Íꞌdóŋá 32

Yãkóꞌbõ itú dóru drị̃ ụfụjó Ị́sãwụ̃ be

¹ Yãkóꞌbõ ꞌbã mụ agá gẹ̃rị̃ gá ꞌdâ, mãlãyíkã Ãdróŋá drị̂ amụ́ kí drị̃ ụfụlé ĩꞌdi be. ² Yãkóꞌbõ la mụ kí ndrelé ꞌbo jọ, “ꞌDĩ lị́cọ́ Ãdróŋá drị̂ ꞌi,” ꞌda dó sĩ ãngũ ꞌdã rụ́ Mãhãnáímũ ꞌi.

³ Yãkóꞌbõ pẽ ꞌbá ị́jọ́ ujílépi rĩ kí tị ĩꞌdi drị̃lẹ́ gá mụjó ádrị́pị̃ Ị́sãwụ̃ rụ́ ãngũ umvelé Síyã gá ꞌdĩ sụ́rụ́ Édõmũ ꞌi rĩ gá. ⁴ Jọ ĩꞌbaní; “Ị́jọ́ ꞌdĩ ĩmi mụlé jọlé ãmbógó má drị́ Ị́sãwụ̃nî rĩ: ‘Ãtíꞌbó mí drị́ Yãkóꞌbõ jọ, ꞌijõ uꞌá agá Lãbánĩ be lé acájó kpere ãndrũ. ⁵ Ĩꞌdi tị̂ trũ kãyĩnõ trũ, kãbĩlõ ãzíla ị̃ndrị́, ãtiꞌbo ãgọbị rú rĩ kí ãtiꞌbo ũkúru rĩ kî trũ. Úꞌdîꞌda ꞌí ãpẽ ụ́ꞌdụ́kọ́ ꞌdĩ tị úpí ꞌi drị̂ drị́, ꞌi nõ lẽtáŋá ịsụ́ ásị́ ĩꞌdi gá rá yã áni.’” ⁶ ꞌBá ị́jọ́ ujílépi rĩ kí mụ ãgõlé Yãkóꞌbõ rụ́ ꞌdõlé jọ kí, “Ãmụ kpere mî ádrị́pị Ị́sãwụ̃ rụ́ ĩꞌdi amụ́ drị̃ ụfụlé mí be ꞌdĩ, ĩꞌdi ꞌbâ trũ túrú sụ.” ⁷ Yãkóꞌbõ idé ụ̃rị̃ sĩ ãzíla ásị́ la mvu rá, awa ꞌbá ĩꞌdidrị̂ kí wókõ ị̃rị̃ sĩ, ãnãkpá kí tị́ kí abe ãzíla ngãmíyã kî trũ. ⁸ Ũrã ĩꞌdi ásị́ gá, “Ị́sãwụ̃ drĩ amụ́ ãlí gá wókõ ãlu rĩ drị̂ gá, wókõ ãzí acelépi rĩ la sĩru pa rá.”

