Íꞌdóŋá 30

¹ Rãkẹ́lị̃ la mụ ndrelé la ítị anzị Yãkóꞌbõní ku, uja uꞌálé ámvọ́pị̃ní ãjã sĩ. Jọ, “Yãkóꞌbõ, ífẽ mání anzị, ma mụ drãlé ku.” ² Yãkóꞌbõ acá ĩꞌdi be ũmbã sĩ. Jọ “ꞌÁ! Mí ũrã ị́jọ́ Ãdróŋâ ꞌbã idélé rĩ má icó idélé la ma ꞌi rĩ gá rá yã? Má atrị mi tịŋá gá cí la ma ꞌi yã?” ³ Rãkẹ́lị̃ jọ Yãkóꞌbõní, “Bílã dó ꞌdĩ, ĩzóŋá áma ãzã kolépi rĩ ífi ĩꞌdidrị́ jó agâlé, ítị ĩꞌdi be anzị kî lị́cọ́ má drị̂ ꞌbã adru rú sĩ cí.” ⁴ Cọtị Rãkẹ́lị̃ fẽ ĩzóŋá ĩꞌdi ãzã kolépi Bílã ꞌi Yãkóꞌbõní ũkúru. Yãkóꞌbõ fi dó ĩꞌdidrị́ jó agá. ⁵ Ịsụ́ ꞌa, tị dó ĩꞌdiní ngọ́tị́ ágọ́bị́, ⁶ Rãkẹ́lị̃ jọ, “Ãdróŋá lị dó ị́jọ́ áma drị̃ gá ꞌbo,” ꞌda dó ngọ́tị̂ rụ́ Dánĩ ꞌi. ⁷ Ĩzóŋá Rãkẹ́lị̃ ãzã kolépi Bílã ịsụ́ vâ ꞌa, tị ngọ́tị́ ágọ́bị́ Yãkóꞌbõní ị̃rị̃ rĩ ꞌi, ⁸ Rãkẹ́lị̃ jọ, “Ãtrị dó ãma ãjã sĩ mâ ámvọ́pị be, ándẽ dó ꞌbo.” ꞌDa dó rụ́ la Nãfũtálĩ ꞌi.

⁹ Léyã la mụ ndrelé la ítu pá tịŋá gá cí ꞌbo, fẽ ĩzóŋá ĩꞌdi ãzã kolépi Zị̃lị́pã ꞌi Yãkóꞌbõní ũkúru. ¹⁰ ꞌDĩ ꞌbã vúlé gá cọtị Zị̃lị́pã tị ngọ́tị́ ágọ́bị́. ¹¹ Léyã jọ, “Áma andre múké.” ꞌDa dó ngọ́tị̂ rụ́ Gádĩ ꞌi. ¹² Zị̃lị́pã tị Yãkóꞌbõní ngọ́tị́ ágọ́bị́ ãzí rĩ ꞌi. ¹³ Léyã jọ, “Ãyĩkõ fụ ma ꞌdã áni yã! Ũkú kî dó áma umve ãyĩkõrú ꞌi.” ꞌDa dó ngọ́tị̂ rụ́ Ásẹ̃rị̃ ꞌi.

¹⁴ Áyi ãná lãjó rĩ sĩ Rụ́bẹ̃nị̃ angá ámvụ́ agâlé ife ífí umvelé ágófũku rĩ trũ, ĩꞌdi kí ají agá ãndrẽ Léyã nî. Ụ́kụ́pị̃ Rãkẹ́lị̃ jọ, “Mí ãfẽ kí mánî.” ¹⁵ Léyã umvi Rãkẹ́lị̃ní, “Mî mâ ágô pajó rá rĩ ca míní ku yã? ꞌDĩ ꞌbã drị̃ gâ sĩ ílẽ vâ mâ ngọ́pị ꞌbã ife ífí ágófũku rĩ kí palé ĩndĩ yã?” Rãkẹ́lị̃ umvi dó ị́jọ́ cãndíru jọ, “Ãndrũ rĩ gá ĩꞌdi ko mí be rá.”

¹⁶ Léyã tẽ dó ágô Yãkóꞌbõ amụ́ agá ĩndróloŋá sĩ ámvụ́ agâlé lị dó drị̃ la jọ, “Ãndrũ rĩ gá má ĩgbã mi ꞌbo, mâ ngọ́pị ꞌbã ife ífí ágófũkurú rĩ kî sĩ. Mi ãndrũ rĩ gá ko má be.” Yãkóꞌbõ mụ dô sĩ kolé Léyã be.

