaní, “Ĩꞌe mâ sĩ ụ̃rị̃ sĩ ku. Ma Ãdróŋá ꞌi sĩ ꞌbá ị́jọ́ lịjó yã? 20 Ĩmi ũrã ándrá ĩmi áma idé ũnzí, wó Ãdróŋá idé ị́jọ́ ꞌdĩ múké, sĩ ꞌbá ũꞌbí kí ídri pajó.” 21 Yụ̃sụ́fụ̃ jọ, “Ĩmi idé mâ sĩ úꞌdîꞌda ụ̃rị̃ sĩ ku marú ĩminí ãkónã fẽ ãzíla ma vâ ĩmi tãmba anzị abe rá.”
Drã Yụ̃sụ́fụ̃ drị́ gá rĩ
22 Yụ̃sụ́fụ̃ uꞌá Mị̃sị́rị̃ gá ꞌbá ĩꞌdi ꞌbã átẹ́pị drị́ko gá rĩ abe, Yụ̃sụ́fụ̃ uꞌá ílí túrú ãlu drị̃ la mụdrị́ 23 ãzíla ndre drị̃lẹ́ anzị najó Ịfịrámụ̃ drị̂ kî. 24 Yụ̃sụ́fụ̃ jọ ádrị́pịka ꞌbaní, “Ma úgólé drãlé drã. Wó ãndá ãndáru Ãdróŋá la amụ́ ĩmi ãzã kolé rá ãzíla ĩꞌdirú ĩmi ũfũ ãngũ Mị̃sị́rị̃ ꞌdâ rĩ sĩ agụlé ãngũ ĩꞌdi ꞌbã fẽlé Ịbụrahị́mụ̃, Ĩsákã ãzíla Yãkóꞌbõ ꞌbanî rĩ gá.” 25 Yụ̃sụ́fụ̃ fẽ anzị Ịsịrayị́lị̃ drị̂ ꞌbaní ũyõ nalé jọ, “Ãndá ãndáru Ãdróŋá la amụ́ ĩmi agụlé Kãnánĩ gâlé rá, ĩꞌdụ jõ áma ĩfãkã kí ĩndĩ.” 26 Yụ̃sụ́fụ̃ drã Mị̃sị́rị̃ gá ịsụ́ ꞌdĩ sĩ ílí la ca dó túrú ãlu mụdrị́. Íni ãvũ la írúwá sĩ, úmba tã la sãndụ́kụ̃ ãvũ tãmbajó rĩ agá.