⁹ Yãkóꞌbõ ãꞌị̃ Ãdróŋá, “Ãdróŋá mâ áyị́pị Ịbụrahị́mụ̃ drị̂ ãzíla mâ átẹ́pị Ĩsákã drị̂, Ãdróŋá ándrá jọlépi la mání, ꞌígõ vúlé sụ́rụ́ mídrị̂ agá kãká mídrị̂ ꞌba rụ̂lé, ma fẽ mi kpẹ̃lé rĩ ꞌi. ¹⁰ Má icó ku ásị́ ị̃gbẹ̃ ãzíla ãꞌị̃táŋá mî iꞌdalé mání ãtíꞌbó mídrị̂ní rĩ sĩ. Áza ándrá Yõrĩdánĩ ꞌi túré áma drị́ gá rĩ sĩ ãko wereŋá kí abe, úꞌdîꞌda má acá dó ꞌbá trũ ũꞌbíru tị trũ ị̃rị̃. ¹¹ Ípa ma, ázị ími tị gá, mâ ádrị́pị Ị́sãwụ̃ drị́ gá, ãꞌdusĩku ma idé ụ̃rị̃ sĩ ĩꞌdi amụ́ ãꞌdị̂ ꞌdịlé má be ãzíla andre anzịŋá ꞌdĩ ꞌba drị̂ kî trũ. ¹² Wó íjọ mání, ‘Ma fẽ mi kpẹ̃lé ãzíla ími drị̃lẹ́ kí adru cécé cínákí mĩrĩ tị gá rĩ áni, ꞌbá icó kí lãlé ku.’” ¹³ Ĩꞌdi dó mụ ụ́ꞌdụ́ kolé ꞌdãá ꞌbo, Yãkóꞌbõ uya ãko ãzí kí fẽlé ádrị́pị̃ Ị́sãwụ̃ní ãwãꞌdĩfôrú, ¹⁴ ị̃ndrị́ ãrónĩ túrú ị̃rị̃, ị̃ndrẹago kãlị́ ị̃rị̃, kãbĩlõ ãrónĩ túrú ị̃rị̃ ágó rĩ kí kãlị́ ị̃rị̃, ¹⁵ ngãmíyã ãrónĩ rĩ kí kãlị́ na mvaka abe, tị́ ãrónĩ kãlị́ sụ mãnịgọ kí mụdrị́, kãyĩnõ ãrónĩ rĩ kí kãlị́ ị̃rị̃ ágó rĩ kí mụdrị́. ¹⁶ Fẽ dó kí ãtiꞌbo ĩꞌdidrị̂ ꞌba drị́ tãmbalé kúmú ãlu-ãlu ĩꞌdi sĩ ĩꞌdi sĩ; jọ ãtiꞌbo ꞌdĩ ꞌbaní, “Ĩmụ drị̃lẹ́ gá wó ĩmi aꞌbe ãngũ ãma drĩdríŋĩ gá ãnãkpá ꞌdĩ kí abe.”

¹⁷ Imbá ị́jọ́ ãtíꞌbó kí drị̃ ꞌdelépi rĩní, “Mâ ádrị́pị Ị́sãwụ̃ drĩ dó drị̃ ụfụ ĩmi trũ zị jõ dó, ‘Ĩmi ãꞌdi ãni, ãzíla ĩmi mụ íngõlé, ãnãkpá ĩmi drị̃lẹ́ gá ꞌdĩ ꞌbã ꞌdị́pị ãꞌdi ꞌi?’ ¹⁸ Ĩjọ dó íni, ‘Kí ãtíꞌbó má ãni Yãkóꞌbõ ãni. Ãfẽ kí ãwãꞌdĩfôrú úpí ãma ãni Ị́sãwụ̃ní ãzíla ĩꞌdi amụ́ ãma vúlé gá ꞌdĩ.’” ¹⁹ Imbá vâ námbã ị̃rị̃ sĩ rĩ, námbã na sĩ rĩ ãzíla ꞌbá pírí kí vú ãbĩlépi ãnãkpá abe ꞌdĩ kí: “Ĩjọ ị́jọ́ ãlu ꞌdĩ ꞌbã vúŋá Ị́sãwụ̃ní ĩdrĩ drị̃ ụfụ ĩꞌdi trũ. ²⁰ Ĩjọ mgbã, ‘Mî ãtíꞌbó Yãkóꞌbõ la amụ́ ãma vúlé gá ꞌdĩ.’” Yãkóꞌbõ ũrã ãko ꞌî fẽlé ãwãꞌdĩfôrú drị̃lẹ́ gâlé ꞌdĩ kí sĩ, “Ádrĩ dô sĩ drị̃ ụfụ ĩꞌdi be, ĩꞌdi dô sĩ áma aꞌị́ ádrị́pịrú.” ²¹ Yãkóꞌbõ ꞌbã ũfẽtáŋá ãwãꞌdĩfôrú rĩ mụ kî dó drị̃lẹ́ gá wó ace ru ụ́ꞌdụ̂ kolé ĩꞌdidrị́ bụ́rụ́jọ́ agá ꞌdãá.

