Íꞌdóŋá 40

Yụ̃sụ́fụ̃ iꞌda urobí ífí ꞌbá ị̃rị̃ mãbụ́sụ̃ gá rĩ ꞌbanî

¹ Ụ́ꞌdụ́ ãlu ꞌbá ãkónã fẽlépi ãzíla ꞌbá ãkónã aꞌdílépi úpí Fãráwũ Mị̃sị́rị̃ gá rĩní rĩ iza kí ĩꞌdi ásị́, ² ị́jọ́ ꞌdĩ sĩ ala ve ũmbã sĩ ĩꞌbanî. ³ ꞌBe dó sĩ kí mãbụ́sụ̃ gá ãmbógó ĩꞌdi aga tẽlépi rĩ drị́ (jó agá) ãngũ ãlu ála vâ sĩ Yụ̃sụ́fụ̃ ꞌbãjó rĩ gá ꞌdãá. ⁴ Ãmbógó Fãráwũ aga tẽlépi rĩ ꞌdụ ꞌbá ị̃rị̃ ꞌdi kí fẽlé Yụ̃sụ́fụ̃ drị́ ĩꞌdi dô sĩ kí drị̃lẹ́ gá ãmbógóru kí tãmbajó. ⁵ Ị́nị́ ãlu urobí ũbĩ ãgọbị ãkónã fẽlépi rĩ kí aꞌdílépi la rĩ be mãbụ́sụ̃ jó agá ꞌdãá ífí la kí ndú-ndú.

⁶ Yụ̃sụ́fụ̃ la mụ filé ĩꞌba rụ́ jó agâlé ndre kí mẹ́lẹ́tị ízákĩzãrú. ⁷ Zị ꞌbá ꞌdi kí, “Ĩmi indré ãndrũ ízákĩzãrú íni la ãꞌdu ị́jọ́ sĩ yã?”

⁸ Umvi kí ĩꞌdiní, “Urobí ũbĩ ãma ị̃rị̃ trá, ꞌbá ãzí ãmaní ífí la iꞌdalépi la ꞌdáyụ.” Yụ̃sụ́fụ̃ umvi ĩꞌbaní, “Ị̃nị̃ urobí ífí iꞌdaŋá la angá Ãdróŋá drị́ rĩ gá ku yã? Ĩnze mání urobí ĩmidrị̂ kî vú mâ Ãdróŋá aꞌị́ kí ífí iꞌdajó mání rá.” ⁹ ꞌBá ãmbógó ãkónã fẽlépi rĩ nze ĩꞌdidrị̂ ꞌbã vú jọ, “Ándre zãbíbũ ife áma drị̃lẹ́ gá, ¹⁰ kénĩ la kí na, bị́ la iꞌdó kí dụlé ãka lâ trũ nị kí rá. ¹¹ Kópõ úpí Fãráwũ ꞌbã sĩ zãbíbũ sụ́ mvụjó rĩ áma drị́ gá, ánzi zãbíbũ nịlépi rá rĩ ĩꞌdiní kópõ agá, áfẽ dó kópõ ĩꞌdidrị́ gá.”

¹² Yụ̃sụ́fụ̃ jọ ĩꞌdiní, “Urobí ꞌdĩ ꞌbã ífí ĩꞌdi íni ife ꞌbã kénĩ na ꞌda kí ụ́ꞌdụ́ na. ¹³ Ụ́ꞌdụ́ na alị ku rú, Fãráwũ la ími trũ rá ãzíla ĩꞌdi ími uja ãzị́ jõ mî ngalé rĩ gá vúlé. Mi ĩꞌdi ꞌbã kópõ wáyĩnĩ mvụjó rĩ fẽ ĩꞌdidrị́ gá, mi ĩꞌdiní ãkónã fẽ cécé jõ úꞌdu rĩ ꞌbã áni. ¹⁴ Wó, ị́jọ́ ꞌdĩ drĩ kíru idé míní múké rá Fãráwũ drĩ ími trũ rá, mí ũrã jõ áma ị́jọ́ áma vú nzejó ĩꞌdiní ĩndĩ ꞌbã nze sĩ ma mãbụ́sụ̃ gá ꞌdâ rá. ¹⁵ Ãndá ãndáru árụ́ ándrá ma angájó ãngũ ꞌbá Ĩbũrãníyã drị̂ gá. Wó Mị̃sị́rị̃ gá ꞌdâ ị́jọ́ ãzí mâ idélé ũnzíkãnã sĩ áma ꞌbãjó mãbụ́sụ̃ gá la ꞌdáyụ.”

¹⁶ Ágọ́bị́ ꞌbá ãkónã aꞌdílépi rĩ ꞌbã ãmbógô la mụ arelé la urobí ꞌbã ífí ũniambarú, jọ Yụ̃sụ́fụ̃ní, “Urobí ũbĩ vâ ma ĩndĩ, ũrobí má drị̂ agá ũvú mũkátĩ trũ rĩ kí áma drị̃ gá ꞌdâ na. ¹⁷ Ũvú ụrụ gá drị̃drị̃ rĩ agá ãkónã ũví ndú-ndú aꞌdílé Fãráwũ nî rĩ cí, ãriŋa rĩ kí kî tilé ãnájó agá ꞌdãá.”

¹⁸ Yụ̃sụ́fụ̃ jọ, “Urobí ꞌdĩ ꞌbã ífí íni. Ũvú na ꞌdã kí kí ụ́ꞌdụ́ na. ¹⁹ Ụ́ꞌdụ́ na alị ku rú Fãráwũ la ími trũ rá, ĩꞌdi ími drị̃ lị rá ími ãvũ ĩꞌdi gĩ la ife sị́ gá ãriŋa kí ími ĩzá ti rá.” ²⁰ Ụ́ꞌdụ́ na ca kî dó cé ụ́ꞌdụ́ Fãráwũ tịjó rĩ ꞌbã ãyĩkõ idéjó rĩ sĩ, Fãráwũ aꞌdí dó ãmụ̃ ãmbógó ꞌbá ĩyõ ĩꞌdidrị̂ ꞌbanî, ꞌbá ãzị́ ngalépi ĩꞌdidrị́ko gá rĩ abe. Pẽ ꞌbá tị ꞌbá ãmbógó ĩꞌdiní ãkónã fẽlépi rĩ kí ajílé ꞌbá ãmbógó ĩꞌdiní ãkónã aꞌdílépi rĩ be ꞌbá ĩyõ ãmụ̃ gá ũꞌbí ꞌdã kí drị̃lẹ́ gá. ²¹ Uja dó ꞌbá ĩꞌdiní ãkónã fẽlépi rĩ ãzị́ gá vúlé ũꞌbí kí drị̃lẹ́ gá ãkónã fẽjó ĩꞌdiní ídu rĩ áni. ²² Wó ꞌbá ĩꞌdiní ãkónã aꞌdílépi rĩ ꞌbã ãmbógó nzi ĩꞌdi rá cécé Yụ̃sụ́fụ̃ ꞌbã jọlé ĩꞌdiní rĩ áni.

²³ ꞌBá ãkónã fẽlépi rĩ Fãráwũ ní rĩ ãvĩ ị́jọ́ ándrá Yụ̃sụ́fụ̃ ꞌbã jọlé ĩꞌdiní ꞌbã ũrãjõ ị́jọ́ ꞌî drị̃ gá be rĩ ꞌbã ị́jọ́ rá.