Íꞌdóŋá 33

Yãkóꞌbõ mụ drị̃ ụfụlé Ị́sãwụ̃ be

¹ Yãkóꞌbõ ndre ádrị́pị Ị́sãwụ̃ ꞌbã amụ́ agá ãgọbị ĩꞌdidrị́ túrú sụ rĩ kî trũ, awa anzị kí Léyã ꞌba drị́ Rãkẹ́lị̃ be ãzíla izonzi ị̃rị̃ kí ãzã kolépi Bílĩhã kí Zị̃lị́pã be rĩ ꞌba drị̂ kî trũ. ² ꞌBã izonzi ị̃rị̃ kí ãzã kolépi rĩ kí anzị ĩꞌbadrị̂ abe drị̃ gá, Léyã anzị ĩꞌdidrị́ rĩ kí abe kí ũngúkú gá, Rãkẹ́lị̃ kí ngọ́pị̃ Yụ̃sụ́fụ̃ be ãsị̃jó. ³ Yãkóꞌbõ mụ kí drị̃lẹ́ gá, ĩꞌdiní lẽ agá ca agá ádrị́pị̃ rụ̂lé, tị̃ ãja vụ̃rụ́ pâlékó ázị̂rị̃. ⁴ Wó Ị́sãwụ̃ cẹ̃ ĩꞌdi rụ̂lé drị̃ ụfụjó ĩꞌdi be, amvu ĩꞌdi kpãrã. Kí ị̃rị̃ trá rĩ kí awálé awá-awâ. ⁵ Ị́sãwụ̃ undré ãngũ pírí, ndre ũkú ꞌdĩ kî ãzíla anzị kî; zị, “ꞌBá mi be ꞌdĩ kí ĩꞌdi kî?” Yãkóꞌbõ umvi ĩꞌdiní, “Ãmbógó, ꞌdĩ kí anzị Ãdróŋâ ꞌbã fẽlé mání ri kî.” ⁶ Izonzi tá ị̃rị̃ ꞌdĩ amụ́ kí anzị ĩꞌbadrị̂ kí abe ụ̃tị̃ kí ãja vụ̃rụ́, ⁷ Léyã kí anzị abe amụ́ kî, Yụ̃sụ́fụ̃ amụ́ kí Rãkẹ́lị̃ be ãsị̃jó, wó pírí ụ̃tị̃ kí ãja vụ̃rụ́.

⁸ Ị́sãwụ̃ zị ĩꞌdi jọ, “Ãnãkpá tá mání drị̃ ụfụjó ĩꞌba abe ꞌda kí ípẽ kí bụ́lụ́ gá ãꞌdu ị́jọ́ sĩ?” Yãkóꞌbõ umvi jọ, “Mání sĩ sụ̃sụ́ ịsụ́jó mí drị́.”

⁹ Wó Ị́sãwụ̃ jọ, “Mâ ádrị́pị ãko má drị̂ kí wẽwẽ rú, ímba ãko mî trũ adrujó rĩ kí tã.”

¹⁰ Yãkóꞌbõ jọ, “Yụ, ádrĩ sụ̃sụ́ ịsụ́ mí drị́ ꞌbo, mí ãꞌị̃ ãko mâ fẽlé míní ꞌdĩ kî. Ími mẹ́lẹ́tị ndrejó rĩ ĩꞌdi cécé mání Ãdróŋâ ꞌbã mẹ́lẹ́tị ndrejó rĩ áni, míní adrulé mâ wọ̃rị́ru úꞌdîꞌda rĩ sĩ. ¹¹ Mâ ádrị́pị, mí aꞌị́ ãko mání ajílé míní ꞌdĩ ꞌi, Ãdróŋá wi mání sụ̃sụ́ ãko ꞌdĩ kî sĩ.” Yãkóꞌbõ rĩ ị́jọ́ jọlé ũŋmĩ ĩꞌdi ũkpó ru kpere Ị́sãwụ̃ bã kí ãꞌị̃ agá.

¹² Ị́sãwụ̃ jọ, “Lẽ ãma itú kí ãma mụjó, wó ma dó drị̃ ꞌde ma ꞌi.” ¹³ Yãkóꞌbõ umvi jọ, “Ínị̃ vâ rá anzị acá kî dó ãvẹ̃vị̃ kóru, lẽ má ũrã ị́jọ́ kãbĩlõ kí drị̃ gá tị́ kî trũ ãzíla ĩꞌbã mvaka kî abe. Údrĩ kî dro ũkpó sĩ ụ́ꞌdụ́ ãlu ị̃dị́ yã áni, icó kí ũdrãlé pírí rá. ¹⁴ Mâ ádrị́pị ímụ ãma drị̃lẹ́ gá ma ꞌdó ꞌde ími ũngúkú gá ãnãkpá má drị́ ꞌdĩ kî trũ anzị kí abe jãjãrú kpere mání mụ agá ími ịsụ́ agá Édõmũ gâlé.”

¹⁵ Ị́sãwụ̃ jọ ĩꞌdiní, “Lẽ má aꞌbe ãgọbị ꞌdĩ ꞌbã ãzí kí ꞌdâ.” Wó Yãkóꞌbõ umvi ĩꞌdiní, jọ, “Mi kí aꞌbe ãꞌdu ị́jọ́ sĩ? Álẽ tá lú sụ̃sụ́ ịsụ́ lé mí drị́.” ¹⁶ Ụ́ꞌdụ́ ꞌdã sĩ Ị́sãwụ̃ iꞌdó ãcị̃ ĩꞌdidrị̂ mụjó Édõmũ gá rĩ cọtị. ¹⁷ Wó Yãkóꞌbõ uja mụlé Sụ̃kọ́tị̃ gá, sị jó ĩꞌdiní ụ́ꞌdụ̂ kojó rĩ ꞌi ãzíla drõ índrí ãnãkpá ꞌbanî. ꞌDĩ bãsĩ ị́jọ́ ãngũ ꞌdã ꞌbã rụ́ umvejó Sụ̃kọ́tị̃ ꞌi ꞌdĩ.

¹⁸ Yãkóꞌbõ ãgõ Sẹ̃kẹ́mụ̃ gá ꞌdĩ Kãnánĩ gá angájó Pãdánĩ Ãrámũ gá ãzíla drõ bụ́rụ́jọ́ ĩꞌdidrị̂ ãni rú andre la gá ꞌdãá. ¹⁹ Ĩgbã ãngũ ĩꞌdiní bụ́rụ́jọ́ drõjó rĩ Sẹ̃kẹ́mụ̃ ꞌbã átẹ́pị Hãmọ́rị̃ ꞌbã ãnzị́pịka ꞌba drị́ ãjẹ̃ ãmbógó sĩ. ²⁰ Uja dó ãngũ ídétéŋá idéjó rĩ sịlé ꞌda dó rụ́ la Élĩ-Ẽlóhẽ-Ịsịrayị́lị̃. Ífí la Ãdróŋá ũkpó ꞌdị́pị Ịsịrayị́lị̃ drị̂ ꞌi.