¹⁷ Ãdróŋá are Léyã ꞌbã ụ́ꞌdụ́kọ́ rá, ịsụ́ dó ꞌa, tị ngọ́tị́ ágọ́bị́ Yãkóꞌbõní námbã tõwú sĩ rĩ ꞌi. ¹⁸ Léyã jọ, “Ãdróŋá ũfẽ mâ mũgũꞌbã jõku ụ̃rọ̃drị́ rá ãꞌdusĩku ĩzóŋá áma ãzã kolépi rĩ áfẽ ándrá Yãkóꞌbõ nî.” Uja dó ngọ́tị́ŋâ rụ́ ꞌdalé Ĩsãkárĩ ꞌi.

¹⁹ Léyã tị vâ ngọ́tị́ námbã ázíyá rĩ ágọ́bị́. ²⁰ Jọ, “Ãdróŋá fẽ mání drị̃lẹ́ba ndẽlépi rá rĩ ꞌbo. Ãma dó nga ãma icí mâ ágô Yãkóꞌbõ be rá, ĩꞌdi dó vâ mâ lẽ rá ĩꞌdi vâ mání ãrútáŋá fẽ rá. Ãꞌdusĩku átị ĩꞌdiní anzị ãgọbị ázíyá.” ꞌDa dó ngọ́tị̂ rụ́ Zãbụ̃lọ́nị̃ ꞌi.

²¹ Vúlé vúléru, Léyã tị ĩzóŋá, ꞌda rụ́ la Dị́nã ꞌi.

²² ꞌDã ꞌbã ũngúkú gá Ãdróŋá are Rãkẹ́lị̃ ꞌbã zịtáŋá, fẽ ĩꞌdiní icójó ngọ́tị́ŋá ịsụ́jó rá. ²³ Ịsụ́ ꞌa tị ngọ́tị́ ágọ́bị́, jọ, “Ãdróŋá wụ̃ dó drị̃nzá áma rụ́ ꞌbã sĩ ãvĩjó rĩ rá.” ²⁴ ꞌDa dó rụ́ la Yụ̃sụ́fụ̃ ꞌi, (ífí la ma tá ãzíla ịsụ́ ị̃dị́ ꞌi) jọ, “Ãdróŋá ꞌbã fẽ ãzíla ị̃dị́.”

Yãkóꞌbõ ꞌbã kãbĩlõ ꞌbã kí kpẹ̃jó rĩ

²⁵ Rãkẹ́lị̃ la mụ Yụ̃sụ́fụ̃ tịlé ꞌbo, Yãkóꞌbõ jọ Lãbánĩní, “Álẽ dó gõlé ãmadrị́ lị́cọ́ gá. ²⁶ Mí ají áꞌdụ mâ ũkú kí anzị abe mâ ngalé mí drị́ ãzị́ sĩ ꞌdĩ kí ma dô sĩ áma ĩdã rá. Ị́nị̃ dó ánga míní ãzị́ íngõpí yã rĩ rá.” ²⁷ Lãbánĩ umvi ĩꞌdiní, “Índre ímụ ku ãꞌdusĩku Ãdróŋá wi mání sụ̃sụ́ mí adrujó ꞌdâ cí rĩ sĩ, mâ andré agá la újógó gá. ²⁸ Mí ũlũ mání ãjẹ̃ mî lẽlé rĩ, ma kí ũfẽ rá.” ²⁹ Yãkóꞌbõ umvi ĩꞌdiní, “Ị́nị̃ ánga ãzị́ míní ásị́ ãlu sĩ ílí tré ꞌdĩ kí agá rĩ rá, ãzíla kãbĩlõ mídrị̂ kpẹ̃ kí tré mâ kí tãmbãjó rĩ sĩ. ³⁰ Ándrá mí drị́ wereŋá ꞌdĩ kpẹ̃ kí wẽwẽ rú. Ãdróŋá wi vâ míní sụ̃sụ́ ãko pírí mâ idélé rĩ kí drị̃ gá. ꞌDĩ dó sáwã mání ãzị́ má drị̂ kí ngajó rĩ ꞌi.”

