Íꞌdóŋá 26

Ĩsákã ꞌbã uꞌájó Gérã gá rĩ

¹ Rílẽ ãzí rĩ aꞌdé ãngũ drị̃ gá ị̃dị́ cécé ụ́ꞌdụ́ Ịbịrahị́mụ̃ ngá rĩ sĩ rĩ áni. Ĩsákã mụ Ãbị̃mẹ́lẹ̃kị̃ úpí Fị̃lị̃sị̃tị́nị̃ gá rĩ rụ́ Gérã gá. ² Ãdróŋá iꞌdaru Ĩsákãní jọ, “Ímụ ándrá Mị̃sị́rị̃ gâlé ku mí adru ãngũ mâ lũlé mí adru ala gá rĩ gá. ³ Mí uꞌá drĩ ãngũ ꞌdĩ gá ꞌdâ cêkõ, ma adru mí be ãzíla ma míní sụ̃sụ́ wi rá. Ma ãngũ ꞌdĩ fẽ míní mî drị̃lẹ́ abe ũyõ ándrá mâ sõlé mî átẹ́pị Ịbịrahị́mụ̃ nî rĩ tãmbajó. ⁴ Ma fẽ la drị̃lẹ́ mídrị̂ kí kpẹ̃ cécé lẽlẽgó ꞌbụ̃ gá ꞌdĩ kî áni, ma vâ ãngũ ꞌdĩ fẽ pírí ĩꞌbanî. Sụ́rụ́ ãngũ drị̃ gá rĩ kí sụ̃sụ́ ịsụ́ drị̃lẹ́ mídrị̂ kî sĩ. ⁵ Ãꞌdusĩku Ịbịrahị́mụ̃ are ma rá ãzíla mba vâ ãzị́táŋá má drị̂ kí tã ị́jọ́ mâ azịlé rĩ abe rá.” ⁶ Ĩsákã uꞌá dô sĩ Gérã gá ꞌdãá. ⁷ Ãngũ ꞌdị́pịka kí mụ ĩꞌdi zịlé ũkû ị́jọ́ sĩ jọ, “Ĩꞌdi mâ ámvọ́pị ꞌi,” ãꞌdusĩku idé ụ̃rị̃ sĩ jọjó la, “ꞌDĩ mâ ũkû ꞌi” ũrã ꞌbá ãngũ ꞌdĩ gá rĩ kí mụ ꞌî ꞌdịlé ku ĩꞌdi ꞌbã adrujó ũnĩ-ambambarú rĩ sĩ. ⁸ Ĩsákã la mụ uꞌálé ụ́ꞌdụ́ ãzo rú ꞌdãá ꞌbo, Ãbị̃mẹ́lẹ̃kị̃ úpí ꞌbá Fị̃lị̃sị̃tị́nị̃ gá rĩ ꞌba drị̂ andré ãngũ dẹ̃rị́sã gâ sĩ vụ̃rụ́ ꞌdõlé ndre Ĩsákã kí avâ gá ũkû Rẽbékã be. ⁹ Ãbị̃mẹ́lẹ̃kị̃ umve Ĩsákã ꞌi jọ, “Ị́jọ́ mgbã sĩ ꞌdĩ mî ũkû ꞌi! Íjọ ĩꞌdi mî ámvọ́pị íni la ãꞌdu sĩ yã?” Ĩsákã umvi ĩꞌdiní, “Má ũrã ádrĩ jọ la ĩꞌdi mâ ũkû ꞌi ála áma ꞌdị rá.” ¹⁰ Ãbị̃mẹ́lẹ̃kị̃ jọ, “Mí idé dó ãma íni ãꞌdu sĩ? ꞌBá má ãni ãzí ãlu la drĩ táru la agá ũkú mí drị́ ꞌdĩ sĩ rá mí ají tá andre ũnzĩ ãma drị̃ gá ꞌbo.” ¹¹ Ãbị̃mẹ́lẹ̃kị̃ azị ị́jọ́ ꞌbá pírí ꞌbaní, “ꞌBá ãzí drĩ ágọ́bị́ ꞌdĩ ĩcãndĩ jõku drĩru la ũkú ꞌdĩ sĩ rá, ĩꞌdi drã rá.”

