Íꞌdóŋá 29

Yãkóꞌbõ acá Pãdánĩ Ãrámũ gá

¹ Yãkóꞌbõ mụ dó ãcị̃ trũ drị̃ gá wókõ ị̃tụ̂ ꞌbã ãfũ agá léru. ² Acá kídí ãzí tị gá ndre kãbĩlõ kí tịru tralépi ngúlú ru ngúlú ru naru ula agá ị̃yị́ tị gá ꞌdãá. Kãbĩlõ ꞌdĩ kí ála ĩꞌbaní ị̃yị́ fẽ mvụlé kídí tị ụ̃pị̃lé írã ãmbógó sĩ cí ꞌdĩ gá. ³ Kãbĩlõ drĩ kí dóru atrá ꞌbé ándrá pírí ꞌbo, ꞌbá kãbĩlõ ucélépi ꞌdã kí írã ꞌdã gũ bụ́lụ́ gá ĩꞌbaní ị̃yị́ fẽjó. Kí dó vâ írã gũ vúlé kídí tị ụ̃pị̃jó.

⁴ Yãkóꞌbõ zị ꞌbá kãbĩlõ ucélépi ꞌdĩ kí, “Mâ wọ̃rị́kâ ĩmi angá íngõlé yã?” Umvi kí, “Hãránĩ gá.” ⁵ Zị kí, “Ị̃nị̃ Lãbánĩ Nãhọ́rị̃ ꞌbã ngọ́pị drị̂ rá yã?” Umvi kí, “Wõyí, ãnị̃ ĩꞌdi cé.” ⁶ Yãkóꞌbõ zị kí, “Ĩꞌdi múké yã?” Umvi kí, “Wõyí ĩꞌdi múké, índre ị̃zẹ́pị̃ Rãkẹ́lị̃ la amụ́ ĩꞌdidrị́ kãbĩlõ rĩ kî trũ ꞌdã.” ⁷ Yãkóꞌbõ zị kí, “Ị̃tụ̂ drĩ ụrụ gá ꞌdĩ ĩfẽ kãbĩlõ ꞌbaní ị̃yị́ mvụlé ꞌbã mụ kî sĩ ị̃rẹ́bị́ nalé ku ãꞌdu sĩ yã?” ⁸ Umvi kí, “Ãma icó ku kpere kãbĩlõ ꞌbã kíru atrá agá pírí ráká, ála írã gũ bụ́lụ́ gá kídí tị gá ꞌdâ ála dó sĩ kãbĩlõ ꞌbaní ị̃yị́ fẽ mvụlé ĩndõ.”

⁹ Yãkóꞌbõ ꞌbã kí drĩ ị́jọ́ jọ agá ꞌdâ, Rãkẹ́lị̃ iyá kãbĩlõ átẹ́pị̃ drị̂ kí abe ãꞌdusĩku ĩꞌdi ándrá ꞌbá kãbĩlõ ucélépi la. ¹⁰ Yãkóꞌbõ la mụ Rãkẹ́lị̃ ádrọ́pị̃ Lãbánĩ ị̃zẹ́pị ndrelé kãbĩlõ ĩꞌdidrị̂ kî trũ, mụ kídí tị gâlé, gũ írã bụ́lụ́ gá fẽ dó kãbĩlõ ꞌbaní ị̃yị́ mvụlé. ¹¹ Yãkóꞌbõ amvu kíru Rãkẹ́lị̃ be kpãrã iꞌdó dó awálé mị́ndrệ trũ ãyĩkõ sĩ. ¹² Nze dóru vú Rãkẹ́lị̃ní, “Ma mî átẹ́pị ꞌbã kãká, Rẽbékã ꞌbã ngọ́pị ꞌi.” Cẹ̃ dó ị́jọ́ ꞌdĩ lũlé átẹ́pị̃ní; ¹³ ĩꞌdi mụ ị́jọ́ ãdrõmvâ Yãkóꞌbõ drị̂ arelé ꞌbo, afụ ru ĩꞌdi aꞌị́lé, amvu kíru ĩꞌdi be kpãrã ajî dó ĩꞌdi ĩꞌdidrị́ lị́cọ́ gá ꞌdõlé, ꞌdã gá ꞌdãá Yãkóꞌbõ nze dó ĩꞌdiní ị́jọ́ ĩꞌdi ụrụꞌbá gá rĩ kî.

^14-18 Lãbánĩ ꞌbã izonzi kí ándrá ị̃rị̃, kãyú rĩ ꞌbã rụ́ Léyã ꞌi, vúlé rĩ rụ́ la Rãkẹ́lị̃ ꞌi. Léyã ꞌbã mịfị́ kí ũnĩ-ambambarú, wó Rãkẹ́lị̃ ụrụꞌbá ꞌbãngá pírí túlí ũnĩ-ambambarú. Lãbánĩ jọ Yãkóꞌbõní, “Mi ĩzá má drị̂ ꞌi ãzíla ãrí má drị̂ ꞌi.” Yãkóꞌbõ dó mụ uꞌálé Lãbánĩ rụ́ ꞌdâ ĩmbá ãlu, Lãbánĩ jọ ĩꞌdiní, “Yãkóꞌbõ, mí icó mání ãzị̂ ngalé ị̃sálị ku ídrĩ táni adru mâ kãká tí. Ílẽ dó wó ma ũfẽ mi sị́ yã?” Rãkẹ́lị̃ alị́ Yãkóꞌbõ ásị́ káyĩ lẽ dó sĩ ĩꞌdi ꞌi, jọ, “Ma míní ãzị́ nga ílí ázị̂rị̃ ídrĩ ãꞌị̃ mání Rãkẹ́lị̃ ĩgbãlé mâ ũkúru rá rĩ gá.” ¹⁹ Lãbánĩ jọ, “Má ãꞌị̃ rá, ma dũbã la ĩꞌdi fẽ míní aga ꞌbá ãzí nî rĩ, mí uꞌá áma andre gá ꞌdâ.” ²⁰ Yãkóꞌbõ nga ãzị́ ílí ázị̂rị̃ Rãkẹ́lị̃ ĩgbãjó, wó ílí ꞌdĩ indré kí ĩꞌdiní wereŋáru ĩꞌdi ꞌbã Rãkẹ́lị̃ lẽjó ambamba rĩ sĩ.

