Íꞌdóŋá 27

Sụ̃sụ́ Ĩsákã ꞌbã wilé Yãkóꞌbõní rĩ

¹ Ĩsákã la mụ delé ꞌbo, mịfị́ la ãsã dó cí. Umve ngọ́pị̃ Ị́sãwụ̃ ngọ́tị́ kãyú rĩ ꞌi jọ ĩꞌdiní, “Mâ ngọ́pị!” Ãꞌị̃ dó, “Wõyí!” ² Ĩsákã jọ, “Índre áde dó ꞌbo ãzíla ụ́ꞌdụ́ mání drãjórĩ ace kíru wererú. ³ Íꞌdụ mî ụ́sụ kí bọ̃lộ be ífũ mání ãnãkpá ásé agá rĩ ꞌbã ĩzá ajílé. ⁴ Mí aꞌdí mání ĩzá jõ ãjị́ ambamba rĩ ꞌi, mí ají ĩꞌdi má rụ́ ꞌdõlé. Ádrĩ dó ĩꞌdi na ꞌbo, ma míní sụ̃sụ́ má drị́ ãsị̃jó rĩ wi ịsụ́ ádrã drĩ ku rú.”

⁵ Ĩsákã ꞌbã ị́jọ́ jọ agá Ị́sãwụ̃ be, Rẽbékã rĩ ị́jọ́ ꞌdã kí arelé. Ị́sãwụ̃ la mụ drị̃ kolé ꞌbo, ⁶ Rẽbékã jọ Yãkóꞌbõní, “Má are úꞌdîꞌda mî átẹ́pị ꞌbã ị́jọ́ jọ agá Ị́sãwụ̃ní, ‘Mí ají mání ãnãkpá ásé agá rĩ ꞌbã ĩzá, ⁷ mí aꞌdí ĩꞌdi mánî. Ádrĩ dó ĩꞌdi na ꞌbo, ma míní sụ̃sụ́ má drị̂ wi Ãdróŋâ mẹ́lẹ́tị gá ịsụ́ ádrã drĩ ku.’” ⁸ Rẽbékã jọ, “Mí are ị́jọ́ mâ jọlé rĩ ꞌi, ãzíla ínga ãzị́ lã áyụ mâ ngọ́pị. ⁹ Ímụ kãbĩlõ kí agâlé, mí aꞌdụ́ ị̃ndrị́ kẹ̃rị́ use la kí ị̃rị̃, ma kí aꞌdí mî átẹ́pịní ãjị̂ trũ cécé ĩꞌdi ꞌbã lẽlé rĩ áni. ¹⁰ Mi ĩꞌdi agụ mî átẹ́pịní nalé ĩꞌdi dó sĩ míní sụ̃sụ́ wi ịsụ́ drã drĩ ku benĩ.” ¹¹ Wó Yãkóꞌbõ jọ ãndrẽní, “Índre mâ ádrị́pị Ị́sãwụ̃ ꞌbã ụrụꞌbá dụ pírí ꞌbíkorú, wó ma mâ gâ ꞌbíko kóru. ¹² Mâ átẹ́pị ĩꞌdi ãzî sĩ lẽ áma ụrụꞌbá ụmvị́lé ꞌbo ĩꞌdi dó ịsụ́ la ma ꞌî ulé; ị́jọ́ ꞌdĩ sĩ má icó áma ụrụꞌbá gá áwãtáŋá umvelé sụ̃sụ́ wilé mání rĩ ꞌbã kẹ̃jị́ gá.”