Ãwãŋá kídí kí drị̃ gá rĩ

¹² Ĩsákã sa ũri ãngũ ꞌdã agá ꞌdãá, tra ãkónã alị údu rĩ pâlé túrú ãlu sĩ drị̃ gá ãꞌdusĩku Ãdróŋá wi ĩꞌdiní sụ̃sụ́ rá. ¹³ Málĩ ĩꞌdidrị̂ rĩ kí kpẹ̃lé kpẹ̃ acâ dô sĩ ꞌbá kụ́rẹ́nị́ la. ¹⁴ Ĩꞌdi ꞌbã kãbĩlõ kí ũꞌbí, tị́ ãzíla ꞌbá ãtiꞌború ꞌdĩ kí wẽwẽ rú, ꞌbá Fị̃lị̃sị̃tị́nị̃ gá rĩ kí ásị́ gá ãjã fi ĩꞌdiní cí. ¹⁵ Kụ̃ kí kídí ándrá ãtíꞌbó átẹ́pị̃ Ịbịrahị́mụ̃ drị̂ ꞌbã kí galé ịsụ́ ĩꞌdi drĩ ꞌdĩ sĩ ídrirú rĩ kí tị cí. ¹⁶ Ãbị̃mẹ́lẹ̃kị̃ jọ Ĩsákãní, “Mí aꞌbe ãmã ãngũ, ími ũkpó iti dó ãmadrị̂ rá.” ¹⁷ Ĩsákã ĩdã dóru ꞌbá kãbĩlõ ucélépi Fị̃lị̃sị̃tị́nị̃rú rĩ kí andre gá ꞌdâ rá, mụ dô sĩ lị́cọ́ ꞌbelé áꞌbụ ꞌa Gérã rĩ gá. ¹⁸ Ĩsákã uvá kídí ándrá átẹ́pị Ịbịrahị́mụ̃ ꞌbã galé ꞌbá Fị̃lị̃sị̃tị́nị̃ gá rĩ ꞌbã kí ãzụ̃lé átẹ́pị̃ Ịbịrahị́mụ̃ ꞌbã drãjó ꞌbo rĩ sĩ ꞌdĩ kí ꞌda vâ ĩꞌbaní rụ́ ándrá átẹ́pị̃ ꞌbã ꞌdalé ꞌda kí vúŋá. ¹⁹ Ãtíꞌbó Ĩsákã drị̂ ga kí kídí áꞌbụ agâlé ịsụ́ kí ị̃yị́ ãlá la ꞌdãá. ²⁰ ꞌBá Gérã gá kãbĩlõ ucélépi rĩ kí ꞌbá kãbĩlõ ucélépi Ĩsákã drị̂ abe ãwã kí ãwã-ãwã jọ kí, “Ị̃yị́ ꞌdĩ ãma ãni!” Ị́jọ́ ꞌdĩ sĩ, ꞌda dó ị̃yị̂ rụ́ Ĩsékĩ ꞌi (Ãlíꞌberú ꞌi) ĩꞌbã kí ãwãjó drị̃ la gá rĩ sĩ. ²¹ ꞌDĩ gá ꞌdâ ga kí kídí ãzî, ãwã kí ꞌdĩ drị̃ gá, ꞌda dó sĩ rụ́ la Sítĩnã ꞌi (Ũmbãgá ꞌi). ²² Isé vâru drị̃lẹ́ gá, ga vâ kídí ꞌbã ãzî ãwã kî dó ꞌdĩ drị̃ gá ku, ꞌda dó rụ́ la Rẽhõbótĩ ꞌi (Drị̃lẹ́mgbọ ꞌi), jọjó la “Úꞌdîꞌda Ãdróŋá fẽ dó ãmaní ãngũ ãma dó zo drị̃ gá drị̃ gá (Ãdróŋá ꞌbe dó ãmaní ị́rị́rị́ ꞌbo) ụ̃nọ́kụ́ ꞌdĩ gá ꞌdâ.” ²³ ꞌDã gá ꞌdâ mụ kpere Bẹ̃rị̃sẹ́bã gá. ²⁴ Ị́nị́ ꞌdã sĩ Ãdróŋá iꞌdaru ĩꞌdiní jọ, “Ma Ãdróŋá mî átẹ́pị Ịbịrahị́mụ̃ drị̂ ꞌi. Mí idé ụ̃rị̃ sĩ ku, ãꞌdusĩku ma mí be cí; ma míní sụ̃sụ́ wi rá, ma vâ drị̃lẹ́ mídrị̂ kí fẽ kpẹ̃lé wẽwẽ rú ị́jọ́ ãtíꞌbó má drị́ Ịbịrahị́mụ̃ drị̂ sĩ.” ²⁵ Ĩsákã sị ãngũ uwiŋá idéjó rĩ. Sị dó bụ́rụ́jọ́ ãngũ ꞌdã gá ꞌdãá. Ãtíꞌbó ĩꞌdidrị̂ ga kí vâ kídí.

