Íꞌdóŋá 38

Yụ́dãsị̃ kí Tãmárã be

¹ Ụ́ꞌdụ́ ꞌdã sĩ Yụ́dãsị̃ aꞌbe ádrị́pịka kí rá mụ uꞌálé ágọ́bị́ umvelé Hírã ꞌi rĩ rụ́ tọ̃rọ́mẹ́ ĩꞌbadrị̂ rụ́ Ãdũlámũ ꞌi. ² Yụ́dãsị̃ ịsụ́ ágọ́bị́ Kãnánĩrú rĩ ꞌbã ị̃zẹ́pị umvelé Sụ́ã ꞌi ĩgbã ĩꞌdi rá uꞌá kí ĩꞌdi be. ³ Ịsụ́ dó ꞌa tị ngọ́tị́ ágọ́bị́ úꞌda rụ́ la Ẹ́rị̃ ꞌi.

⁴ Ịsụ́ vâ ꞌa ãzí rĩ tị ngọ́tị́ ágọ́bị́ ꞌda rụ́ la Ũnánĩ ꞌi. ⁵ Tị vâ ngọ́tị́ ágọ́bị́ ãzî ꞌda rụ́ la Sélã ꞌi. Yụ́dãsị̃ sáwã ꞌdã sĩ Kẹ̃zị́bụ̃ gá ngọ́tị́ ꞌda kí tịjó rĩ sĩ.

⁶ Yụ́dãsị̃ ĩgbã ũkú ngọ́tị́ ĩꞌdidrị́ kãyú Ị́rị̃ nî, ũkû rụ́ Tãmárã ꞌi. ⁷ Wó Ị́rị̃ Yụ́dãsị̃ ngọ́pị kãyú rĩ idé ị́jọ́ ũnzíkãnã Ãdróŋâ drị̃lẹ́ gá ị́jọ́ ꞌdĩ sĩ Ãdróŋá fẽ drã rá. ⁸ Yụ́dãsị̃ jọ Ũnánĩ nî, “Ífi mî ádrị́pị ꞌbã ũkû lãꞌbĩ ãmadrị̂ ꞌbã ãꞌị̃jó la ítị mî ádrị́pịní drị̃lẹ́ cí rĩ sĩ.”

⁹ Ũnánĩ nị̃ rá anzị ꞌdã icó kí adrulé îni ku, drĩ firu lalé ũkú ꞌdã be ꞌbo ĩꞌdi ũri sĩ ꞌbá tịjó rĩ kí asu vụ̃rụ́, lẽ dó sĩ anzị ịsụ́lé ũkú ꞌdã be ádrị́pị̃ ꞌbã drị̃lẹ́ ru ku. ¹⁰ Ị́jọ́ ĩꞌdi ꞌbã idélé drị̃lẹ́ ịsụ́jó ádrị́pị̃ní ku rĩ fẽ Ãdróŋá ní ãyĩkõ ku, Ãdróŋá fẽ dô sĩ drã rá.

¹¹ Yụ́dãsị̃ jọ Tãmárã ngọ́pị̃ ꞌbã ũkûní, “Ímụ tẽlé la ãwụ́zị́ru mí átẹ́pị drị́ko gá ꞌdãá kpere mâ ngọ́pị Sélã ꞌbã zo agá icójó ími fijó rá.” Yụ́dãsị̃ jọ ị́jọ́ ꞌdĩ íni la idé ụ̃rị̃ sĩ ꞌî ngọ́pị la vâ mụ drãlé ádrị́pịka ị̃rị̃ ꞌdã ꞌba drị̂ áni ku. Tãmárã mụ dô sĩ vúlé ĩꞌbadrị́ko gá. ¹² Ụ́ꞌdụ́ ãzo vúlé gá Yụ́dãsị̃ ꞌbã ũkû Sụ́ã ị̃zẹ́pị drã rá, ụ́ꞌdụ́ ĩꞌdi áwáŋá drị̂ la mụ ukólé rá, mụ kí ĩꞌdi ꞌbã wọ̃rị̂ Hírã ꞌbá Ãdũlámũ gá rĩ be Tĩmínã gá ꞌbá ĩꞌdi ꞌbã kãbĩlõ ꞌbíko lịlépi rĩ kí andrélé.

^13-14 ꞌBá ãzí lũ Tãmárãní mî ándrị́pị la mụ Tĩmínã gá ĩꞌdi ꞌbã kãbĩlõ ꞌbíko lịlé. Ãꞌdusĩku ndre rá Sélã zo rá úfẽ ĩꞌdi ĩꞌdiní ágóru ku. Trũ bõngó ĩꞌdidrị́ ãwụ̃zị̃ drị̂ kí rá, ali ru ụrụꞌbá kũrũbábã sĩ ꞌberu drị̃ cí, mụ dó rilé tọ̃rọ́mẹ́ Ĩnãímũ ꞌbã kẹ̃jị́tị gẹ̃rị̃ mụlépi Tĩmínã gá rĩ gá. ¹⁵ Yụ́dãsị̃ la mụ ĩꞌdi ndrelé ꞌbo, ũrã ꞌbãngá ĩꞌdi ũkú ãwụ́ꞌbáru la ĩꞌdi ꞌbãru mẹ́lẹ́tị ꞌbejó cí rĩ sĩ. ¹⁶ Mụ ĩꞌdi rụ́ gẹ̃rị̃ tị gâlé jọ, “Ífẽ ámụ kolé mí be.” Zị ĩꞌdi, “Mi dó mání ãꞌdu fẽ yã?” Ịsụ́ nị̃ ꞌdĩ ꞌî ị̃zẹ́pị ngọ́pị̃ drãlépi rá rĩ ꞌbã ũkû ꞌi rĩ gá ku.