¹³ Ãndrẽ Rẽbékã umvi ĩꞌdiní, “Áwãtáŋá ími drị̃ gá rĩ ꞌbã ujaru áma drị̃ gá, mâ ngọ́pị; mí idé lú ị́jọ́ mâ jọlé mínî rĩ ꞌi, ímụ ãzíla mí aꞌdụ́ mání ị̃ndrị́ kî.” ¹⁴ Mụ dó ị̃ndrị́ kí aꞌdụ́lé ajílé ãndrẽ rụ́ ꞌdõlé, aꞌdí dó ĩzá ãjị́ ambamba átẹ́pị̃ ꞌbã lẽlé ambamba rĩ. ¹⁵ Cọtị aꞌdụ́ bõngó ãlápítítí Ị́sãwụ̃ drị́ gá ĩꞌdi ꞌbã tãmbalé ĩꞌdidrị́ jó agá ꞌdãá rĩ kî, sụ̃ kí Yãkóꞌbõ ꞌbã ụrụꞌbá gá. ¹⁶ Sụ̃ ĩꞌdiní ị̃ndrị́ íníríkó wịlé ꞌdã kí ĩꞌdidrị́ gá ãzíla ãngũ la ꞌbíko kóru imbe gá rĩ kí agá. ¹⁷ Fẽ dó ĩzá ĩꞌdi ꞌbã aꞌdílé ãjị́ ambamba ꞌdã Yãkóꞌbõ drị́ íná ĩꞌdi ꞌbã avulé rĩ trũ. ¹⁸ Yãkóꞌbõ mụ dó átẹ́pị̃ rụ̂lé ãzíla jọ, “Mâ átẹ́pị!” Ãꞌị̃, “Wõyí,” zị ĩꞌdi, “Mi dó mâ ngọ́pị íngõ ꞌi?” ¹⁹ Yãkóꞌbõ umvi ĩꞌdi, “Ma mî ngọ́pị kãjãní Ị́sãwụ̃ ꞌi; ánga ãzị̂ cécé tá mî lũlé mání ꞌdã áni. Mí angá rilé ụrụ gá ãzíla ína ĩzá mâ ajílé míní ꞌdĩ ꞌi, mi dô sĩ mání sụ̃sụ́ mí drị́ gá rĩ wi benĩ.” ²⁰ Ĩsákã jọ ĩꞌdiní, “Mâ ngọ́pị, mí ịsụ́ ĩzá gbõŋáŋáru íngoníru?” Yãkóꞌbõ umvi ĩꞌdi, “Úpí Ãdróŋá mí drị́ gá rĩ ko áma ãzã ĩzâ ịsụ́jó nĩ.”

²¹ Ĩsákã jọ Yãkóꞌbõní, “Mí asé drĩ mi ãni rú ma sĩ ími ụrụꞌbá ụmvị́ nị̃jó la Ãndá ãndáru mi Ị́sãwụ̃ ꞌi yã jõku yụ.” ²² Yãkóꞌbõ asé ru ãni rú átẹ́pị̃ rụ́ ꞌdõlé. Ĩtrĩkã ĩꞌdi jọ, “Ími ụ́ꞌdụ́kọ́ la ꞌụ cécé Yãkóꞌbõ drị̂ áni, wó ími drị́ cécé Ị́sãwụ̃ drị̂ kî áni.” ²³ Ĩtrĩkã dó Yãkóꞌbõ ku ãꞌdusĩku ĩꞌdi ꞌbã drị́ kí ꞌbíkorú cécé Ị́sãwụ̃ drị̂ kî áni. Ĩsákã dó ãni rú lẽ agá ĩꞌdiní sụ̃sụ́ wi agá, ²⁴ wó zị ĩꞌdi ị̃dị́, “Ãndá ãndáru mi Ị́sãwụ̃ ꞌi yã?” Umvi ĩꞌdi, “ꞌẼ, ma Ị́sãwụ̃ ꞌi.” ²⁵ Ĩsákã jọ, “Mí ají mání ĩzá kî. Ádrĩ na la ꞌbo, ma dó míní sụ̃sụ́ má drị̂ wi.” Yãkóꞌbõ ajî dó kí ĩꞌdi rụ́ ꞌdõlé ãzíla fẽ vâ ĩꞌdiní wáyĩnĩ mvụlé ĩndĩ. ²⁶ ꞌDĩ ꞌbã vúlé gá átẹ́pị̃ jọ ĩꞌdiní, “Mí asé mi ãni rú má rụ́ ꞌdõlé, mâ ngọ́pị.” ²⁷ Ĩꞌdi dó mụru asélé Ĩsákã amvulé ꞌbo, ngụ̃ ĩꞌdi ꞌbã bõngó kî, wi dó ĩꞌdiní sụ̃sụ́ ĩꞌdidrị̂ ꞌi. Jọ, “Mâ ngọ́pị ꞌbã ãjị́ la ngụ̃ cécé ngụ̃ŋá úpí ꞌbã ámvụ́ ĩꞌdi sĩ sụ̃sụ́ wijó drị̃ la gá rĩ áni. ²⁸ Ãdróŋá ꞌbã fẽ míní andrẹlị́ká ꞌbụ̃ gá rĩ ãzíla ꞌbã fẽ ámvụ́ mídrị̂ ꞌbã adru kí ãkónã kalépi ambamba rĩ kîrú! Ãdróŋá ꞌbã fẽ míní ãná ꞌbã kakã ife ífí sụ́ ꞌbã adru cí.