Ị́jọ́ utúŋá Ĩsákã kí drĩdríŋĩ gá Ãbị̃mẹ́lẹ̃kị̃ be rĩ

²⁶ Ụ́ꞌdụ́ ãlu ãmụ́ Ĩsákã ãni la angá kí Gérã gá ꞌdĩ úpí Ãbị̃mẹ́lẹ̃kị̃ kí Ãhụ́zã ꞌbá ĩꞌdidrị́ ị́jọ́ itulépi rĩ be ãzíla Píkõlõ ãmbógó ãsĩkárĩ ĩꞌdidrị̂ kí drị̃ gá rĩ trũ. ²⁷ Ĩsákã zị kí, “Ĩmi amụ́ má rụ́ ꞌdõlé íni la ãꞌdu sĩ, wó ĩlẽjõ dó ꞌdâ ꞌbãngá áma ãjị́ ku ĩdro ándrá ma rá.” ²⁸ Umvi kí ĩꞌdiní, “Ãndre ábí ꞌbãngá lọ́lọ́ Ãdróŋâ ĩꞌdi mí be, ị́jọ́ ꞌdĩ sĩ ájọ lẽ dó ãma icí kí tị mî trũ, ãna ũyõ ãma drĩdríŋĩ gá cí, ²⁹ ãꞌdusĩku mí idé dô sĩ ãma ũnzí ku, cécé ãma ími vú ũsũjó ku wó ãmba ándrá ími tã sáwã pírí sĩ múké, ãpẽ ándrá ími tị gõjó ásị́ ị̃gbẹ́ sĩ. Mi dó ꞌbá Ãdróŋâ ꞌbã sĩ sụ̃sụ́ wijó ĩꞌdi drị̃ gá ꞌbo rĩ ꞌi.” ³⁰ Ĩsákã aꞌdí ꞌbá ꞌdĩ ꞌbaní íná ãmụ̃ drị̂ ꞌi, na kí ãzíla mvụ kí dóru. ³¹ Ụ̃ꞌbụ́tịnị́nị́ ãgọbị ꞌdĩ sõ kí ũyõ kí drĩdríŋĩ gá cí, Ĩsákã ꞌbã kí pá gẹ̃rị̃ gá aꞌbe kî dó Ĩsákã ásị́ ị̃gbẹ́ sĩ. ³² Ụ́ꞌdụ́ ꞌdã sĩ ãtiꞌbo Ĩsákã drị̂ amụ́ kí ĩꞌdiní ị́jọ́ kídí ĩꞌbaní galé rĩ drị̂ lũlé jọ kí, “Ãma ịsụ́ ị̃yị́ ꞌbo!” ³³ ꞌDa dó rụ́ la Síbã ꞌi (Úyóru ꞌi) kpere ãndrũ tọ̃rọ́mẹ́ ꞌdã ꞌbã rụ́ Bẹ̃rị̃sẹ́bã ꞌi.

³⁴ Ị́sãwụ̃ la mụ calé ílí kãlị́ sụ ꞌbo, ĩgbã ũkú Jụ́dị̃tị̃ Hị́tị̃rú rĩ ꞌbã ị̃zẹ́pị ãzíla Bãsĩmátĩ Élõnĩ Hị́tị̃rú rĩ ꞌbã ị̃zẹ́pị ꞌi. ³⁵ Ũkú ꞌdĩ fẽ kí dó Ĩsákã ꞌbaní Rẽbékã be cãndí ásị́ gá.