³¹ Lãbánĩ zị ĩꞌdi ị̃dị́, “Ílẽ má ũfẽ mi íngõpí?” Yãkóꞌbõ umvi ĩꞌdi, “Álẽ ũfẽŋá ãzí ị̃dị́ ku ídrĩ ị́jọ́ ãlu ꞌdĩ idé rá ma kãbĩlõ mí drị́ ꞌdĩ kí tãmba rá. ³² Mí ají ámụ kãbĩlõ ũꞌbí mí drị́ ꞌda kí agâlé pírí ãndrũ má uya ị̃ndrị́ru uꞌbélépi kpĩcí kpĩcí rĩ kí kãbĩlõ ịnị rĩ kí abe pírí. ꞌDã dó ũyá mâ lẽlé ífẽ mání rĩ ꞌi. ³³ Drụ́zị́ mi dô sĩ nị̃ la ma ị́jọ́ kpị la idé yã rĩ ídrĩ dó ị̃ndrị́ru uꞌbélépi kpĩcí kpĩcí la ịsụ́ ku ãzíla kãbĩlõ ịnị la kí ịsụ́ má drị̂ kí agá ku, mi dó nị̃ la tọndọlọ má ụ̃gụ̃ ꞌdĩ kí angájó mi drị̂ kí agá.” ³⁴ Lãbánĩ umvi, “Ã ꞌĩru rá. Ãma dó idélé cécé mî jọlé ꞌdĩ áni.” ³⁵ Wó ụ́ꞌdụ́ ꞌdã sĩ Lãbánĩ uya ị̃ndrẹagọru ụlị́lépi jõ ku nzínzí ãzíla ãrónĩru uꞌbélépi kpĩcí kpĩcí ãzíla imve ꞌbã adrujó kí ụrụꞌbá gá cí ꞌdĩ kí, uya vâ kãbĩlõ ịnị rĩ kí. Fẽ kí anzị ĩꞌdidrị̂ ꞌba drị́, ³⁶ Lãbánĩ ngọ́pịka ụꞌdụ kí ãnãkpá kpĩcí kpĩcí rĩ kí rá, mụ kí dó álị́ Yãkóꞌbõ rụ́ ꞌdâ kãbĩlõ kî trũ, ãcị̃ ãzo ụ́ꞌdụ́ nalépi na la. Yãkóꞌbõ mba dó kãbĩlõ Lãbánĩ drị́ ꞌdĩ kí tã. ³⁷ Yãkóꞌbõ aꞌdụ́ ife ị̃bị ị̃rẹ́bị́ ru la kénĩ ife umvelé Pápụ̃lã, Ãlũmóndĩ ãzíla Sãkãmórẽ rĩ upí úꞌbó la ĩfãkã la ace imverú (Ãnãkpá kí uꞌbéjó lúbékẽrú). ³⁸ Ũꞌbã kẹ̃lị́ká ꞌdĩ kí ãnajo ãnãkpá ꞌbã kí ị̃yị́ mvụjó rĩ gá (andre gá), ũꞌbã kí ꞌdãá ãꞌdusĩku ãnãkpá ꞌdĩ kí jõ ĩlũwã ị̃yị́ mvụŋá gá ꞌdãá. ³⁹ Fẽ dó ãnãkpá ꞌbaní tịlé mvaka la kí lúbékẽrú ãzíla kpĩcí kpĩcíru.

⁴⁰ Yãkóꞌbõ awa kãbĩlõ kí ị̃ndrị́ abe ndú-ndú, fẽ ja kí tị kãbĩlõ lúbékẽ ãzíla ịnị Lãbánĩ drị̂ ꞌba rụ́ léru. Ị́jọ́ ꞌdĩ sĩ, ịsụ́ kãbĩlõ ĩꞌdidrị̂ kí tãmbajó ndú Lãbánĩ drị̂ agá. ⁴¹ Ãrọ́nị̃ ụrụꞌbá ãlá rĩ drĩ kí dó idé ágó sĩ, Yãkóꞌbõ la ife ꞌbã kénĩ ꞌda kí ꞌbã ãngũ ĩꞌbã kí sĩ ị̃yị́ mvụjó rĩ gá, kî sĩ ĩlũwã agá kẹ̃lị́ká ꞌdĩ kí drĩdríŋĩ gá.

⁴² Wó ꞌbã ife ꞌdĩ kí ãnãkpá ũkpó kóru rĩ kí drị̃lẹ́ gá ku. Ãnãkpá Lãbánĩ drị̂ kí ũkpô kóru, wó Yãkóꞌbõ drị̂ kí pírí ũkpô trũ rĩ kî. ⁴³ Ị́jọ́ ꞌdĩ sĩ, Yãkóꞌbõ acá ꞌbá kụ́rẹ́nị́ larú. Ĩꞌdi ꞌbã kãbĩlõ kí, ãtiꞌbo kí, ngãmíyã kí, ãzíla kãyĩnõ abe wẽwẽ rú.