²⁹ “Sụ́rụ́ ꞌbã adru kí mî ãtíꞌbó, ꞌbá pírí ꞌbã tị̃ kí ãja vụ̃rụ́ ími drị̃lẹ́ gá. Mí adru úpíru ꞌbá mí drị́ kãkáru ꞌdĩ kí drị̃ cejó, anzị mí ãndrẽ ꞌbã tịlé rĩ kí ꞌbã tị̃ kí ãja vụ̃rụ́ ími drị̃lẹ́ gá. Áwãtáŋá ꞌbã adru ꞌbá ími wãlépi ꞌdĩ kí drị̃ gá ãzíla sụ̃sụ́ ꞌbã adru ꞌbá míní sụ̃sụ́ wilépi rĩ kí drị̃ gá.”

Ị́sãwụ̃ aꞌị́ sụ̃sụ́ Ĩsákã drị́

³⁰ Ĩsákã de ĩꞌdi ꞌbã sụ̃sụ́ wiŋá, ꞌdĩ ũngúkú gá wereŋáru Yãkóꞌbõ la mụ fũlé ꞌbo, ádrị́pị̃ Ị́sãwụ̃ acá cọtị dora gâlé rĩ sĩ. ³¹ Aꞌdí vâ ĩzá ãjị́ ambamba rĩ, agụ ĩꞌdi átẹ́pị̃ rụ̂lé. Jọ, “Mâ átẹ́pị, mí angá rilé ụrụ gá ãzíla ína ĩzá mâ ajílé mí rụ́ ꞌdõlé ꞌdĩ ꞌi mi dó sĩ mání sụ̃sụ́ mí drị́ gá rĩ wi benĩ.” ³² Ĩsákã zị ĩꞌdi, “Mi ãꞌdi ꞌi?” Umvi, “Ma mî ngọ́pị kãjãní Ị́sãwụ̃ ꞌi.” ³³ Ĩsákã aru gbãdrí-gbãdrí ụrụꞌbá iꞌdó yãlé cọtị zị, “ꞌBá tá ãnãkpá ĩzá aꞌdílépi ajílépi la má rụ́ ꞌdõlé rĩ tá ãꞌdi ꞌi? Ána ĩꞌdi úꞌdîꞌda ịsụ́ mí afí drĩ ku rú. Áwi ĩꞌdiní sụ̃sụ́ má drị́ ãsị̃jó rĩ ꞌbo. ꞌDụ sụ̃sụ́ mâ wilé mínî rĩ rá.” ³⁴ Ị́sãwụ̃ la mụ ị́jọ́ átẹ́pị̃ Ĩsákã ꞌbã jọlé ꞌdĩ arelé iꞌdó awálé ụ́ꞌdụ́kọ́ sĩ ꞌbe dóru ụ̃lụ́lụ́ gá ásị́ la lẽ dó kpẹ̃lé kpẹ̃kpẹ̃ jọ, “Mâ átẹ́pị íwi mání sụ̃sụ́ mídrị̂ ĩndĩ fô!”

