Íꞌdóŋá 39

Ị́jọ́ Yụ̃sụ́fụ̃ ꞌbã ãni Põtĩfárõ ũkû be rĩ

¹ ꞌBá Ịsụmaị́lị̃ rú ꞌdĩ agụ kí Yụ̃sụ́fụ̃ Mị̃sị́rị̃ gá, ị̃tụ̃ndã kí ĩꞌdi ãmbógó ãsĩkárĩ Fãráwũ ãga tẽlépi umvelé Põtĩfárõ ꞌi rĩ nî. ² Ãdróŋá ĩꞌdi Yụ̃sụ́fụ̃ be cí, ĩꞌdi dô sĩ drị̃lẹ́barú, rĩ dó uꞌálé ãmbógó ĩꞌdi ĩgbãlépi Mị̃sị́rị̃góru rĩ drị́ko gá.

³ Ndre Ãdróŋá ĩꞌdi Yụ̃sụ́fụ̃ be cí, ãko pírí ĩꞌdi ꞌbã idélé rĩ kí ãyĩkõ sĩ, ⁴ Põtĩfárõ uꞌá dó ãyĩkõ sĩ, ꞌbã dó ĩꞌdi ãtíꞌbó ãzị́ idélépi ĩꞌdinî rĩrú, azị ãko pírí ĩꞌdidrị́ko gá rĩ kí ĩꞌdidrị́ alé gá. ⁵ Iꞌdójó ụ́ꞌdụ́ ĩꞌdiní Yụ̃sụ́fụ̃ ꞌbãjó ãmbógóru lị́cọ́ ãzíla ãko ĩꞌdidrị̂ kí drị̃lẹ́ gá rĩ sĩ, Ãdróŋá wi sụ̃sụ́ lị́cọ́ ágọ́bị́ Mị̃sị́rị̃góru rĩ drị̃ gá Yụ̃sụ́fụ̃ ị́jọ́ sĩ. ⁶ Aꞌbe ãko pírí Yụ̃sụ́fụ̃ drị́lẹ́ gá, ꞌbã ásị́ “Mâ ãko ãzí kí lé ꞌdĩ” yã rĩ kí drị̃ gá ku, wó lú ãkónã ĩꞌdi ꞌbã nalé rĩ áꞌdụ̂sĩ. Yụ̃sụ́fụ̃ zo úmgbô trũ rụꞌbâ trũ ãlá ru. ⁷ Ụ́ꞌdụ́ were vúlé gá ãmbógó ĩꞌdidrị̂ ꞌbã ũkû ásị́ ꞌde ĩꞌdi drị̃ gá jọ ĩꞌdiní, “Mí amụ́ ími lalé mâ sĩ.” ⁸ Wó gã úmgbé. Jọ ĩꞌdiní, “Ma ꞌi ãmbógó má drị̂ aꞌbe ãko pírí kí áma drị́ alé gá. ⁹ ꞌBá ãzí áma drị̃lẹ́ gá jó ꞌdĩ agá ꞌdâ la yụ, ãko ãzí ĩꞌdi ꞌbã fẽlé tãmbalé má drị́ ku la yụ, pẽ lú mi ꞌi. Má icó dó ị́jọ́ ũnzíkãnã idélé sĩ ị́jọ́ izajó Ãdróŋâ mẹ́lẹ́tị gá íngoníru?” ¹⁰ Ĩꞌdiní táni ị́jọ́ ꞌdĩ jọ agá Yụ̃sụ́fụ̃ní ụ́ꞌdụ́ pírí “Íla mi mâ sĩ” rá tí, Yụ̃sụ́fụ̃ gã úmgbé. ¹¹ Ụ́ꞌdụ́ ãlu mụ jó agâlé ĩꞌdi ꞌbã ãzị́ kí ngalé, ꞌbá ãtíꞌbóru jó agá ꞌdãá rĩ ꞌbã ãzí cí la yụ. ¹² Rụ Yụ̃sụ́fụ̃ ꞌbã bõngó jọ ĩꞌdiní, “Mí amụ́ ími lalé má be.” Wó aꞌbe ĩꞌdi ꞌbã bõngó drị́ la gá ꞌdãá, apá dô ụ́ngụ́lẹ́ sĩ ãmvé ꞌdõlé. ¹³ Ũkû dó mụ ndrelé la aꞌbe bõngó drị́ la gá ꞌdãá ãzíla apá ụ́ngụ́lẹ́ sĩ ãmvé, ¹⁴ jọ ãtiꞌbo ãzị́ ngalépi jó agá ꞌdãá rĩ ꞌbaní, “Ĩndre drĩ mgbá Ĩbũrãníyã rú ꞌdĩ ájí ĩꞌdi amụ́jó avájó ãma sĩ! Amụ́ tí jó agá ꞌdõlé áma ụrụlé gbõgbõ áꞌbe ụ̃lụ́lụ́. ¹⁵ Ĩꞌdi mụ áma ụ̃lụ́lụ́ arelé ꞌbá ꞌbaní áma itójó, apá ãmvé ꞌdõlé ụ́ngụ́lẹ́ sĩ aꞌbe ĩꞌdi ꞌbã bõngó áma drị́ gá.”

¹⁶ Mba bõngó tã ĩꞌdidrị́ ꞌdãá kpere ágô ꞌbã iyá agá.

¹⁷ Uja dó ĩꞌdiní ị́jọ́ ꞌdĩ kí vú nzelé jọ ĩꞌdiní, “Ãtíꞌbó míní ajílé Ĩbũrãníyã rú ꞌdĩ afí má drị́ jó agá ꞌdõlé, áma uꞌdálé, ¹⁸ ma mụ ụ̃lụ́lụ́ ꞌbelé ꞌbo, mvu apálé rá aꞌbe ĩꞌdi ꞌbã bõngô áma andre gá ꞌdãá.” ¹⁹ Yụ̃sụ́fụ̃ ꞌbã ãmbógô la mụ ị́jọ́ ꞌdĩ arelé ꞌbo, acá ũmbájírílí. ²⁰ ꞌDụ Yụ̃sụ́fụ̃ ꞌbãlé jó mãbụ́sụ̃ úpí drị̂ kí ꞌbãjó rĩ agá. Yụ̃sụ́fụ̃ ꞌbã adru agá mãbụ́sụ̃ gá ꞌdãá, ²¹ Ãdróŋá aꞌbe ĩꞌdi ku, iꞌda ĩꞌdiní ásị́ ị̃gbẹ̃ fẽ ꞌbã ãsĩkárĩrú ãmbógó kí andre tẽlépi rĩní ĩꞌdi lẽjó, ²² ꞌbã ĩꞌdi mãbụsụa kí drị̃lẹ́ gá ãmbógóru, vâ ãko pírí idélé mãbụ́sụ̃ gá ꞌdãá rĩ kí drị̃lẹ́ gá.

²³ ꞌBá mãbụ́sụ̃ kí tãmbalépi rĩ ꞌbã ásị́ ãko aꞌbelé Yụ̃sụ́fụ̃ pálé gá rĩ kí drị̃ gá ku ãꞌdusĩku ãko pírí ĩꞌdi ꞌbã idélé rĩ kí ãfũ rá drị̃lẹ́barú.