²¹ Yãkóꞌbõ jọ dó Lãbánĩní, “Sáwã má drị́ ãzị́ ngajó rĩ ukó dó rá, mí ãfẽ dó mâ ũkî ꞌi.” ²² Lãbánĩ atrá dó kãká kí pírí idé dó ĩꞌbaní yãmãrĩ. ²³ Ị́nị́ ꞌdã sĩ Rãkẹ́lị̃ fẽjó rĩ kẹ̃jị́ gá Lãbánĩ fẽ Léyã áyụ, Yãkóꞌbõ ko kî dó ụ́ꞌdụ́ ĩꞌdi be. ²⁴ Lãbánĩ fẽ dó ị̃zẹ́pị̃ Léyãní Zị̃lị́pã ꞌi ãtíꞌbóru. ²⁵ Yãkóꞌbõ la mụ angálé ụ̃ꞌbụ́tị sĩ ꞌbo, ịsụ́ Léyã ꞌi. Mụ Lãbánĩ rụ̂lé, jọ “Mí idé ị́jọ́ áma ụrụꞌbá gá íni ãꞌdu sĩ yã? Ánga ãzị́ sĩ Rãkẹ́lị̃ ĩgbãjó mí ule áma drị̃ íni ãꞌdu sĩ?” ²⁶ Lãbánĩ umvi jọ, “Lãꞌbĩ ãmadrị́ ꞌdộ rĩ gá îgbã ĩzóŋá vúlé rĩ kãyú rĩní drị̃drị̃ ku. ²⁷ Ítẽ kpere ụ́ꞌdụ́ ázị̂rị̃ ị̃zị̃nãkã drị̂ ꞌba ukó ráká, ma míní Rãkẹ́lị̃ fẽ ídrĩ ãzị́ nga ílí ázị̂rị̃ ị̃dị́ rĩ gá.”

²⁸ Yãkóꞌbõ ãꞌị̃ rá ụ́ꞌdụ́ ázị̂rị̃ ị́zị́náká drị̂ la mụ ukólé ꞌbo, Lãbánĩ fẽ ị̃zẹ́pị̃ Rãkẹ́lị̃ ĩꞌdi ꞌbã ũkúru. ²⁹ Lãbánĩ fẽ Bílã ꞌi Rãkẹ́lị̃ní ãtíꞌbóru. ³⁰ Yãkóꞌbõ fi dó Rãkẹ́lị̃ drị́ jó agá ko dó sĩ ĩꞌdi be, ãzíla lẽ Rãkẹ́lị̃ ꞌi Léyãní ãndânĩ. Nga dó ãzị́ Lãbánĩní ílí ázị̂rị̃.

Yãkóꞌbõ ꞌbã anzị kî

³¹ Ãdróŋá la dó mụ ndrelé la úlẽ Léyã ku, nzị̃ ĩꞌdi ꞌbã úkpócóŋá, wó Rãkẹ́lị̃ ace ru úndóru ngọ́tị́ŋâ kóru. ³² Léyã ịsụ́ dó ꞌa, tị dó ngọ́tị́ ágọ́bị́. ꞌDa rụ́ la Rụ́bẹ̃nị̃ ꞌi. Rụ́bẹ̃nị̃ ífí la jọ, “Ãdróŋá ndre dó mâ ũcõgõ rá. Ãndá ãndáru má ágô dó áma lẽ rá.” ³³ Ịsụ́ vâ ꞌa ãzí rĩ, tị ngọ́tị́ ágọ́bị́, jọ, “Ãdróŋá are dó úlẽ ma ku rĩ ꞌbo, fẽ dó mání ꞌdõ ꞌi.” ꞌDa dó rụ́ la Sị̃mọ́nị̃ ꞌi. ³⁴ Ịsụ́ vâ ꞌa ãzí rĩ ꞌi, gbõgbõ tị ngọ́tị́ ágọ́bị́, jọ, “Má ágô dóru ĩbĩ má be rá, ãꞌdusĩku átị dó ĩꞌdiní anzị ãgọbị na ꞌbo.” ꞌDa rụ́ la Lẹ́vị̃ ꞌi. ³⁵ Ịsụ́ vâ ꞌa ãzí rĩ ꞌi, tị ngọ́tị́ ágọ́bị́, jọ, “Úꞌdîꞌda ma dó Ãdróŋâ ịcụ́ rá.” ꞌDa dó rụ́ la Yụ́dã ꞌi. Ãsị̃ dó ngọ́tị́ŋá ịsụ́ŋá sĩ rá.