Íꞌdóŋá 28

Ĩsákã pẽ Yãkóꞌbõ tị Lãbánĩ rụ́

¹ Ĩsákã umve Yãkóꞌbõ ꞌi wi ĩꞌdiní sụ̃sụ́ jọ dó ĩꞌdiní, “Mí ĩgbã ũkú Kãnánĩ ízóru la ku. ² Ímụ cọtị Pãdánĩ Ãrámũ gá lị́cọ́ mî ãndrẽ ꞌbã átẹ́pị Bẹ̃tụ́ẹ́lị̃ drị̂ gá. Mí ịsụ́ ũkú mî ádrọ́pị Lãbánĩ ꞌbã izonzi kí agá ꞌdãá. ³ Ãdróŋá Ũkpó ꞌdị́pị ꞌbã wi míní sụ̃sụ́ ꞌbã fẽ vâ míní ũri mídrị̂ ꞌbã ĩjãlã kí vâru adrujó amụtị ꞌbá ũꞌbíru la. ⁴ ꞌBã wi vâ míní ãzíla drị̃lẹ́ mídrị̂ ꞌbaní sụ̃sụ́ ándrá ĩꞌdi ꞌbã wilé Ịbụrahị́mụ̃ nî rĩ ꞌi, mi dó sĩ ãngũ ándrá ĩꞌdi ꞌbã fẽlé Ịbụrahị́mụ̃ nî rĩ ꞌdụ míní ãngũ mî sĩ uꞌájó ala gá ꞌdâ ãmị́yọ́ŋáru rĩ. ⁵ Ĩsákã pẽ dó Yãkóꞌbõ tị mụjó ádrọ́pị̃ Lãbánĩ Bẹ̃tụ́ẹ́lị̃ ngọ́pị Ãrĩménĩãrú rĩ drị́ko gá Pãdánĩ Ãrámũ gá.”

⁶ Úꞌdîꞌda Ị́sãwụ̃ nị̃ rá Ĩsákã wi dó sụ̃sụ́ Yãkóꞌbõní pẽ dó tị la mụjó Pãdánĩ Ãrámũ gá ũkú ịsụ́jó lé, ĩꞌdiní sụ̃sụ́ wijó ꞌbo rĩ sĩ azị ĩꞌdiní, “Mí ĩgbã ũkú Kãnánĩ ízóru la ku.” ⁷ Yãkóꞌbõ are dó átẹ́pị̃ kí tị ãndrẽ be rá, mụ dô sĩ Pãdánĩ Ãrámũ gá. ⁸ Ị́sãwụ̃ nị̃ vâ ũkú Kãnánĩ ízóru ꞌdĩ kí átẹ́pị̃ Ĩsákã lẽ kí ku rĩ gá rá; ⁹ mụ dó sĩ átịdrị̂ Ịsụmaị́lị̃ Ịbụrahị́mụ̃ ngọ́pị drị́, ĩgbã dó ị̃zẹ́pị̃ Mãhãlátĩ ꞌi Nẽbãyótĩ ꞌbã ámvọ́pịrú rĩ ꞌi.

Urobí ũbĩ Yãkóꞌbõ ꞌi Bẹ̃tẹ́lị̃ gá

¹⁰ Yãkóꞌbõ aꞌbe dó Bẹ̃rị̃sẹ́bã rá ko dó drị̃ mụjó Hãránĩ gá. ¹¹ Ị̃tụ́ ꞌbã ꞌde agá ꞌdĩ ịsụ́ ãngũ ãzí sĩ ụ́ꞌdụ́ kojó. Aꞌdụ́ írã ãzí ãlu sĩ drị̃ ãtị̃jó la dóru vụ̃rụ́ ụ́ꞌdụ̂ kolé. ¹² Urobí ũbĩ ĩꞌdi ala gá ndre ãpị́kẹ pá la kpere vụ̃rụ́, drị̃lẹ́ lã kpere ꞌbụ̃ gá, ãzíla mãlãyíkã Ãdróŋá drị̂ kí asị́ ãzíla tụ ala gâ sĩ. ¹³ Ãdróŋá tu pá drị̃lẹ́ la gá ụrụ gá jọ, “Ma Ãdróŋá mî áyị́pị Ịbịrahị́mụ̃ drị́ rĩ, ma Ãdróŋá Ĩsákã drị̂, marú ãngũ mí sĩ ími lajó ꞌdĩ fẽ míní drị̃lẹ́ mídrị̂ ꞌbaní ĩndĩ; ¹⁴ drị̃lẹ́ mídrị̂ kí adru wẽwẽ rú cécé cínákí ụ̃nọ́kụ́ gá rĩ áni, mirú ími iré ị̃tụ̂ ꞌbã ꞌde agá léru, ãzíla ị̃tụ́ ꞌbã ãfũ agá léru, ándrâléru ãzíla; ími agá ãzíla ũri mídrị̂ agá sụ́rụ́ pírí kírú sụ̃sụ́ ịsụ́ rá. ¹⁵ Ímba ị́jọ́ ꞌdĩ tã ásị́ gá, ma adru mí be ãzíla ma ími tãmba ãngũ mî sĩ mụjó rĩ gá, marú vâ ími ají vúlé ãngũ ꞌdĩ gá ꞌdõlé; má icó ími aꞌbelé ku kpere mání ị́jọ́ mâ jọlé míní ꞌdĩ idé agá.”

¹⁶ Yãkóꞌbõ la mụ angálé ụ́ꞌdụ́ gâlé ꞌbo ũrã, “Ãndá ãndáru Ãdróŋâ ãngũ ꞌdĩ gá ꞌdâ cí, wó ánị̃ tá ku.” ¹⁷ Idé ụ̃rị̃ sĩ jọ, “Ãngũ ꞌdõ ásị́ mvu ráru ꞌdã áni yã! Ãngũ ꞌdõ dó ndú la yụ ꞌdõ ꞌbãngá jó Ãdróŋá drị̂ ꞌi; ĩꞌdi vâ kẹ̃jị́ tị ꞌbụ̃ drị́ gá rĩ ꞌi” ¹⁸ Yãkóꞌbõ angá ụ̃ꞌbụ́tịnị́nị́ aꞌdụ́ írã tá ĩꞌdi ꞌbã sĩ drị̃ ãtị̃jó rĩ ịꞌdị ĩꞌdi ụrụ gá pịpịrị, ũsũ ãdu drị̃ la gá ãwãꞌdĩfô fẽjó Ãdróŋá nî. ¹⁹ ꞌDa rụ́ la Bẹ̃tẹ́lị̃ ꞌi (tọ̃rọ́mẹ́ ꞌdã údu rĩ sĩ ála umve la Lụ́zị̃ ꞌi). ²⁰ Yãkóꞌbõ na ũyõ jọ, “Ãdróŋá drĩ adru má be ãzíla mba áma tã ãcị̃ má drị́ ꞌdĩ agá fẽ vâ mání íná nalé ãzíla bõngó sụ̃lé sụ̃sụ̃ la kí cí, ²¹ má ãgõ dô sĩ vúlé mâ átẹ́pị drị́ko gá rá, Ãdróŋâ dó adru Ãdróŋá má drị̂ ꞌi. ²² Írã mâ ịꞌdịlé pịpịrị rĩ la adru ãngũ Ãdróŋâ ị̃nzị̃jó la, ãzíla ãko pírí mâ ịsụ́lé rĩ ꞌbã wókõ ãlu mụdrị́ agá rĩ ma fẽ la Ãdróŋá nî.”