Yãkóꞌbõ uꞌbé kíru Ãdróŋá be

²² Ị́nị́ ꞌdã sĩ Yãkóꞌbõ angá ꞌdụ ĩꞌdĩ ũkú ị̃rị̃ ꞌdĩ kí, ĩꞌdi ꞌbã ũkú tá ãtiꞌború ị̃rị̃ ꞌdĩ kí ãzíla anzị mụdrị́ drị̃ ãlu ꞌdĩ kí abe za dó ị̃yị́ Yãbókĩ ꞌi. ²³ Ĩꞌdi mụ ꞌbá ĩꞌdidrị́ gá rĩ kí izálé ꞌá ꞌdã sĩ pírí ꞌbo, izá vâ ãko ĩꞌdidrị̂ kí pírí ĩndĩ. ²⁴ Yãkóꞌbõ ace dóru áꞌdụ̂sĩ vúlé ꞌdãá, ꞌbá ãzí ãlu uꞌbé kíru ĩꞌdi be kpere ãngũ ꞌbã ụwị́ agá. ²⁵ Ágọ́bị́ ꞌdã la mụ ndrelé la ꞌí icó Yãkóꞌbõ ũkpó ndẽlé ku, tị̃ drị́ Yãkóꞌbõ ꞌbã ĩfã úrósị́ gá, úrósị́ ꞌdã anzé rá ĩꞌbã kíru uꞌbé agá ꞌdãá. ²⁶ ꞌBá ꞌdã jọ ĩꞌdiní, “Mí ají ámụ, ãngũ ụwị́ ꞌbo.” Yãkóꞌbõ jọ, “Má icó ku kpere mî mání sụ̃sụ́ wi agá.”

²⁷ ꞌBá ꞌdã zị ĩꞌdi ꞌi, “Ími rụ́ ãꞌdi ꞌi?” Umvi, “Yãkóꞌbõ ꞌi.”

²⁸ ꞌBá ꞌdã jọ ĩꞌdiní, “Ími rụ́ icô dó adrulé ị̃dị́ Yãkóꞌbõ ꞌi ku, wó Ịsịrayị́lị̃ ꞌi, ãꞌdusĩku ĩmi uꞌbé ĩmi Ãdróŋá be ãzíla ꞌbá abe, índẽ rá.”

²⁹ Yãkóꞌbõ jọ, “ꞌBárĩ ílũ mání ími rụ́.” Wó umvi, “Mi áma rụ̂ zị ãꞌdu sĩ?” Wi dó ĩꞌdiní sụ̃sụ́ ꞌdãá. ³⁰ Yãkóꞌbõ ꞌda dó ãngũ ꞌdã rụ́ Pẹ̃nị́ẹ́lị̃ ꞌi, jọ, “ĩꞌdi íni la ãꞌdusĩku ãndre ãma Ãdróŋá be mịfị́ gá, tí mba drĩ vâ áma tá ídrirú.”

³¹ Ị̃tụ́ agá ĩꞌdi drị̃ gá ĩꞌdinî dó alị agá Pẹ̃nị́ẹ́lị̃ gá ꞌdãá, ĩꞌdi dó pá ꞌbe agá ꞌbẽ-ꞌbẽ úrósị́ la ꞌbã anzéjó rá rĩ sĩ. ³² ꞌDĩ bãsĩ ị́jọ́ kpere ãndrũ ꞌbá Ịsịrayị́lị̃ drị̂ kí ĩzá úrósị́ icílépi ꞌdĩ najó ku ꞌdĩ ãꞌdusĩku anzé ándrá Yãkóꞌbõ ꞌbã ĩfã úrósị́ gá rĩ ãni rú ĩzá ꞌdĩ gá ꞌdâ.