¹⁷ “Ma míní ị̃ndrị́ ágó mũlũkũdũ la ãfẽ angájó ị̃ndrị́ má drị̂ kí agâlé. Mí icó mání ãko ãzí ãfẽlé gúrãrú cêkõ rá yã?” ¹⁸ Zị ĩꞌdi, “Ma dó míní ãꞌdu fẽ gúrãrú yã?” Umvi ĩꞌdiní, “Mula drọ̃nọ́ ru ími drị́ gá ꞌdĩ ꞌi, ãzíla túré mí drị́ gá ꞌdĩ trũ.” Fẽ dó kí ĩꞌdidrị̂lé rá ko dó ụ́ꞌdụ́ ĩꞌdi be, ịsụ́ dô sĩ ꞌa. ¹⁹ ꞌDãá Tãmárã gõ vúlé ĩꞌbadrị́ko gâlé, trũ dó kũrũbábã kí rá, sụ̃ dó bõngó ĩꞌdidrị́ ãwụ̃zị̃ drị̂ kí áyụ jõ údu rĩ ꞌbã áni.

²⁰ Yụ́dãsị̃ ãpẽ dó wọ̃rị̂ Hírã tị ị̃ndrị́ mváŋâ trũ Tãmárã rụ́ ꞌdõlé, ꞌbã amụ́ dô sĩ ãko ándrá ꞌî aꞌbelé gúrãrú rĩ kí unzelé, wó Hírã ịsụ́ ĩꞌdi ku. ²¹ Zị ãgọbị Ĩnãímũ gá rĩ kí, “Ũkú ãwụ́ꞌbáru jõ gẹ̃rị̃ tị gá ꞌdâ rĩ íngõlé yã?” ꞌBá ãngũ ꞌdã gá rĩ umvi kí ĩꞌdiní, “ꞌBá ãzí ãwụ́ꞌbáru la ꞌdâ yụ.”

²² Ãgõ Yụ́dãsị̃ rụ́ ꞌdõlé jọ ĩꞌdiní, “Ándrụ̃ mâ ngá ĩꞌdi tị, ãgọbị ãngũ ꞌdã gá ꞌdãá rĩ jọ kí mání ꞌbá ãzí ãwụ́ꞌbáru la ꞌbãngá ĩꞌbadrị́ ꞌdãá yụ.” ²³ Yụ́dãsị̃ jọ, “Ímba ãko ꞌdĩ kí tã, álẽ ꞌbá ꞌbã gụ kí ãma ku, má ụ̃ꞌbị̃ tí ĩꞌdi ũfẽlé rá wó mí ịsụ́ dó ĩꞌdi ku ꞌdĩ.” ²⁴ Ĩmbá na vúlé gá ꞌbá ãzí jọ Yụ́dãní, “Mî ngọ́pị ꞌbã ũkû idé mị-ãcí ị́jọ́ ꞌdĩ sĩ ĩꞌdi dó ꞌa trũ.” Ị́jọ́ ꞌdĩ sĩ, Yụ́dãsị̃ jọ, “Ĩmi iyá ĩꞌdi ívélé ꞌbã drã rá.” ²⁵ Ála dó mụ ĩꞌdi iyálé ãmvêlé fẽ dó ụ́ꞌdụ́kọ́ ándrị́pị̃ nî jọ, “Má ịsụ́ ꞌa ágọ́bị́ ãko áma drị́ gá ꞌdĩ ꞌbã ꞌdị́pị drị́ índre drĩ kínõ ãꞌdi ãni yã áni, drọ̃nọ́ ꞌdĩ ꞌi ãzíla túré ꞌdĩ ꞌi.” ²⁶ Yụ́dãsị̃ nị̃ dó kí rá jọ, “Ị́jọ́ ĩꞌdidrị́ ꞌdĩ ĩꞌdi ị́jọ́ kpị la, ndẽ má drị̂ rá ĩꞌdi fẽjó mâ ngọ́pị Sélãní ku rĩ sĩ.” ²⁷ Sáwã la mụ calé ĩꞌdiní tĩjó ꞌbo, ãwụ̃ anzị kí ị̃rị̃. ²⁸ Ĩꞌdiní kí tĩ agá ꞌdâ ngọ́tị́ ãzí rĩ asú ru drị́ ãmvé, ũkú ngọ́tị́ tĩlépi rĩ rụ drị́ la umbé ĩꞌdidrị́ kéyĩ ika sĩ jọ, “ꞌDĩ ngọ́tị́ kãyú rĩ.” ²⁹ Ujaru drị̂ nzelé vúlé, ádrị́pị̃ uja dó ãfũlé drị̃drị̃ ũkú ngọ́tị́ tĩlépi rĩ jọ, “ꞌDĩ dó gẹ̃rị̃ mí drị́ mî sĩ ãfũjó ãmvé ꞌdõlé ũkpó sĩ rĩ ꞌi ꞌbo” ꞌda dó rụ́ la Pẹ̃rẹ́zị̃ ꞌi. ³⁰ Ádrị́pị̃ drị́ la gá kéyĩ ika umbéjó rĩ útĩ ĩꞌdi vúlé vúléru úꞌda dó rụ́ la Zérã ꞌi.