³⁵ Ĩsákã umvi ĩꞌdiní, “Mî ádrị́pị amụ́ áma ulélé. ꞌDụ sụ̃sụ́ mídrị̂ ꞌbo.” ³⁶ Ị́sãwụ̃ jọ, “ꞌDĩ dó pâlé ị̃rị̃ la Yãkóꞌbõ ꞌbã áma ụ̃gụ̃jó úléŋá sĩ rĩ. Rụ́ la vâ Yãkóꞌbõ ꞌi. ꞌDụ ándrá vâ mâ adrujó ngọ́tị́ ágọ́bị́ kãjãní rĩ rá, úꞌdîꞌda ꞌdụ vâ sụ̃sụ́ má drị̂ rá. Ímba tâ dó sụ̃sụ́ ãzíla tã mání ku rõ?” ³⁷ Ĩsákã umvi ĩꞌdiní, “Áꞌbã dó ĩꞌdi úpíru ími drị̃lẹ́ gá ꞌbo, ãzíla áꞌbã ĩꞌdi ꞌbã kãká kí adrujó ĩꞌdi ꞌbã ãtíꞌbóru ꞌbo. Áfẽ ĩꞌdiní ãná kí wáyĩnĩ trũ ꞌbo. Mâ ngọ́pị, ãko ãzí mâ icó idélé míní rá la dó ꞌdáyụ.” ³⁸ Ị́sãwụ̃ rĩ mãmálá ꞌbãlé átẹ́pị̃ drị́ jọ, “Mi sụ̃sụ́ wiŋâ trũ lú ãlu rõ, mâ átẹ́pị? Íwi mání sụ̃sụ́ ĩndĩ, mâ átẹ́pị!” Iꞌdô dó awálé mị́ndrệ trũ ãzíla ụ́ꞌdụ́kọ́ trũ rere. ³⁹ Ĩsákã jọ ĩꞌdiní, “Andrẹlị́ká ꞌbụ̃ gá la míní ꞌdáyụ, ãngũ ãkónã ũfũlépi ãlá la míní ꞌdáyụ. ⁴⁰ Mi adru ídrirú la ménéŋá mídrị̂ ꞌbã ꞌbá ụꞌdị́ŋá sĩ. Mi ãzị̂ nga mî ádrị́pị drị́ ãtíꞌbóru. Ídrĩ drị̃-ũnzĩ ají, mi dó ãmbõgõ mî ádrị́pị drị̂ trũ ími drị̃ gá rĩ sĩ mi dó sĩ adru mî sĩ yã.” ⁴¹ Ị́sãwụ̃ ngụ̃ dó Yãkóꞌbõ ãjị́ ũnzí átẹ́pị̃ la ĩꞌdiní sụ̃sụ́ wijó rĩ sĩ. Ũrã ĩꞌdi ásị́ gâlé, “Ụ́ꞌdụ́ mâ átẹ́pị ị̃sị̃jó rĩ ace kíru wererú, ma mâ ádrị́pị Yãkóꞌbõ ꞌdị rá.” ⁴² Rẽbékã la mụ ị́jọ́ Ị́sãwụ̃ ꞌbã itúlé Yãkóꞌbõ ꞌdịjó rĩ nị̃lé ꞌbo, umve Yãkóꞌbõ ꞌi jọ ĩꞌdiní, “Mî ádrị́pị Ị́sãwụ̃ itú ị́jọ́ lẽjó ími ꞌdịjó rá. ⁴³ Mâ ngọ́pị mí idé ị́jọ́ mâ jọlé míní ꞌdĩ ꞌi. Ímụ mâ ádrị́pị Lãbánĩ rụ́ Hãránĩ gâlé, ⁴⁴ uꞌálé ĩꞌdi be kpere mî ádrị́pị ꞌbã ásị́ la ịgbẹ agá, ⁴⁵ ãzíla drĩ dó ị́jọ́ mî idélé ĩꞌdi ụrụꞌbá gá ꞌdĩ ãvĩ ráká. Ma dó amụ́ ꞌbá ãzí tị pẽlé mụjó ími ajíjó vúlé ꞌdõlé ĩndõ. Ma ĩmi ãvĩ ị̃rị̃ trá ụ́ꞌdụ́ ãlu agá la ãꞌdu ị́jọ́ sĩ?” ⁴⁶ Rẽbékã jọ Ĩsákãní, “Ma ãyánĩrú ãzíla má ãndẽ Ị́sãwụ̃ ꞌbã ũkú ãmị́yọ́ŋáru ꞌdĩ kî sĩ rá. Yãkóꞌbõ drĩ sĩ kí ãzí ĩgbã ũkúru yã áni dũbã la mâ drãjó rá rĩ ꞌi.”